ഹോഴ്സെന്സ് (ഡെന്മാര്ക്ക്): 2026 തോമസ് കപ്പ് ബാഡ്മിന്റണില് ഇന്ത്യന് ടീം മെഡല് ഉറപ്പിച്ചു. ക്വാര്ട്ടര് ജയിച്ച് സെമിയില് പ്രവേശിച്ചതോടെയാണ് ഇന്ത്യന് പുരുഷ ടീം മെഡല് ഉറപ്പിച്ചത്. സെമിയില് പ്രവേശിച്ചാല് ഏറ്റവും ചുരുങ്ങിയത് വെങ്കലമെഡല് ലഭിക്കും. ക്വാര്ട്ടറില് ഇന്ത്യ 3-0നു ചൈനീസ് തായ്പേയിയെ കീഴടക്കിയാണ് സെമിയിലേക്കു മുന്നേറിയത്.
ക്വാര്ട്ടര് പോരാട്ടത്തിലെ ആദ്യ സിംഗിള്സില് ലക്ഷ്യ സെന്നിന്റെ ജയത്തോടെയാണ് ഇന്ത്യ പോരാട്ടം ആരംഭിച്ചത്. ലോക ആറാം നമ്പറായ ചൗ ടിയാന് ചെന്നിന് എതിരേ ആദ്യ ഗെയിം നഷ്ടപ്പെട്ടശേഷം ശക്തമായി തിരിച്ചെത്തി ലക്ഷ്യ സെന് ജയം സ്വന്തമാക്കുകയായിരുന്നു. സ്കോര്: 18-21, 22-20, 21-17. തുടര്ന്ന് അരങ്ങേറിയ ഡബിള്സില് ഇന്ത്യയുടെ സാത്വിക്സായ് രാജ് – ചിരാഗ് ഷെട്ടി കൂട്ടുകെട്ട്, ചൈനീസ് തായ്പേയിയുടെ ചിയു ഹസിയാങ് ചീ – വാങ് ചിലിന് എന്നിവരെ തോല്പ്പിച്ചു. മൂന്നു ഗെയിം നീണ്ട പോരാട്ടത്തില് 23-21, 19-21, 21-12നായിരുന്നു ഇന്ത്യന് ടീമിന്റെ ജയം. അതോടെ ഇന്ത്യ 2-0ന് ലീഡ് നേടി.
രണ്ടാം സിംഗിള്സില് ആയുഷ് ഷെട്ടിയാണ് ഇന്ത്യക്കായി ഇറങ്ങിയത്. ലോക എട്ടാം നമ്പറായ ലിന് ചുന് യി ആയിരുന്നു ആയുഷ് ഷെട്ടിന്റെ എതിരാളി. 21-16, 21-17ന് ഇന്ത്യയുടെ ഭാവിവാഗ്ദാനമായ ആയുഷ് ജയം സ്വന്തമാക്കി. ഓള് ഇംഗ്ലണ്ട് ജേതാവായ ലിന് ചുന് യിയെ 48 മിനിറ്റില് ആയുഷ് പറപ്പിച്ചു.
ഇന്ത്യ x ഫ്രാന്സ് സെമി
സെമിയില് ഫ്രാന്സാണ് ഇന്ത്യയുടെ എതിരാളികള്. ക്വാര്ട്ടറില് 3-0ന് ജപ്പാനെ കീഴടക്കിയാണ് ഫ്രാന്സ് സെമിയില് എത്തിയത്. ചൈനയും ഡെന്മാര്ക്കും തമ്മിലാണ് മറ്റൊരു സെമി പോരാട്ടം.
ഗ്രൂപ്പ് എയില് ചൈനയ്ക്കു പിന്നില് രണ്ടാം സ്ഥാനക്കാരായാണ് ഇന്ത്യ ക്വാര്ട്ടറില് പ്രവേശിച്ചത്. തോമസ് കപ്പില് ഇന്ത്യ ഒരു തവണ (2022) ചാമ്പ്യന്മാരായിട്ടുണ്ട്. ഇന്ത്യ മൂന്നു പ്രാവശ്യം (1952, 1955, 1979) വെങ്കലവും സ്വന്തമാക്കി.
ഫ്രാന്സിന് എതിരായ സെമിയില് ഇന്ത്യക്കായി ആയുഷ് ഷെട്ടി, കിഡംബി ശ്രീകാന്ത്, മലയാളി താരം എച്ച്.എസ്. പ്രണോയ് എന്നിവരാണ് സിംഗിള്സ് കളിക്കുക. ക്വാര്ട്ടറിനിടെ കാലിനു ചെറിയ പരിക്കേറ്റ ലക്ഷ്യ സെന് പുറത്തിരിക്കും.
Leave a comment