രണ്ട് ഫെഡറൽ അവധി ദിനങ്ങൾ, ഒബാമ കെയർ ഓപ്പൺ എൻറോൾമെൻ്റ്; യുഎസിലെ ഇന്ത്യക്കാർ നവംബർ മാസം ഓർമ്മിക്കേണ്ടവ

വാഷിങ്ടൺ: യുഎസ് 2025ലെ നവംബർ മാസത്തിലേക്ക് കടക്കുകയാണ്. നവംബർ ഒന്നുമുതൽ അമേരിക്കൻ പൗരന്മാർക്ക് ആരോഗ്യ സംരക്ഷണം, സാമൂഹ്യക്ഷേമ പദ്ധതികൾ, കുടിയേറ്റം, യാത്ര, പൗരത്വം എന്നിവയുമായി ബന്ധപ്പെട്ട് നിരവധി മാറ്റങ്ങൾ വരുന്നുണ്ട്. അമേരിക്കൻ ഇന്ത്യക്കാരെയും അടുത്തിടെ കുടിയേറി വന്നവരെയും സംബന്ധിച്ചിടത്തോളം ഈ മാറ്റങ്ങൾ വളരെ പ്രധാനപ്പെട്ടതാണ്. രാജ്യത്ത് ഒക്ടോബർ ഒന്നാം തീയതി ആരംഭിച്ച ഗവൺമെൻ്റ് ഷട്ട്ഡൗൺ തുടരുകയാണ്. നവംബ‍ർ നാലുവരെ ഷട്ട്ഡൗൺ നീണ്ടാൽ അമേരിക്കൻ ചരിത്രത്തിലെ ഏറ്റവും ദൈ‍ർഘ്യമേറിയ ഷട്ട്ഡൗണായി ഇത് മാറും. ഇത് ഫെഡറൽ പ്രോഗ്രാമുകളിൽ വലിയ സ്വാധീനം ചെലുത്തും. സപ്ലിമെൻ്റൽ ന്യൂട്രീഷ്യൻ അസിസ്റ്റൻസ് പ്രോഗ്രാം (SNAP) എന്നറിയപ്പെടുന്ന ഭക്ഷ്യസഹായ പദ്ധതി പോലുള്ള പ്രധാനപ്പെട്ട പദ്ധതികൾക്കും സ്ത്രീകൾക്കും കുട്ടികൾക്കുമുള്ള വിമൻ ഇൻഫൻ്റ്സ് ആൻ്റ് ചിൽഡ്രൻ (WIC) പ്രോഗ്രാമിനും ഫണ്ട് ലഭിക്കുന്നതിൽ കുറവുണ്ടാകാൻ സാധ്യതയുണ്ട്. കോൺഗ്രസ് ഈ പ്രതിസന്ധി പരിഹരിച്ചില്ലെങ്കിൽ, ലക്ഷക്കണക്കിന് ആളുകൾക്ക് അവരുടെ ആനുകൂല്യങ്ങൾ നഷ്ടപ്പെടാം.

യുഎസിലെ സോഷ്യൽ സെക്യൂരിറ്റി ഗുണഭോക്താക്കൾക്ക് ആശ്വാസവാർത്ത

നവംബർ ഒന്നുമുതൽ ആരോഗ്യ ഇൻഷുറൻസ് പദ്ധതിയായ അഫോർഡബിൾ കെയർ ആക്ട് (ഒബാമകെയർ) ഓപ്പൺ എൻറോൾമെൻ്റ് കാലയളവ് ആരംഭിക്കുകയാണ്. ഇത് 2026ലേക്കുള്ള ആരോഗ്യ ഇൻഷുറൻസ് തിരഞ്ഞെടുക്കാൻ ലക്ഷക്കണക്കിന് ആളുകളെ പ്രേരിപ്പിക്കും. 2021 മുതൽ ചെലവ് കുറയ്ക്കാൻ സഹായിച്ച അഫോർഡബിൾ കെയർ ആക്ട് പ്രീമിയം സബ്സിഡികൾ ഈ വർഷാവസാനം അവസാനിക്കും. കോൺഗ്രസ് ഇത് നീട്ടിയില്ലെങ്കിൽ, പല അമേരിക്കക്കാർക്കും ഇൻഷുറൻസ് പ്രീമിയത്തിലും ചികിത്സാ ചെലവുകളിലും വലിയ വർധനവ് ഉണ്ടാകും. ഇതേച്ചൊല്ലി റിപ്പബ്ലിക്കന്മാരും ഡെമോക്രാറ്റുകളും തമ്മിൽ നിലനിൽക്കുന്ന അഭിപ്രായ വ്യത്യാസമാണ് ഷട്ട്ഡൗൺ നീളാൻ കാരണം.

