കേരള സെന്റർ 2025 ലെ അവാർഡുകൾ സമ്മാനിച്ചു; ഏഴുപേരെ ആദരിച്ചു

ന്യൂയോർക്ക്: കേരള സെന്ററിന്റെ 33-ാമത് വാർഷിക അവാർഡ് ദാന ചടങ്ങ് ഒക്ടോബർ 25 വൈകുന്നേരം എൽമണ്ടിലെ സെന്റർ ആസ്ഥാനത്ത് പ്രൗഢഗംഭീരമായി നടന്നു. വിവിധ മേഖലകളിൽ പ്രതിഭ തെളിയിച്ചവരും നിസ്വാർത്ഥമായ സേവനത്തിലൂടെ സമൂഹ നന്മയ്ക്കായി പ്രവർത്തിക്കുന്നവരുമായ ഏഴ് പേർക്കാണ് ഈ വർഷം അവാർഡ് നൽകി ആദരിച്ചത്.

ഈ വർഷം ആദരിക്കപ്പെട്ടവരും അവരുടെ പ്രവർത്തന മേഖലകളും:

• ഇൻസ്പെക്ടർ ഷിബു മധു – ഗവൺമെന്റ് & പബ്ലിക് സർവീസ്
• ദിയ മാത്യൂസ് – നിയമ സേവനം
• പ്രിസില്ല സാമുവൽ – നഴ്‌സിംഗ്
• ജയൻ വർഗീസ് – പ്രവാസി മലയാള സാഹിത്യം
• കോശി ഒ. തോമസ് – കമ്മ്യൂണിറ്റി സർവീസ്
• നന്ദിനി മേനോൻ – വിദ്യാഭ്യാസം
• ജോഹരത്ത് കുട്ടി – എഞ്ചിനീയറിംഗ്

ഡോ. സുരേഷ് യു. കുമാർ ആയിരുന്നു മുഖ്യപ്രഭാഷകൻ. കേരള സെന്റർ ട്രസ്റ്റിയും പ്രോഗ്രാം ചെയർമാനുമായ ജി. മത്തായിയുടെ ആമുഖ പ്രസംഗത്തോടെ പുരസ്‌കാര ചടങ്ങിന് തിരശ്ശീല ഉയർന്നു. ഡെയ്‌സി സ്റ്റീഫൻ പള്ളിപ്പറമ്പിൽ എംസിയായിരുന്നു. ബെയ്ലി സ്റ്റീഫൻ ആലപിച്ച അമേരിക്കൻ ദേശീയ ഗാനവും അമീഷ ജെയ്മോന്റെ ഇന്ത്യൻ ദേശീയ ഗാനവും ഹൃദയഹാരിയായി.

സെന്ററിന്റെ പ്രവർത്തനങ്ങളെക്കുറിച്ചും ലക്ഷ്യങ്ങളെക്കുറിച്ചും പ്രസിഡന്റ് അലക്‌സ് കെ. എസ്തപ്പാൻ ഹ്രസ്വമായി വിശദീകരിക്കുകയും സദസ്യരെ സ്വാഗതം ചെയ്യുകയും ചെയ്തു. ന്യൂയോർക്ക് സെനറ്റർ ജോൺ ലു, അസംബ്ലി അംഗങ്ങളായ മിഖായലെ സോളേജസ്, എഡ്വേർഡ് ബ്രോൺസ്റ്റെയ്ൻ, മുൻ സെനറ്റർ കെവിൻ തോമസ്, നോർത്ത് ഹെംപ്‌സ്റ്റെഡ് ടൗൺ ക്ലർക്ക് രാഗിണി ശ്രീവാസ്തവ എന്നിവർ ആശംസകൾ അർപ്പിക്കാനും അവാർഡുകൾ സമ്മാനിക്കാനും ചടങ്ങിൽ സന്നിഹിതരായിരുന്നു. ട്രസ്റ്റി ബോർഡ് ചെയർമാനും അവാർഡ് കമ്മിറ്റി അംഗവുമായ ഡോ. തോമസ് എബ്രഹാം കേരള സെന്ററിന്റെ പ്രവർത്തന ചരിത്രം വിവരിക്കുകയും മുഖ്യ പ്രഭാഷകനായ ഡോ. സുരേഷ് കുമാറിനെ പരിചയപ്പെടുത്തുകയും ചെയ്തു. ഇന്ത്യയെ ലോകത്തിലെ ഒന്നാം നമ്പർ സമ്പദ്‌വ്യവസ്ഥയായി മാറ്റാൻ കഴിവുള്ള ‘ഇന്ത്യൻ നാഗരിക ഇന്റലിജൻസ്’ എന്ന ആശയത്തെക്കുറിച്ചാണ് ഡോ. കുമാർ സംസാരിച്ചത്.

