ഫീനിക്സ്, അരിസോണ: ഇന്ത്യൻ ചലച്ചിത്ര സംഗീതലോകത്തെ ഇതിഹാസ സംഗീതസംവിധായകനും പത്മവിഭൂഷൺ ജേതാവുമായ ഇളയരാജയുടെ സംഗീതജീവിതത്തിന്റെ അൻപതാം വാർഷികാഘോഷത്തിന്റെ ഭാഗമായി സംഘടിപ്പിക്കുന്ന ‘രാജാ 50’ ലൈവ് സംഗീതപരിപാടി 2026 ഓഗസ്റ്റ് 28-ന് അരിസോണയിലെ Arizona Financial Theatre-ൽ അരങ്ങേറും. അമേരിക്കൻ സംഗീതപര്യടനത്തിലെ പ്രധാന വേദികളിലൊന്നായ ഫീനിക്സിൽ നടക്കുന്ന ഈ സംഗീതവിരുന്നിനായി ദക്ഷിണേന്ത്യൻ സംഗീതാസ്വാദകർ വലിയ പ്രതീക്ഷയോടെയാണ് കാത്തിരിക്കുന്നത്.
തമിഴ്, മലയാളം, തെലുങ്ക്, കന്നഡ, ഹിന്ദി തുടങ്ങി വിവിധ ഭാഷകളിലായി അഞ്ച് പതിറ്റാണ്ടിലേറെയായി സംഗീതലോകത്തെ സമ്പന്നമാക്കിയ ഇളയരാജയുടെ അനശ്വര ഗാനങ്ങൾ തത്സമയം ആസ്വദിക്കാനുള്ള അപൂർവ അവസരമാണ് ഈ പരിപാടി ഒരുക്കുന്നത്. അദ്ദേഹത്തിന്റെ സംഗീതയാത്രയെ അനുസ്മരിക്കുന്ന പ്രത്യേക അവതരണങ്ങളും വേദിയെ ശ്രദ്ധേയമാക്കും.
ഫീനിക്സിലെയും സമീപ പ്രദേശങ്ങളിലെയും ഇന്ത്യൻ സമൂഹത്തിന്റെ സഹകരണത്തോടെയാണ് പരിപാടിയുടെ ഒരുക്കങ്ങൾ പുരോഗമിക്കുന്നത്. വിവിധ കമ്മ്യൂണിറ്റി നേതാക്കളും സന്നദ്ധ പ്രവർത്തകരും പരിപാടിയുടെ വിജയത്തിനായി പ്രവർത്തിച്ചുവരുന്നു.
സംഘാടകരിൽ ഉൾപ്പെടുന്ന പ്രമുഖരിൽ Vamsi Krishna Eruvaram, Sreejith Sreenivasan, Anil Bharadwaj, Chenna Reddy, Dr. Karthik Reddy Donuur, Lakshmi Boggarapu , ChithraPriya ,Praveen Samala, Sachidananda Prabhu , Sathish Panchaksharam, Sarav Subramanian, Srini Subramanian, Subbu Uppuluri, Shyam Byra, Dheeraj Pola, Gnani Marupakula, Sathi Sivam, Adi Morreddy, Jeggy Krish, Guptha എന്നിവരും ഉൾപ്പെടുന്നു.Sankara Nethralaya USAയുടെ പൂർണ പിന്തുണയോടെയാണ് ‘രാജാ 50’ സംഗീതവിരുന്ന് ഫീനിക്സിൽ സംഘടിപ്പിക്കുന്നത്.
പരിപാടിയുടെ ടിക്കറ്റുകൾ Ticketmaster വഴി ലഭ്യമാണ്. സംഗീതപ്രേമികൾക്ക് കുടുംബസമേതം പങ്കെടുക്കാവുന്ന ഈ സംഗീതവിരുന്ന് ഫീനിക്സിലെ ഇന്ത്യൻ സമൂഹത്തിന്റെ ഈ വർഷത്തെ ഏറ്റവും വലിയ സാംസ്കാരിക ആഘോഷങ്ങളിലൊന്നായിരിക്കുമെന്ന് സംഘാടകർ അറിയിച്ചു.
- Report ശ്രീജിത്ത് ശ്രീനിവാസന്
