പെരുമ്പാവൂർ: കണ്ണാടിയിൽ പ്രതിഫലിക്കുന്നതുപോലെ അക്ഷരങ്ങളെ തിരിച്ചും മറിച്ചും എഴുതുന്നതിൽ (മിറർ ഇമേജ് റൈറ്റിങ്) വിദഗ്ധനായിരുന്ന ആയത്തുപടി പള്ളിക്കരക്കാരൻ പി.പി. റാഫേൽ (ത്രീഡി ബേബി-74) അന്തരിച്ചു. കളമശേരി എച്ച്.എം.ടി.യിൽ 30 വർഷം മെഷിനിസ്റ്റായിരുന്നു. മലയാളം, ഇംഗ്ലീഷ്, ഹിന്ദി, തമിഴ്, തെലുങ്ക്, കന്നഡ, അറബി എന്നീ ഭാഷകളിൽ അഞ്ചുതരത്തിൽ അക്ഷരങ്ങളെ തിരിച്ചും മറിച്ചും എഴുതി വാർത്തകളിൽ ഇടം നേടിയിട്ടുണ്ട്. വലതുകൈകൊണ്ടും ഇടതുകൈകൊണ്ടും ഒരേ സമയം, ഒരേ വേഗത്തിൽ, വ്യത്യസ്ത ഭാഷകളിൽ മിറർ ഇമേജ് ശൈലിയിൽ എഴുതാൻ അദ്ദേഹത്തിന് പ്രത്യേക കഴിവുണ്ട്.
ഇരുകൈകളും ഉപയോഗിച്ച് ഒരേസമയം വ്യത്യസ്ത ഭാഷകളിൽ വ്യത്യസ്ത വിഷയങ്ങൾ എഴുതുക, ചുണ്ടുകളും കാൽവിരലുകളുംകൊണ്ട് അക്ഷരങ്ങൾ കുറിക്കുക, കണ്ണുകെട്ടി എഴുതുക, വർത്തമാനപത്രങ്ങളും മ്യൂസിക്കൽ കീബോർഡും തിരിച്ചുപിടിച്ചു വായിക്കുക തുടങ്ങിയവ ബേബിയുടെ പ്രകടനങ്ങളാണ്. 2007-ൽ ഇന്ത്യൻ ട്രേഡ് ഫെയർ ഫൗണ്ടേഷന്റെ റൈറ്റിങ് വിസാർഡ് അവാർഡും ലിംക ബുക്ക് ഓഫ് റെക്കോഡും നേടിയിട്ടുണ്ട്. ആയത്തുപടിയിൽ ത്രീഡി എന്ന പേരിൽ ഫോട്ടോ സ്റ്റുഡിയോ നടത്തിയിരുന്നു.
ഭാര്യ: ആലുവ മുളവരിക്കൽ കുടുംബാംഗം വൽസ. മക്കൾ: ധന്യ, ധവാൻ, ദിവ്യ. മരുമക്കൾ: സ്റ്റെഫി (കണിയൊടിക്കൽ, ചുണങ്ങംവേലി), ജിനോ (മോളത്ത്, ആനിക്കാട്, മൂവാറ്റുപുഴ), പരേതനായ സുനിൽ (കടവന്ത്ര പൈനന്തറ കുടുംബാംഗം). സംസ്കാരം തിങ്കളാഴ്ച രാവിലെ ഒൻപതിന് ആയത്തുപടി നിത്യസഹായമാതാ പള്ളി സെമിത്തേരിയിൽ.