അവാർഡ് ജേതാക്കളെ തിരഞ്ഞെടുത്ത പ്രക്രിയ ഡയറക്ടർ ബോർഡിന്റെയും അവാർഡ് കമ്മിറ്റിയുടെയും ചെയർമാനായ ഡോ. മധു ഭാസ്‌കരൻ വിവരിച്ചു. കേരള സെന്റർ അവാർഡുകൾക്ക് പുറമെ, ന്യൂയോർക്ക് സ്റ്റേറ്റ് ലെജിസ്ലേറ്റീവ് അസംബ്ലി ആദരിക്കുന്ന സർട്ടിഫിക്കറ്റുകളും അസംബ്ലി അംഗങ്ങൾ അവാർഡ് ജേതാക്കൾക്ക് നൽകി.

കമ്മ്യൂണിറ്റി സേവനത്തിലെ മികവിനുള്ള അവാർഡ് കോശി ഒ. തോമസിനാണ് ലഭിച്ചത്. കേരള സെന്ററിന്റെ യൂത്ത് ഫോറം സെക്രട്ടറി സാമുവൽ ജോസഫ് അദ്ദേഹത്തെ പരിചയപ്പെടുത്തി. സെനറ്റർ ജോൺ ലു, അസംബ്ലിവുമൺ മിഖായലെ സോളേജസ് എന്നിവരുടെ സാന്നിധ്യത്തിൽ അസംബ്ലിമാൻ എഡ്വേർഡ് ബ്രോൺസ്റ്റെയ്ൻ അവാർഡ് സമ്മാനിച്ചു. അസംബ്ലിമാൻ എഡ്വേർഡ് ബ്രോൺസ്റ്റെയ്ൻന്റെ സ്പെഷ്യൽ അസിസ്റ്റന്റും കമ്മ്യൂണിറ്റി ലയസണുമായി സേവനമനുഷ്ഠിക്കുന്ന കോശി, ക്വീൻസിലെ ഇന്ത്യ ഡേ പരേഡ് കമ്മിറ്റിയുടെ ചെയർമാനായും പ്രവർത്തിക്കുന്നു.

നഴ്സിംഗ് നേതൃത്വത്തിലെ മികവിനുള്ള അവാർഡ് പ്രിസില്ല സാമുവൽ നേടി. ബെയ്ലി സ്റ്റീഫൻ പ്രിസില്ലയെ പരിചയപ്പെടുത്തി. അസംബ്ലിവുമൺ സോളേജസിന്റെ സാന്നിധ്യത്തിൽ കേരള സെന്ററിന്റെ ഗ്രാൻഡ് പേട്രൺ വർക്കി എബ്രഹാം അവാർഡ് സമ്മാനിച്ചു. മൗണ്ട് സിനായ് ഹെൽത്ത് സിസ്റ്റത്തിൽ അഡ്വാൻസ്ഡ് പ്രാക്ടീസ് നഴ്സിംഗിന്റെ വൈസ് പ്രസിഡന്റാണ് ഡോ. പ്രിസില്ല.

പ്രവാസി മലയാള സാഹിത്യത്തിന് ശ്രദ്ധേയമായ സംഭാവന നൽകിയതിനുള്ള അവാർഡ് ജയൻ വർഗീസിന് ലഭിച്ചു. കേരള സെന്റർ ജനറൽ സെക്രട്ടറി രാജു തോമസ് ജയനെ പരിചയപ്പെടുത്തി. ഹെംപ്‌സ്റ്റെഡ് ടൗൺ ക്ലർക്ക് രാഗിണി ശ്രീവാസ്തവയാണ് അവാർഡ് സമ്മാനിച്ചത്. കവിത, നാടകം തുടങ്ങി വിവിധ സാഹിത്യ വിഭാഗങ്ങളിലായി പ്രസിദ്ധീകരിച്ച പത്ത് പുസ്തകങ്ങളുടെ രചയിതാവാണ് ജയൻ.

നിയമ സേവനത്തിലെ മികവിനുള്ള അവാർഡ് ദിയ മാത്യൂസിനാണ് ലഭിച്ചത്. ഡോ. അന്ന ജോർജ്ജ് ദിയയെ പരിചയപ്പെടുത്തി. കേരള സെന്റർ ട്രസ്റ്റിയായ അറ്റോർണി അപ്പൻ മേനോൻ അവാർഡ് സമ്മാനിച്ചു. ട്രെയിൽബ്ലേസിംഗ് അഭിഭാഷകയും ബിസിനസ് നേതാവും കമ്മ്യൂണിറ്റി അഡ്വക്കേറ്റുമാണ് ദിയ മാത്യൂസ്. Chugh LLP-യുടെ ന്യൂയോർക്കിലെയും ന്യൂജേഴ്സിയിലെയും ഓഫീസുകളുടെ പാർട്ണർ ഇൻ ചാർജ് ആണ് അവർ. ദി ഇൻഡസ് എന്റർപ്രണേഴ്സ് (TiE) – ന്യൂജേഴ്സി ചാപ്റ്ററിന്റെ പ്രസിഡന്റാണ് ദിയ.

