കടൽത്തീരത്തെ ‘ചെറിയ വില്ലൻ’: വീവർ ഫിഷിന്റെ കുത്തേറ്റാൽ ബോധക്ഷയം വരെ സംഭവിക്കാം; സഞ്ചാരികൾക്ക് മുന്നറിയിപ്പ്

ലണ്ടൻ: കാഴ്ചയിൽ ഒരു ഇത്തിരി മത്സ്യം മാത്രം. എന്നാൽ വലിപ്പം ചെറുതാണെങ്കിലും ഇതിന്റെ കുത്തേറ്റാൽ മനുഷ്യർക്ക് ബോധക്ഷയം വരെ സംഭവിക്കാൻ സാധ്യതയുണ്ട്. വീവർ ഫിഷ് എന്നറിയപ്പെടുന്ന ഈ മത്സ്യം ഇളം തവിട്ടുനിറത്തിലും വളരെ നേർത്ത ആകൃതിയിലുമാണുള്ളത്. ഏകദേശം 8 മുതൽ 12 സെന്റീമീറ്റർ വരെയാണ് സാധാരണ വലിപ്പം. എങ്കിലും 37 സെന്റീമീറ്റർ വരെ ഇവയ്ക്ക് വളരാനാകും.

ഈ മത്സ്യത്തെ കടൽത്തീരത്തെ മണ്ണിൽ പറ്റിപ്പിടിച്ചിരിക്കുന്നത് കണ്ടെത്താൻ പ്രയാസമാണ്. പലപ്പോഴും ഇവ കടൽത്തീരത്തെ മണലിനടിയിലാണ് സമയം ചെലവഴിക്കുക. ഈ അവസരത്തിൽ മുകൾഭാഗത്തെ ചിറക് മാത്രമേ മണ്ണിന് പുറത്ത് കാണാനാകൂ. ഈ ചിറകുകളിൽ ഒളിപ്പിച്ച മൂന്ന് വിഷമുള്ളുകളാണ് മറ്റ് ജീവികൾക്ക് ഭീഷണിയാകുന്നത്. ഈ വിഷം മനുഷ്യർക്ക് ഗുരുതരമായ ആരോഗ്യപ്രശ്നങ്ങൾ സൃഷ്ടിക്കില്ലെങ്കിലും മുള്ള് കൊണ്ടാൽ അതിശക്തമായ വേദനയാണുണ്ടാവുക. ഓരോരുത്തരിലും വേദനയുടെ തീവ്രതയും ശാരീരിക അസ്വസ്ഥതകളും വ്യത്യസ്തമായി അനുഭവപ്പെടാം. പലരിലും കുത്തേറ്റ ഭാഗം തടിച്ച് വീർക്കാറുണ്ട്.

യൂറോപ്യൻ തീരങ്ങളിലാണ് ഇവയെ കൂടുതലായി കണ്ടുവരുന്നത്. വീവർ ഫിഷിന്റെ സാന്നിധ്യം കണക്കിലെടുത്ത് യു.കെ, അയർലൻഡ് എന്നിവിടങ്ങളിലെ ബീച്ചുകളിൽ സഞ്ചാരികൾക്ക് അധികൃതർ മുന്നറിയിപ്പ് നൽകുന്നത് പതിവാണ്.