‘3I/ATLAS’ അന്യഗ്രഹ പേടകമോ? അഭ്യൂഹങ്ങൾ തള്ളി നാസ, നിഗമനങ്ങൾ വഞ്ചനാപരമെന്ന് ഹാർവാഡ് ശാസ്ത്രജ്ഞൻ

സൗരയൂഥത്തിലൂടെ കടന്നുപോകുന്ന 3I/ATLAS എന്ന നക്ഷത്രാന്തരീയ വസ്തുവിനെക്കുറിച്ചുള്ള അഭ്യൂഹങ്ങൾ തള്ളി യു എസ് ബഹിരാകാശ ഏജൻസിയായ നാസ. 3I/ATLAS ഒരു അന്യഗ്രഹ പേടകമാകാം എന്ന തരത്തിലുള്ള സിദ്ധാന്തങ്ങളെ നാസ തള്ളിക്കളയുകയും, ഇത് നക്ഷത്രാന്തരീയ വാൽനക്ഷത്രം (Interstellar Comet) ആണെന്ന് ചിത്രങ്ങൾ സഹിതം പ്രഖ്യാപിക്കുകയും ചെയ്തു. എന്നാൽ, ഈ വിഷയത്തിൽ നാസയുടെ നിഗമനങ്ങളെ വിമർശിച്ച് ഹാർവാഡ് ശാസ്ത്രജ്ഞനായ ആവി ലോബ് രംഗത്തെത്തി. നാസയുടെ വിശദീകരണങ്ങളെ ‘വഞ്ചനാപരം’ എന്നാണ് അദ്ദേഹം വിശേഷിപ്പിച്ചത്.

നാസയുടെ നിരീക്ഷണവും പഴക്കവും

2025 ജൂലായ് 1-ന് കണ്ടെത്തിയ വാൽനക്ഷത്രം വാർത്തകളിൽ ഇടം നേടിയതോടെയാണ് നാസ വിപുലമായ നിരീക്ഷണ ദൗത്യത്തിന് തുടക്കം കുറിച്ചത്. ബഹിരാകാശ പേടകങ്ങളും ദൂരദർശിനികളും ഉൾപ്പെടെ പന്ത്രണ്ടോളം നാസ സംവിധാനങ്ങൾ 3I/ATLAS-ൻ്റെ ചിത്രങ്ങൾ പകർത്തി.

• ചൊവ്വയുടെ സമീപത്തുകൂടി കടന്നുപോയപ്പോൾ നാസയുടെ മാർസ് റെക്കനൈസൻസ് ഓർബിറ്റർ (MRO) ഏറ്റവും അടുത്തുനിന്നുള്ള ചിത്രങ്ങൾ പകർത്തി.
• മാവെൻ ഓർബിറ്റർ വാൽനക്ഷത്രത്തിൻ്റെ ഘടന വിശകലനം ചെയ്യാൻ സഹായിക്കുന്ന അൾട്രാവയലറ്റ് ഡാറ്റ ശേഖരിച്ചു.
• ചൊവ്വയുടെ ഉപരിതലത്തിലുള്ള പെർസിവിയറൻസ് റോവറും ചിത്രങ്ങൾ പകർത്തി.

3I/ATLAS ന് 500 മുതൽ 800 കോടി വരെ വർഷം പഴക്കമുണ്ടാകുമെന്നാണ് കണക്കാക്കപ്പെടുന്നതെന്ന് യു എസ് കോൺഗ്രസ് അംഗം ജോർജ്ജ് വൈറ്റ്‌സൈഡ്‌സ് വെളിപ്പെടുത്തി. ഇത് ഭൂമിയേക്കാൾ പഴക്കമുള്ളതാണെന്നും, വാൽനക്ഷത്രം അന്യഗ്രഹ പേടകമാണെന്നതിന് തെളിവില്ലെന്നും അദ്ദേഹം വ്യക്തമാക്കി. ഐ എസ് ആർ ഒ യും മൗണ്ട് അബു ദൂരദർശിനിയിലൂടെ 3I/ATLAS-ൻ്റെ ശ്രദ്ധേയമായ പുതിയ ചിത്രം പുറത്തുവിട്ടിരുന്നു.

