പത്തനംതിട്ട: ‘പ്രവാചകന്മാരേ പറയൂ…’ എന്നുതുടങ്ങുന്ന ബ്ലാക്ക് ആൻഡ് വൈറ്റ് സിനിമാഗാനരംഗം ഒന്നരയാഴ്ച മുൻപ് കളറിൽ യുറ്റ്യൂബിൽ എത്തിയിരുന്നു. 1971-ൽ പുറത്തിറങ്ങിയ ‘അനുഭവങ്ങൾ പാളിച്ചകൾ’ എന്ന ചിത്രത്തിലെ ഗാനരംഗമാണ് ഒരു കമ്പനി നിറം നൽകി ഇറക്കിയത്. പരമാവധി കൃത്യതയോടെ ആളുകൾക്കും സ്ഥലങ്ങൾക്കും യോജിക്കുന്ന രീതിയിലുള്ള നിറങ്ങൾ രംഗങ്ങൾക്ക് നൽകിയിട്ടുണ്ട്.
പ്രേക്ഷകരിൽനിന്ന് മികച്ച പ്രതികരണമാണ് ലഭിക്കുന്നത്. പഴയ ചിത്രങ്ങൾ പുതിയ നിറത്തിൽ ഒരുക്കാനാകും എന്നതിന്റെ വലിയ സാധ്യതയാണ് തെളിയുന്നത്. കുറച്ചുവർഷമായി ബ്ലാക്ക് ആൻഡ് വൈറ്റ് മലയാളചിത്രങ്ങൾക്ക് നിറം നൽകാൻ പല കമ്പനികളും ശ്രമങ്ങൾ നടത്തിയിരുന്നു. എന്നാൽ, ഇതിന് വരുന്ന ഭീമമായ ചെലവാണ് പ്രധാന വെല്ലുവിളിയായിരുന്നത്.
ഇപ്പോൾ എ.ഐ. സാങ്കേതികവിദ്യ പുരോഗമിച്ചതോടെ ചെലവുകുറഞ്ഞ രീതിയിൽ ഇവ ചെയ്യാൻ സാധിക്കും. ‘പ്രവാചകന്മാരേ…’ എന്ന ഗാനത്തിന്റെ കളറിങ് ജോലികൾ അമേരിക്കയിലാണ് ചെയ്തത്. ഏറെ സമയമെടുത്താണ് ഓരോ രംഗവും കളർചെയ്യുന്നത്.
ഇതേനിലവാരത്തിൽ ഒരു പൂർണസിനിമ റീമാസ്റ്റർചെയ്ത് കളറിലേക്ക് മാറ്റണമെങ്കിൽ 40 ലക്ഷം രൂപയിലധികം ചെലവുവരും. ഗാനരംഗങ്ങൾ കുറഞ്ഞ ചെലവിൽ സാധാരണ സോഫ്റ്റ്വേറുകൾ ഉപയോഗിച്ച് കളർ ചെയ്യാനാകും. എന്നാൽ, അതിൽ നിറങ്ങളും ദൃശ്യങ്ങളുടെ കൃത്യതയും കുറവായിരിക്കും.
മുൻപ് ഹിന്ദിയിലെ ‘മുഗൾ ഇ ആസം’, തെലുങ്കിലെ ‘മായാബസാർ’ പോലെയുള്ള ചിത്രങ്ങൾ വിജയകരമായി കളറിലേക്ക് മാറ്റി റിലീസ് ചെയ്തിരുന്നു.
Leave a comment