വാസക്ടമി പരാജയപ്പെട്ടു; ബ്രിട്ടീഷ് ദമ്പതികൾക്ക് 14-ാമത് കുഞ്ഞ് വരുന്നു!

യു കെ :വാസക്ടമി (പുരുഷ വന്ധ്യംകരണം) നടത്തിയിട്ടും ഫലം കാണാതെ 14-ാമത് കുഞ്ഞിനെ വരവേൽക്കാൻ ഒരുങ്ങുകയാണ് യുകെയിലെ ഒലിവർ-നതാലി ജാക്സൺ ദമ്പതികൾ. 10 കുട്ടികൾ ആയപ്പോൾ മതിയാക്കാം എന്ന് കരുതിയാണ് ഒലിവർ വാസക്ടമി ചെയ്തത്. എന്നാൽ ശസ്ത്രക്രിയക്ക് ശേഷം ജനിക്കാൻ പോകുന്ന നാലാമത്തെ കുഞ്ഞാണിത്.

യുകെയിൽ നിന്നുള്ള ജാക്സൺ കുടുംബം ഏപ്രിൽ 14 ചൊവ്വാഴ്ച ബ്രിട്ടീഷ് ടോക്ക് ഷോയായ ‘ദിസ് മോർണിംഗിൽ’ അതിഥികളായെത്തി. ഒലിവർ എന്ന വ്യക്തി താൻ മുൻപ് ഒരു വാസക്ടമി ശസ്ത്രക്രിയക്ക് വിധേയനായിരുന്നുവെന്നും, എന്നാൽ അത് പരാജയപ്പെട്ടുവെന്നും പരിപാടിക്കിടെ വെളിപ്പെടുത്തി.

2004-ൽ ഒലിവറിന് മൂന്നാം ഘട്ട വൃഷണ അർബുദം ബാധിച്ചിരുന്നു. തുടർന്ന് നടന്ന ശസ്ത്രക്രിയക്കും കീമോതെറാപ്പിക്കും ശേഷം കുട്ടികളുണ്ടാകാൻ സാധ്യത കുറവാണെന്നായിരുന്നു ഡോക്ടർമാർ പറഞ്ഞിരുന്നത്. എന്നാൽ അതെല്ലാം മറികടന്നാണ് ഈ വലിയ കുടുംബം വളർന്നത്.

ഇത്രയും വലിയ കുടുംബത്തെ ഒരു ഭാരമായി കാണുന്നില്ലെന്നും തങ്ങൾ ഭാഗ്യവാന്മാരാണെന്നും നതാലി പറഞ്ഞു. ഭർത്താവിന് നല്ല ശമ്പളമുള്ള ജോലിയുണ്ടെന്നും ബജറ്റ് അനുസരിച്ച് കാര്യങ്ങൾ മുന്നോട്ട് കൊണ്ടുപോകുമെന്നും അവർ കൂട്ടിച്ചേർത്തു. എന്തായാലും ഒരിക്കൽ കൂടി വാസക്ടമി ചെയ്യാനുള്ള തയ്യാറെടുപ്പിലാണ് ഒലിവർ.