ആവി ലോബിന്റെ വിമർശനം

നാസ പുറത്തുവിട്ട ചിത്രങ്ങളെയും വിശദീകരണങ്ങളെയും ഹാർവാഡ് ശാസ്ത്രജ്ഞനായ ആവി ലോബ് ശക്തമായി വിമർശിച്ചു. 3I/ATLAS ഒരു സാധാരണ വാൽനക്ഷത്രമാണെന്നും യുഎസിലെ ഭരണസ്തംഭനം കാരണം ഡാറ്റ പ്രോസസ് ചെയ്യാൻ കഴിഞ്ഞില്ലെന്നുമുള്ള ഔദ്യോഗിക മന്ത്രം നാസ ആവർത്തിക്കുകയാണെന്ന് അദ്ദേഹം ബ്ലോഗ് പോസ്റ്റിൽ അഭിപ്രായപ്പെട്ടു.

നാസയുടെ HiRISE ക്യാമറ പകർത്തിയ ചിത്രങ്ങളിൽ ‘പ്രകാശത്തിന്റെ മങ്ങിയ ഒരു ഗോളം മാത്രമാണ്’ പതിഞ്ഞതെന്ന് ലോബ് ചൂണ്ടിക്കാട്ടി. HiRISE-ൽ നിന്നുള്ള പുതിയ ഡാറ്റയും മാവെൻ്റെ കണ്ടെത്തലും മറ്റ് ദൂരദർശിനികളിൽനിന്ന് ലഭിച്ച വിവരങ്ങളിലേക്ക് ഒരു ചെറിയ കൂട്ടിച്ചേർക്കൽ മാത്രമാണ് നടത്തുന്നതെന്നും അദ്ദേഹം അഭിപ്രായപ്പെട്ടു. 3I/ATLAS-ൻ്റെ ഇനിയും വ്യക്തമാകാത്ത 12 കാര്യങ്ങളെക്കുറിച്ച് നാസയുടെ പ്രസ്താവനയിൽ പരാമർശമില്ലെന്നും ലോബ് വിമർശിച്ചു.

ഈ അപൂർവ വസ്തു മനപ്പൂർവം സൗരയൂഥത്തെ ലക്ഷ്യം വെച്ചതല്ലെങ്കിൽ, 3I/ATLAS നെ കണ്ടെത്തുന്നതിന് മുൻപ് സമാനമായ ഒരു ദശലക്ഷം വസ്തുക്കളെ കണ്ടെത്തേണ്ടതായിരുന്നു എന്നും അദ്ദേഹം പറഞ്ഞു. അമച്വർ ജ്യോതിശാസ്ത്രജ്ഞർ പകർത്തിയ ചിത്രങ്ങൾ നാസ പങ്കുവെച്ച HiRISE ചിത്രത്തേക്കാൾ കൂടുതൽ വ്യക്തത നൽകുന്നതായിരുന്നുവെന്നും ലോബ് ആരോപിച്ചു.

ഭീഷണികളെക്കുറിച്ചുള്ള ആശങ്ക

നക്ഷത്രാന്തരീയ വസ്തുക്കൾ ഭൂമിക്ക് ഉയർത്താൻ സാധ്യതയുള്ള ഭീഷണികളെക്കുറിച്ച് യു എസ് കോൺഗ്രസ് അംഗം വൈറ്റ്‌സൈഡ്‌സ് ആശങ്ക പ്രകടിപ്പിച്ചു. 3I/ATLAS-ൻ്റെ വലുപ്പമുള്ള ഒരു വാൽനക്ഷത്രം ഭൂമിയുമായി കൂട്ടിയിടിക്കാൻ വന്നാൽ, അതിനെ ഗതിമാറ്റിവിടാൻ മനുഷ്യരാശിക്ക് വെറും രണ്ട് മാസം മാത്രമേ ലഭിക്കൂ എന്നും അദ്ദേഹം ചൂണ്ടിക്കാട്ടി.