എഞ്ചിനീയറിംഗിലെ മികവിനുള്ള അവാർഡ് ജോഹരത്ത് കുട്ടിക്ക് ലഭിച്ചു. നസീം ബീന അവരെ പരിചയപ്പെടുത്തി, മുൻ സെനറ്റർ കെവിൻ തോമസ് അവാർഡ് സമ്മാനിച്ചു. ന്യൂയോർക്ക് പവർ അതോറിറ്റിയിൽ (NYPA) സിസ്റ്റം എഞ്ചിനീയറിംഗ് സീനിയർ ഡയറക്ടറാണ് ജോഹാരത്ത്. ഇലക്ട്രിക് യൂട്ടിലിറ്റി വ്യവസായത്തിൽ 20 വർഷത്തിലേറെ പരിചയമുണ്ട്. ലോംഗ് ഐലൻഡ് ട്രാൻസ്മിഷൻ എക്സ്പാൻഷൻ പ്രോജക്റ്റിന് ‘ചീഫ് എഞ്ചിനീയർ’ എന്ന നിലയിൽ അവർ നേതൃത്വം നൽകുന്നു.

വിദ്യാഭ്യാസ മേഖലയിലെ മികവിനുള്ള അവാർഡ് ഡോ. നന്ദിനി അമ്പാട്ട് മേനോൻ നേടി. കേരള സെന്റർ അംഗവും NYC സ്കൂൾ അധ്യാപകനുമായ ജോസ് സ്റ്റീഫൻ ഡോ. മേനോനെ പരിചയപ്പെടുത്തി. കേരള സെന്റർ സ്ഥാപക ഗ്രാൻഡ് പേട്രൺ ദിലീപ് വർഗീസ് അവാർഡ് സമ്മാനിച്ചു. ന്യൂജേഴ്സിയിലെ സോമർസെറ്റിലുള്ള സീഡാർ ഹിൽ പ്രിപ്പറേറ്ററി സ്കൂളിന്റെ സ്ഥാപകയും ചീഫ് എഡ്യൂക്കേഷൻ ഓഫീസറുമാണ് നന്ദിനി.

സർക്കാർ, പൊതുസേവനം എന്നിവയിലെ മികവിനുള്ള അവാർഡ് ജേതാവായ ഇൻസ്പെക്ടർ ഷിബു മധുവിന് കുടുംബപരമായ അടിയന്തിര സാഹചര്യം കാരണം ചടങ്ങിൽ പങ്കെടുക്കാൻ കഴിഞ്ഞില്ല.

ഈ അവാർഡ് ദാന ചടങ്ങിനോടനുബന്ധിച്ച് പുറത്തിറക്കിയ സുവനീർ പ്രകാശനം, കമ്മിറ്റി ചെയർമാൻ ജോസ് ചെരിപുറം മറ്റ് കമ്മിറ്റി അംഗങ്ങളായ ജോസ് കാടാപ്പുറം, ഡോ. തെരേസ ആന്റണി എന്നിവരുടെ സാന്നിധ്യത്തിൽ സൂസമ്മ എബ്രഹാമിന് ഒരു കോപ്പി നൽകിക്കൊണ്ട് നിർവ്വഹിച്ചു. പയനിയർ ക്ലബ്, സർഗ്ഗ വേദി, INANY, GOPIO തുടങ്ങിയ സംഘടനകളുടെ നേതാക്കൾ ഉൾപ്പെടെ നിരവധി സാമൂഹിക നേതാക്കൾ ചടങ്ങിൽ പങ്കെടുത്തു.

കേരള സെന്റർ ഭാരവാഹികളായ രാജു തോമസ്, എബ്രഹാം തോമസ്, മാത്യു വാഴപ്പള്ളി, ജോൺ പോൾ, അലക്സ് ജോസഫ് എന്നിവർ പരിപാടികൾക്ക് നേതൃത്വം നൽകി. എംസിയായിരുന്ന ഡെയ്‌സി സ്റ്റീഫൻ പള്ളിപ്പറമ്പിൽ പരിപാടിയെ ഹൃദയസ്പർശിയായ ഒരനുഭവമാക്കി. തഹ്സീന്റെ മനോഹരമായ ഗാനങ്ങളും നൂപുര ഡാൻസ് സ്കൂളിലെ കലാകാരികളുടെ നൃത്തച്ചുവടുകളും അവാർഡ് ചടങ്ങിന് വർണ്ണപ്പകിട്ടേകി. ജോയിന്റ് സെക്രട്ടറി മേരി ഫിലിപ്പ് വിശിഷ്ട്ട വ്യക്തികൾക്കും സദസ്യർക്കും പരിപാടി വിജയിപ്പിക്കുവാൻ പ്രവർത്തിച്ച എല്ലാവർക്കും നന്ദി പറഞ്ഞു. സ്പൈസ് ഗാർഡൻസ് കേറ്റർ ചെയ്ത വിഭവസമൃദ്ധമായ ഡിന്നറോടുകൂടി 2025 ലെ അവാർഡ് ദാന ചടങ്ങിന് തിരശ്ശീല വീണു.