ദൈവശാസ്ത്ര പഠനത്തിൽ ഉന്നത നേട്ടം; ആലിസ് മഞ്ചേരിക്ക്‌  തിയോളജിയിൽ ബിരുദം

ഫ്ലോറിഡ : വിശ്വാസജീവിതത്തോടും സാമൂഹിക പ്രതിബദ്ധതയോടും ചേർന്നുനിൽക്കുന്ന മാതൃകാപരമായ സേവനങ്ങൾക്ക് പേരുകേട്ട ഫ്‌ളോറിഡയിലെ ഓർലാന്റോ സ്വദേശിനി ആലിസ് മഞ്ചേരി തിയോളജിയിൽ ബിരുദം നേടി ശ്രദ്ധേയയായി. അമേരിക്കൻ മലയാളി സമൂഹത്തിനാകെ അഭിമാനമായി മാറിയ ഈ നേട്ടം, ആത്മീയ വളർച്ചയ്ക്കും സമൂഹസേവനത്തിനും ഒരുപോലെ പ്രാധാന്യം നൽകുന്ന ഒരു ജീവിതയാത്രയുടെ അംഗീകാരമായാണ് വിലയിരുത്തപ്പെടുന്നത്.

ആൽഫ ഇൻസ്റ്റിറ്റ്യൂട്ട് ഓഫ് തിയോളജി ആൻഡ് സയൻസ് (Alpha Institute of Theology and Science) ആണ് ആലിസ് മഞ്ചേരിക്ക് തിയോളജി ബിരുദം നൽകിയത്. 2026 ജൂൺ 15-ന് ടെക്സാസിലെ ഡാലസിലുള്ള സെന്റ് അൽഫോൻസാ സീറോ മലബാർ കത്തോലിക്കാ ദേവാലയത്തിൽ നടന്ന ഭംഗിയാർന്ന കോൺവൊക്കേഷൻ ചടങ്ങിലായിരുന്നു ബിരുദദാനം. വിവിധ സംസ്ഥാനങ്ങളിൽ നിന്നുള്ള വൈദികരും വിദ്യാഭ്യാസ-സാമൂഹിക രംഗങ്ങളിലെ പ്രമുഖരും കുടുംബാംഗങ്ങളും വിശ്വാസിസമൂഹവും സാക്ഷികളായ ചടങ്ങ് ആത്മീയതയും അക്കാദമിക മികവും സമന്വയിച്ച ഒരു ആഘോഷമായി മാറി.

തൃശൂർ ജില്ലയിലെ ചാലക്കുടി സ്വദേശിനിയായ ആലിസ് മഞ്ചേരി, വർഷങ്ങളായി ഫ്‌ളോറിഡയിലെ ഓർലാന്റോയിൽ താമസിച്ചു വരികയാണ്. ഓർലാന്റോയിലെ സെന്റ് മേരീസ് സീറോ മലബാർ കത്തോലിക്കാ ദേവാലയത്തിലെ സജീവ അംഗവും വിവിധ ശുശ്രൂഷാ പ്രവർത്തനങ്ങളിലെ നിറസാന്നിധ്യവുമാണ് അവർ. സഭയുടെ ആത്മീയ-സാമൂഹിക പ്രവർത്തനങ്ങളിൽ അവർ പുലർത്തുന്ന ആത്മാർഥ പങ്കാളിത്തം സമൂഹത്തിന്റെ ആദരവും സ്നേഹവും നേടിയെടുത്തിട്ടുണ്ട്.

അതോടൊപ്പം, വേൾഡ് മലയാളി കൗൺസിൽ (WMC) വനിതാ ഫോറത്തിന്റെ സജീവ പ്രവർത്തകയായും ആലിസ് മഞ്ചേരി ശ്രദ്ധേയയാണ്. കേരളത്തിലും അമേരിക്കയിലുമായി നിരവധി ജീവകാരുണ്യ പ്രവർത്തനങ്ങൾക്ക് നേതൃത്വം നൽകുകയും, വിദ്യാഭ്യാസ സഹായം, നിർധന കുടുംബങ്ങൾക്ക് പിന്തുണ, ചികിത്സാ സഹായം, വനിതാ ശാക്തീകരണ പ്രവർത്തനങ്ങൾ തുടങ്ങിയ മേഖലകളിൽ ശ്രദ്ധേയമായ ഇടപെടലുകൾ നടത്തുകയും ചെയ്തിട്ടുണ്ട്. നിസ്വാർത്ഥ സേവനവും മാനവിക മൂല്യങ്ങളും ജീവിതത്തിന്റെ ഭാഗമായി സ്വീകരിച്ച വ്യക്തിത്വമാണ് അവർ.

ആത്മീയവിദ്യാഭ്യാസത്തിലൂടെ വിശ്വാസത്തെ കൂടുതൽ ആഴത്തിൽ മനസ്സിലാക്കാനും, പഠനത്തിലൂടെ ലഭിച്ച അറിവ് സമൂഹത്തിന്റെ നന്മയ്ക്കായി പ്രയോജനപ്പെടുത്താനുമുള്ള ആലിസ് മഞ്ചേരിയുടെ പ്രതിബദ്ധതയാണ് ഈ ബിരുദ നേട്ടത്തിന് പിന്നിലെ പ്രചോദനമെന്ന് അടുത്തറിയുന്നവർ അഭിപ്രായപ്പെടുന്നു.

കുടുംബജീവിതം, സഭാപ്രവർത്തനങ്ങൾ, സാമൂഹിക സേവനം എന്നിവയെ സമന്വയിപ്പിച്ചുകൊണ്ട് ദൈവശാസ്ത്ര പഠനത്തിൽ ഉന്നത വിജയം കൈവരിച്ച ആലിസ് മഞ്ചേരി, അമേരിക്കൻ മലയാളി വനിതകൾക്ക് മാത്രമല്ല, പുതുതലമുറയ്ക്കാകെ പ്രചോദനമായി മാറുകയാണ്.

വിശ്വാസത്തിന്റെ വെളിച്ചവും സേവനത്തിന്റെ കരുതലും ചേർത്ത് ജീവിതത്തെ അർഥപൂർണമാക്കുന്ന ഈ നേട്ടത്തിന് വിവിധ സാമൂഹിക, സാംസ്കാരിക, മത സംഘടനകളുടെ നേതാക്കൾ ആശംസകളും അഭിനന്ദനങ്ങളും നേർന്നു. 

• Report പിന്റോ കണ്ണംപള്ളി