ഫ്രാൻസിൽ നടക്കുന്ന എഐ ഫിലിം അവാർഡായ ‘കാൻസ് 2026’ലേക്ക് തിരഞ്ഞെടുക്കപ്പെട്ട് കോട്ടയം സ്വദേശിയായ സച്ചു കുന്നത്തിലിന്റെ സിനിമ. സച്ചു സംവിധാനം ചെയ്ത ‘ദ് ലൈറ്റ്’ എന്ന എഐ ആനിമേഷൻ ഷോർട്ട് ഫിലിമാണ് തിരഞ്ഞെടുക്കപ്പെട്ടത്. ഇല്ലിക്കൽ ചെങ്ങളം സ്വദേശിയായ സച്ചുവാണ് ചിത്രത്തിന്റെ രചനയും നിർവഹിച്ചിരിക്കുന്നത്.
ക്രൗഡ് ഫണ്ടിങ്ങിലൂടെയാണ് ‘ദ് ലൈറ്റ്’ നിർമിച്ചത്. മനോജ് മഹാദേവൻ ആണ് ചിത്രത്തിന്റെ ആനിമേഷനും എഡിറ്റിങ്ങും നിർവഹിച്ചത്. ‘ബിരിയാണി’ എന്ന സിനിമയുടെ സംവിധായകനും ദേശീയ അവാർഡ് ജേതാവുമായ സജിൻ ബാബു ആണ് ചിത്രം അവതരിപ്പിക്കുന്നത്.
ഇറ്റലിയിൽ നടക്കുന്ന ഫിലിം ഫെസ്റ്റിവലിലും ‘ദ് ലൈറ്റ്’ തിരഞ്ഞെടുക്കപ്പെട്ടിട്ടുണ്ട്. കോട്ടയം ഫിലിം സൊസൈറ്റി അംഗമാണ് സച്ചു.
ബെംഗളൂരുവിൽ എസ്ബിഐ ക്രെഡിറ്റ് വിഭാഗത്തിൽ ജോലി െചയ്യുന്ന സച്ചു പതിമൂന്ന് വർഷമായി സിനിമ മേഖലയിൽ പ്രവർത്തിക്കുന്നുണ്ട്. ചെങ്ങളം കുന്നത്ത് വില്ലയിൽ ബിജു കുന്നത്തിന്റെയും സുജ കുരുവിളയുടെയും മകനാണ് സച്ചു കുന്നത്ത്. സഹോദരി സോന.
