സിനായ് ഏരിയ പ്രയർ ഗ്രൂപ്പ് ക്രിസ്മസ് – പുതുവത്സര ആഘോഷം; മുതിർന്ന മാതാപിതാക്കളെ ആദരിച്ചു

മാൻവെൽ, ടെക്സസ് : ഇമ്മാനുവേൽ മാർത്തോമ്മാ ചർച്ചിന്റെ അവിഭാജ്യ ഘടകമായ സിനായ് ഏരിയ പ്രയർ ഗ്രൂപ്പിന്റെ ക്രിസ്മസ് – പുതുവത്സര ആഘോഷങ്ങൾ 2026 ജനുവരി 31 ശനിയാഴ്ച മാൻവെലിൽ വെച്ച് സമുചിതമായി നടന്നു. ഇടവക വികാരി റവ. ജോസഫ് ജോൺ, അസിസ്റ്റന്റ് വികാരി റവ. ജോൺ വിൽസൺ എന്നിവരുടെ സാന്നിധ്യം ചടങ്ങിന് ഗാംഭീര്യമേകി. പ്രാർത്ഥന, ഭക്തിഗാനങ്ങൾ, അംഗങ്ങൾ അവതരിപ്പിച്ച വിവിധ കലാപരിപാടികൾ എന്നിവ ആഘോഷങ്ങൾക്ക് മാറ്റുകൂട്ടി.

മാതൃകാപരമായ ആദരിക്കൽ ചടങ്ങ്

ഇടവകയുടെയും പ്രാർത്ഥനാ ഗ്രൂപ്പിന്റെയും നട്ടെല്ലായ 70 വയസ്സിന് മുകളിൽ പ്രായമുള്ള മുതിർന്ന അംഗങ്ങളെ ആദരിക്കുന്ന ചടങ്ങായിരുന്നു പരിപാടിയുടെ പ്രധാന ആകർഷണം. വിശ്വാസജീവിതത്തിലും കുടുംബജീവിതത്തിലും മാതൃകയായി നിലകൊള്ളുന്ന ഇവരുടെ സേവനങ്ങളെ ചടങ്ങിൽ പ്രത്യേകം അനുസ്മരിക്കുകയും പൊന്നാട നൽകി ആദരിക്കുകയും ചെയ്തു.

ആദരിക്കപ്പെട്ട മുതിർന്ന അംഗങ്ങൾ:

രാജൻ ടി. ഐ. & സാറാമ്മ രാജൻ: 57 വർഷത്തെ ദാമ്പത്യ ജീവിതം നയിക്കുന്ന ഇവർ ഇടവകയുടെയും പ്രയർ ഗ്രൂപ്പിന്റെയും സ്ഥാപക അംഗങ്ങളാണ്. ഇവർ തലവടി, പെണ്ണുക്കര സ്വദേശികളാണ്.

മത്തായി പി. കോശി & സോസമ്മ കോശി: 51 വർഷത്തെ വിവാഹജീവിതം പൂർത്തിയാക്കിയ ഇവർ പെണ്ണുക്കര, നിലമ്പൂർ സ്വദേശികളും  സ്ഥാപക അംഗങ്ങളുമാണ്.

തോമസ് വർഗീസ് & അന്നമ്മ വർഗീസ്: റാന്നി, പന്തളം സ്വദേശികളായ ഇവർ 55 വർഷത്തെ ദാമ്പത്യം പൂർത്തിയാക്കിയ സ്ഥാപക അംഗങ്ങളാണ്.

തോമസ് വി. മാത്യു & അച്ചാമ്മ മാത്യു: കീക്കൊഴൂർ, കൊഴുവല്ലൂർ സ്വദേശികളായ ഇവർ കഴിഞ്ഞ 50 വർഷമായി അമേരിക്കയിൽ സജീവ സാന്നിധ്യമായി താമസിച്ചു വരുന്ന സ്ഥാപക അംഗങ്ങളാണ്.

മാത്യു സക്കറിയ & റോസി മാത്യു: 46 വർഷത്തെ ദാമ്പത്യം പൂർത്തിയാക്കിയ ഇവർ കല്ലിശ്ശേരി, കാലിക്കറ്റ് സ്വദേശികളാണ്. കഴിഞ്ഞ 43 വർഷമായി ഇവർ അമേരിക്കയിൽ താമസിക്കുന്നു.

മുല്ലയ്ക്കൽ ജോൺ തോമസ്: കീഴുവായ്പൂർ സ്വദേശിയായ ഇദ്ദേഹം 43 വർഷത്തെ ദാമ്പത്യം പൂർത്തിയാക്കി. 38 വർഷമായി അമേരിക്കയിലുള്ള ഇദ്ദേഹം 34 വർഷം ഫിലാഡൽഫിയയിലായിരുന്നു.

കൂടാതെ അമ്മിണി ഡാനിയേൽ (അടൂർ) , ഏലിയാമ്മ കോശി (കല്ലിശ്ശേരി), പി.സി. മാത്യു (വാളക്കുഴി) , ബ്രിജിത്ത് തോമസ് (മലബാർ)  തുടങ്ങിയ മുതിർന്ന അംഗങ്ങളെയും ചടങ്ങിൽ ആദരിച്ചു. ശാരീരിക ബുദ്ധിമുട്ടുകളാൽ നേരിട്ട് പങ്കെടുക്കാൻ കഴിയാതിരുന്ന ഏലിയാമ്മ ജോർജ്, പി.ഇ. കുരുവിള, അന്നമ്മ തോമസ് എന്നിവരെയും നന്ദിയോടെ സ്മരിക്കുകയും അവർക്കായി പ്രാർത്ഥിക്കുകയും ചെയ്തു.

കൂട്ടായ്മയുടെയും സ്നേഹത്തിന്റെയും പ്രതീകമായി നടന്ന സ്നേഹവിരുന്നോടെ പരിപാടികൾ സമാപിച്ചു. ഈ ആഘോഷം വിജയകരമാക്കാൻ പ്രവർത്തിച്ച എല്ലാ സംഘാടകർക്കും വൊളന്റിയർമാർക്കും പ്രാർത്ഥനാ ഗ്രൂപ്പ് ഭാരവാഹികൾ നന്ദി അറിയിച്ചു.

Report അജു വാരിക്കാട്