പാമ്പാടി തിരുമേനിയുടെ 61-ാം ഓർമ്മപ്പെരുന്നാൾ ഉർശ്ലേം അരമന ചാപ്പലിൽ ഭക്തിപൂർവ്വം ആചരിച്ചു

ഹ്യൂസ്റ്റൺ:പാമ്പാടി തിരുമേനിയുടെ 61-ാം ഓർമ്മപ്പെരുന്നാൾ 2026 ഏപ്രിൽ 11-ാം തീയതി (ശനിയാഴ്ച) ഹ്യൂസ്റ്റണിലെ ഉർശ്ലേം അരമന ചാപ്പലിൽ ഭക്ത്യാദരപൂർവ്വം ആചരിച്ചു. രാവിലെ 8 മണിക്ക് പ്രഭാത നമസ്കാരത്തെ തുടർന്ന് നടന്ന വിശുദ്ധ കുർബാനയ്ക്ക് റവ. ഫാ. നിതിൻ വി. രാജൻ നേതൃത്വം നൽകി.

ഈ ഓർമ്മപ്പെരുന്നാൾ പാമ്പാടി തിരുമേനിയുടെ നാമത്തിൽ ഹ്യൂസ്റ്റൺ പ്രദേശത്തെ വിവിധ ഓർത്തഡോക്സ് ദേവാലയങ്ങളിലെ വിശ്വാസികളെ ഒരുമിപ്പിച്ച ആത്മീയ സംഗമമായി മാറി. തിരുമേനിയുടെ ജീവിതം പ്രതിപാദിക്കുന്ന വിനയവും സേവനവും ഈ ഐക്യത്തിൽ പ്രതിഫലിച്ചു.

ഓർമ്മപ്പെരുന്നാളിനോടനുബന്ധിച്ച് പാമ്പാടി തിരുമേനി ഗ്ലോബൽ കമ്മ്യൂണിറ്റിയുടെ നേതൃത്വത്തിൽ പെരുന്നാൾ കമ്മിറ്റി സജീവമായി പ്രവർത്തിച്ചു. അമേരിക്കൻ സൗത്ത് വെസ്റ്റ് ഭദ്രാസന സെക്രട്ടറി റവ. ഫാ. ജോർജ് എസ്. മാത്യൂസ് അധ്യക്ഷനായിരുന്ന കമ്മിറ്റിയിൽ ഫെബിൻ കുറിയാക്കോസ്, അമ്മു കൊച്ചമ്മ, ബിനു കെ. ജോൺ, ബിബി പരയിൽ, റിജോ ജേക്കബ്, ജസ്റ്റിൻ ജോർജ് എന്നിവർ അംഗങ്ങളായി സേവനം അനുഷ്ഠിച്ചു.

നേർച്ചയായി നെയ്യപ്പവും പഴവും വിതരണം ചെയ്തു. വിശ്വാസികളുടെ സഹോദരത്വവും പങ്കിടലും പ്രതിഫലിപ്പിച്ച് പ്രഭാതഭക്ഷണവും എല്ലാവർക്കുമായി ഒരുക്കിയിരുന്നു.

പാമ്പാടി തിരുമേനിയുടെ ആത്മീയ പാത പിന്തുടരാനും, വിശ്വാസത്തിൽ ഐക്യത്തോടെ മുന്നോട്ട് പോകാനും ഈ ഓർമ്മപ്പെരുന്നാൾ വിശ്വാസികൾക്ക് പ്രചോദനമായി.