ആദ്യത്തെ ‘സ്വാഭാവിക എ ഐ ക്യാമറ’ യാഥാർത്ഥ്യത്തിലേക്ക്; ഫോട്ടോഗ്രാഫിയുടെ ഭാവി മാറ്റിയെഴുതി ‘കൈറ’, പിന്നിൽ ഇന്ത്യൻ വംശജൻ

ഫോട്ടോഗ്രാഫി ലോകത്ത് വിപ്ലവം സൃഷ്ടിക്കാൻ ലക്ഷ്യമിട്ട് ലോകത്തിലെ ആദ്യത്തെ ‘സ്വാഭാവിക എ ഐ മിറർലെസ് ക്യാമറ’ (Caira AI MFT) പുറത്തിറങ്ങി. കൈറ എന്ന പേരുള്ള ഈ ക്യാമറ, പരമ്പരാഗത ഫോട്ടോഗ്രാഫി രീതികളെ സമൂലം മാറ്റിമറിക്കാൻ സാധ്യതയുണ്ട്. ആളുകൾ കൂട്ടംകൂടി നിൽക്കുന്ന ഒരു ചരിത്ര സ്മാരകത്തിൻ്റെ ചിത്രം എടുക്കുമ്പോൾ, വെറുമൊരു വോയിസ് കമാൻഡ് വഴി ആളുകളെ ഒഴിവാക്കി ലോങ് എക്സ്പോഷർ ചിത്രങ്ങൾ ലഭിക്കാൻ ഈ ക്യാമറ സഹായിക്കും.

ലണ്ടൻ ആസ്ഥാനമായി പ്രവർത്തിക്കുന്ന ‘ക്യാമറ ഇൻ്റലിജൻസ്’ എന്ന കമ്പനിയാണ് കൈറ പുറത്തിറക്കിയത്. കമ്പനിയുടെ സഹസ്ഥാപകനും മേധാവിയും ഇന്ത്യൻ വംശജനായ വിശാൽ കുമാർ ആണ്. ക്യാമറാ നിർമ്മാണത്തിൽ വേറിട്ട പാത സഞ്ചരിക്കുന്ന വിശാൽ, നേരത്തേ ആലിസ് (Alice) എന്ന ശ്രദ്ധേയമായ ക്യാമറയും അവതരിപ്പിച്ചിട്ടുണ്ട്.

പ്രവർത്തന രീതിയും പ്രത്യേകതകളും

ഗൂഗിളിൻ്റെ നാനോ ബനാന എഞ്ചിൻ സോഫ്റ്റ്‌വെയറിൻ്റെ പിന്തുണയോടെയാണ് കൈറ പ്രവർത്തിക്കുന്നത്. ഇത് ജനറേറ്റീവ് എ ഐ ഫീച്ചർ ക്യാമറയിൽ ഉൾക്കൊള്ളിക്കാൻ സഹായിക്കുന്നു.

• വോയിസ് കമാൻഡ് എഡിറ്റിംഗ്: ഫോട്ടോ എടുക്കുന്നതിനിടയിൽത്തന്നെ, ഇലകളുടെ നിറം മാറ്റുന്നതുൾപ്പെടെയുള്ള എഡിറ്റിംഗിനായി കൈറയോട് സംസാരിച്ചാൽ മതി. ഫോട്ടോഷോപ്പ് പോലുള്ള സങ്കീർണമായ സോഫ്റ്റ്‌വെയറുകൾ ആവശ്യമില്ലാതെ മാറ്റങ്ങൾ വരുത്താം.
• മോഡ്യുലാർ ഡിസൈൻ: കൈറ ക്യാമറയ്ക്ക് സ്വന്തമായി സ്ക്രീൻ ഇല്ല. മാഗ്‌സെയ്ഫ് ഫീച്ചറുള്ള ഐഫോൺ കാന്തികമായി ഇതിൽ ഘടിപ്പിച്ച് സ്‌ക്രീനായി ഉപയോഗിക്കാം. (നിലവിൽ ആൻഡ്രോയിഡിന് സപ്പോർട്ട് ഇല്ല).
• ലെൻസ് ഉപയോഗം: ഓ എം സിസ്റ്റം, പാനസോണിക് തുടങ്ങിയ കമ്പനികളുടെ നൂറിലധികം മൈക്രോ ഫോർ തേഡ്‌സ് (എം എഫ് റ്റി) ലെൻസുകൾ കൈറയിൽ ഉപയോഗിക്കാം.
• സെൻസർ: പ്രൊഫഷണൽ ക്യാമറകളെ അപേക്ഷിച്ച് വലിപ്പം കുറവാണെങ്കിലും, ഐഫോൺ 17 പ്രോയുടെ പ്രധാന സെൻസറിനെക്കാൾ 3.2 മടങ്ങ് അധിക വലിപ്പമുള്ള എം എഫ് റ്റി സെൻസറാണ് കൈറയിൽ ഉപയോഗിച്ചിരിക്കുന്നത്.
• ലക്ഷ്യം: ഇത് പ്രൊഫഷണൽ ഫോട്ടോഗ്രാഫർമാർക്കുവേണ്ടി നിർമ്മിച്ചതല്ല, മറിച്ച് ക്രിയേറ്റർമാർക്കും വിനോദസഞ്ചാരികൾക്കും മാർക്കറ്റിംഗ് ആവശ്യങ്ങൾക്കുമുള്ള ലളിതമായ ഉപയോഗത്തിനാണ്.

വിവാദങ്ങളും ഭാവിയും

എ ഐ ഉപയോഗിച്ച് നിർമ്മിക്കപ്പെടുന്ന ചിത്രങ്ങളെ സമൂഹം എങ്ങനെ അംഗീകരിക്കുമെന്ന ചോദ്യം നിലനിൽക്കുന്നുണ്ടെങ്കിലും, എ ഐ ചിത്രങ്ങൾ ഫോട്ടോഗ്രാഫിയുടെ തുടർച്ചയാണെന്നാണ് ഓപ്പൺഎ ഐ മേധാവി സാം ഓൾട്ട്മാൻ അഭിപ്രായപ്പെട്ടത്. നേരത്തെ സാംസങ് ഗ്യാലക്സി എസ് അൾട്രായുടെ സൂം ഫീച്ചറുമായി ബന്ധപ്പെട്ട് ഉയർന്ന വിവാദത്തിൽ, “യഥാർത്ഥ ചിത്രം എന്നു പറഞ്ഞ് ഒന്നില്ല” എന്ന് സാംസങ് എക്സിക്യൂട്ടീവ് പറഞ്ഞതും ഈ സാഹചര്യത്തിൽ ശ്രദ്ധേയമാണ്.

എ ഐ ഫീച്ചറിൻ്റെ ഉപയോഗത്തിന് ആറു മാസത്തിനു ശേഷം പ്രതിമാസം 7 ഡോളർ നൽകേണ്ടി വരുമെന്നത് ഒരു കുറവായി ചൂണ്ടിക്കാണിക്കപ്പെടുന്നുണ്ട്. എങ്കിലും, ക്യാമറ എന്ന ഉപകരണവും ഫോട്ടോഗ്രാഫിയും ഒരു വലിയ മാറ്റത്തിന് തയ്യാറെടുക്കുകയാണെന്നും കൈറ അതിൻ്റെ തുടക്കമാണെന്നും നിരീക്ഷിക്കപ്പെടുന്നു.