കൊളംബസ് (ഒഹായോ): ഒഹായോ സ്റ്റേറ്റ് സർവകലാശാലയിൽ പഠിച്ചിരുന്ന 21-കാരനായ വിദ്യാർത്ഥി സരോഷ് ഷേത്ത് (Sarosh Sheth) മദ്യലഹരിയിലായിരുന്നുവെന്ന് സംശയിക്കുന്ന ഡ്രൈവർ റെഡ് സിഗ്നൽ മറികടന്ന് വാഹനം ഇടിച്ചുണ്ടായ അപകടത്തിൽ മരിച്ചു.
ബുധനാഴ്ച (ജൂലൈ 23) രാത്രി സർവകലാശാലയ്ക്കു സമീപമുള്ള North High Street–East 11th Avenue ജംഗ്ഷനിലാണ് അപകടം നടന്നത്. പോലീസ് പറയുന്നതനുസരിച്ച്, ഫോർഡ് മസ്റ്റാങ് കാർ റെഡ് സിഗ്നൽ മറികടന്ന് റോഡ് മുറിച്ചുകടക്കുകയായിരുന്ന മൂന്ന് കാൽനടയാത്രക്കാരെ ഇടിക്കുകയായിരുന്നു.
ഗുരുതരമായി പരിക്കേറ്റ സരോഷ് ഷേത്തിനെ Ohio State Wexner Medical Center-ലേക്ക് മാറ്റിയെങ്കിലും ജീവൻ രക്ഷിക്കാനായില്ല. അപകടത്തിൽ പരിക്കേറ്റ മറ്റ് രണ്ട് കാൽനടയാത്രക്കാരും ചികിത്സയിലാണ്.
ന്യൂറോസയൻസ് വിഷയത്തിൽ പഠിച്ചിരുന്ന സരോഷ് ഷേത്ത് ഭാവിയിൽ ഡോക്ടറാകാനും ന്യൂറോഡിജെനറേറ്റീവ് രോഗങ്ങളെക്കുറിച്ച് ഗവേഷണം നടത്താനും ആഗ്രഹിച്ചിരുന്ന വിദ്യാർത്ഥിയാണെന്ന് സർവകലാശാല അധികൃതർ അറിയിച്ചു.
അപകടമുണ്ടാക്കിയ ഡ്രൈവറെ പോലീസ് കസ്റ്റഡിയിലെടുത്തിട്ടുണ്ട്.
- Report പ്രസാദ് തീയാടിക്കൽ
