വാഷിങ്ടൻ : യുഎസിൽ സുഹൃത്തുക്കളുടെ ജീവൻ രക്ഷിക്കുന്നതിനിടയിൽ ഇന്ത്യൻ വിദ്യാർഥി മുങ്ങിമരിച്ചു. ഹൈദരാബാദ് സ്വദേശിയായ അനുരൂപ് റെഡ്ഡി കോഡുരു (22) ആണ് ടെക്സസ് ലൂസിയാന അതിർത്തിയിലെ ടോളിഡോ ബെൻഡ് റിസർവോയറിൽ വച്ച് അപകടത്തിൽപ്പെട്ടത്. യൂണിവേഴ്സിറ്റി ഓഫ് നോർത്ത് ടെക്സസിലെ വിദ്യാർഥിയായിരുന്നു അനുരൂപ്.
സുഹൃത്തുക്കൾക്കൊപ്പം റിസർവോയറിൽ മീൻപിടിക്കാനെത്തിയതായിരുന്നു അനുരൂപ്. ഇതിനിടെ അപ്രതീക്ഷിതമായി വെള്ളത്തിൽ വീണുപോയ മൂന്ന് കൂട്ടുകാരെയും സ്വന്തം ജീവൻ പണയം വച്ച് അനുരൂപ് സാഹസികമായി രക്ഷപ്പെടുത്തി. എന്നാൽ, നീന്തൽ നന്നായി അറിയാമായിരുന്നിട്ടും ഒടുവിൽ അനുരൂപ് വെള്ളത്തിൽ മുങ്ങിത്താഴുകയായിരുന്നു. തുടർന്ന് അധികൃതർ നടത്തിയ തിരച്ചിലിൽ 20 അടി താഴ്ചയിൽ നിന്നാണ് മൃതദേഹം കണ്ടെടുത്തത്.
പഠനത്തിൽ അതീവ മിടുക്കനായിരുന്ന അനുരൂപിന് അടുത്തിടെയാണ് അമേരിക്കയിൽ പുതിയ ജോലി ലഭിച്ചത്. കരിയറിലെ വലിയൊരു സ്വപ്നത്തിലേക്കും പ്രതീക്ഷകളിലേക്കും നടന്നു കയറുന്നതിനിടെയാണ് ഈ ദാരുണ സംഭവം. മൃതദേഹം എത്രയും വേഗം നാട്ടിലെത്തിക്കാനുള്ള നടപടികൾക്കായി ഹൂസ്റ്റണിലെ ഇന്ത്യൻ കോൺസുലേറ്റ് അനുരൂപിന്റെ കുടുംബവുമായും യുഎസ് അധികൃതരുമായും ബന്ധപ്പെട്ടുവരികയാണ്.
Leave a comment