കുടിയേറ്റം

2025 നവംബറിലെ വിസ ബുള്ളറ്റിൻ പ്രകാരം ഫാമിലി സ്പോൺസേ‌ർഡ് ഗ്രീൻ കാർഡ് അപേക്ഷകളിൽ ചെറിയ പുരോഗതിയുണ്ട്. ഇന്ത്യയിൽ നിന്നും ചൈനയിൽ നിന്നുമുള്ള ചില വിഭാഗങ്ങളിൽ അപേക്ഷകൾ ഏതാനും ദിവസങ്ങളോ ആഴ്ചകളോ മുന്നോട്ട് പോയിട്ടുണ്ട്. എന്നാൽ ഭൂരിഭാഗം വിഭാഗങ്ങളിലും മാറ്റങ്ങളില്ല. തൊഴിൽ അധിഷ്ഠിത ഗ്രീൻ കാർഡ് അപേക്ഷകർക്കുള്ള ഫയലിങ് തീയതികളിലും അന്തിമ നടപടികളുടെ തീയതികളിലും മാറ്റങ്ങളില്ല. ഗ്രീൻ കാർഡിനായി കാത്തിരിക്കുന്ന ഇന്ത്യൻ അപേക്ഷകർക്ക് സാവധാനത്തിലുള്ള പുരോഗതി ഒരു വലിയ വെല്ലുവിളിയാണ്.

വിദേശ വിദ്യാർഥികളെ സംബന്ധിച്ചിടത്തോളം, ഈ മാസം വലിയ നിയന്ത്രണ മാറ്റങ്ങളൊന്നും ഇല്ല. എഫ്1 വിസയുള്ള വിദ്യാ‍ർഥികൾക്ക് എച്ച്1ബി വിസയിലേക്ക് മാറാൻ പുതിയതായി ഏ‍ർപ്പെടുത്തിയ ഒരുലക്ഷം ‍ഡോളർ ആവശ്യമില്ല. പൗരത്വത്തിനും നാച്വറലൈസേഷനും നവംബറിൽ കാര്യമായ മാറ്റങ്ങളൊന്നും ഇല്ല. ഗവൺമെൻ്റ് ഷട്ട്ഡൗൺ കാരണം യുഎസ് സിറ്റിസൺഷിപ്പ് ആൻ്റ് ഇമിഗ്രേഷൻ സ‍ർവീസസിൻ്റെ ഓഫീസുകളിൽ ജീവനക്കാരുടെ കുറവുണ്ടെങ്കിൽ അഭിമുഖങ്ങളും മറ്റ് നടപടിക്രമങ്ങളും വൈകാൻ സാധ്യതയുണ്ട്.

വിമാനയാത്രക്കാ‍ർ ശ്രദ്ധിക്കണം

ഷട്ട്ഡൗൺ നീളുന്ന സാഹചര്യത്തിൽ വിമാനയാത്രക്കാ‍ർ ചില കാര്യങ്ങൾ ശ്രദ്ധിക്കേണ്ടതുണ്ട്. വിമാനത്താവളങ്ങളിലെ എയർ ട്രാഫിക് കൺട്രോളർമാരുടെ കുറവ് സർവീസുകളെ ബാധിക്കുന്നുണ്ട്. പ്രധാന വിമാനത്താവളങ്ങളിലടക്കം വിവിധയിടങ്ങളിൽ സർവീസുകൾ വൈകുകയോ റദ്ദാക്കുകയോ ചെയ്യുന്നത് യാത്രക്കാരെ ബുദ്ധിമുട്ടിലാക്കുന്നുണ്ട്. അതിനാൽ യാത്രക്കാർ വിമാനത്താവളങ്ങളിലേക്ക് പുറപ്പെടും മുൻപ് എയർലൈനുകളുമായി ബന്ധപ്പെടുന്നത് ഉചിതമാകും.

ഫെഡറൽ അവധി ദിനം

നവംബ‍ർ മാസത്തിൽ രണ്ട് ഫെഡറൽ അവധി ദിനമാണ് ഉള്ളത്. നവംബർ 11ന് അമേരിക്കക്കാർ വെറ്ററൻസ് ‍ഡേ ആഘോഷിക്കും. അമേരിക്കയിലെ മുൻ സൈനിക‍ർക്ക് ആദരവ് പ്രകടിപ്പിക്കുന്ന ഈ ദിവസം ഫെഡറൽ അവധി ആയിരിക്കും. വെറ്ററൻസ് ‍ഡേ പരേഡ് ഈ ദിവസത്തെ സവിശേഷതയാണ്. നവംബർ മാസത്തിലെ നാലാം വ്യാഴാഴ്ച ദിവസമായ നവംബർ 27ന് ഫെഡറൽ അവധി ദിനമായ താങ്ക്സ്ഗിവിങ് ഡേ ആണ്. മുൻ വ‍ർഷത്തെ നേട്ടങ്ങൾക്ക് നന്ദി പറയാനുള്ള ദിനമാണ് താങ്ക്സ്ഗിവിങ് ഡേ. ഈ ദിവസം ബന്ധുക്കളും സുഹൃത്തുക്കളും ഒത്തുകൂടും.