പ്രിയ സുഹൃത്തായിരുന്ന കൊച്ചിൻ ഹനീഫയുടെ പുതിയ വീട് സന്ദർശിച്ച് മമ്മൂട്ടി. ഭാര്യ സുൽഫത്തിനൊപ്പമായിരുന്നു താരത്തിന്റെ സൗഹൃദ സന്ദർശനം. 16 വർഷത്തെ കാത്തിരിപ്പിനൊടുവിൽ കൊച്ചി വെണ്ണലയിലാണ് കൊച്ചിൻ ഹനീഫയുടെ സമ്പാദ്യം കൊണ്ടു ഭാര്യയും മക്കളും പുതിയ വീടൊരുക്കിയത്. കഴിഞ്ഞ ഞായറാഴ്ചയായിരുന്നു വീടിന്റെ ഗൃഹപ്രവേശന ചടങ്ങ് നടന്നത്.
മമ്മൂട്ടിയുമായി അഗാധമായ ഹൃദയബന്ധം സൂക്ഷിച്ചിരുന്ന താരമായിരുന്നു കൊച്ചിൻ ഹനീഫ. താരത്തിന്റെ സ്വപ്നഭവനത്തിൽ മമ്മൂട്ടി എത്തിയപ്പോൾ ഒരുപാടു കാലത്തെ ഓർമകളും പടികയറി വന്നു.
കൊച്ചിൻ ഹനീഫയുടെ ഭാര്യ ഫാസിലയുമായും മക്കളുമായും ദീർഘനേരം ചെലവിട്ട മമ്മൂട്ടി പ്രിയ സുഹൃത്തിന്റെ ഓർമകൾ നിറഞ്ഞു നിൽക്കുന്ന വീട് നടന്നു കണ്ടു. കൊച്ചിൻ ഹനീഫയുടെ മക്കൾക്കൊപ്പം നിന്ന് ചിത്രങ്ങളും എടുത്ത ശേഷമാണ് താരം മടങ്ങിയത്.
മമ്മൂട്ടിക്കൊപ്പം അഭനയിക്കുക മാത്രമല്ല താരത്തെ വച്ച് നിരവധി സിനിമകളും കൊച്ചിൻ ഹനീഫ സംവിധാനം ചെയ്തിട്ടുണ്ട്. നിരൂപകശ്രദ്ധ നേടിയ ‘വാൽസല്യം’ ആണ് അവയിൽ ഏറെ കയ്യടി നേടിയ ചിത്രം. സഹപ്രവർത്തകർക്കപ്പുറം വലിയൊരു ആത്മബന്ധവും ഇരുവരും തമ്മിൽ സൂക്ഷിച്ചിരുന്നു. എന്നാൽ, ആരോഗ്യപ്രശ്നങ്ങൾ നേരിട്ടപ്പോൾ കൊച്ചിൻ ഹനീഫ അക്കാര്യം മറച്ചുവച്ചത് മമ്മൂട്ടിക്ക് വലിയ സങ്കടമുണ്ടാക്കി. അകാലത്തിൽ ഹനീഫ മരിച്ചപ്പോൾ പൊട്ടിക്കരയുകയായിരുന്നു മമ്മൂട്ടിയെന്നാണ് പിന്നീട് നടൻ മുകേഷ് വെളിപ്പെടുത്തിയത്.
Leave a comment