കൊച്ചി: കാക്കനാട് പടമുകളില് നാലു പേരെ ആക്രമിച്ച് അപകടകാരിയായ പിറ്റ്ബുള് ഇനത്തില്പെട്ട വളര്ത്തുനായ. പടമുകള് സാറ്റലൈറ്റ് ടൗണ്ഷിപ്പ് ഭാഗത്തു വീട്ടില് വളര്ത്തുന്ന പിറ്റ്ബുള് ഇനത്തില്പെട്ട വളര്ത്തു നായയാണ് നാലുപേരെ കടിച്ചത്. രാത്രി 11ന് ആണ് സംഭവം നടന്നത്
പിറ്റ്ബുള് നായയുള്ള വീടിനു മുന്നിലൂടെ നടന്നു പോവുകയായിരുന്ന അമ്മയെയും ഇരുപതും പത്തു വയസായ രണ്ടു മക്കളെയുമാണ് നായ ആക്രമിച്ചത്. 20 വയസുകാരിയെയാണ് നായ ആദ്യം ആക്രമിച്ചത്. പെണ്കുട്ടിയുടെ വസ്ത്രങ്ങള് ഒക്കെ നായ കടിച്ചു കീറി. ഇതോടെ നായയെ തടയാനായി എത്തിയ അയല്വാസിക്കും കടിയേറ്റു.
നാലുപേരെയും ആശുപത്രിയില് പ്രവേശിപ്പിച്ചു. ഇവരുടെ പരിക്കു ഗുരുതരമല്ല. പടമുകള് സ്വദേശിയായ അനിക് ആണ് നായയുടെ ഉടമസ്ഥന്. ഇയാളെ പോലീസ് കസ്റ്റഡിയില് എടുത്തിട്ടുണ്ട്.
അതേസമയം, കഴിഞ്ഞ ദിവസം കൊച്ചി നഗരത്തില് അലഞ്ഞു നടന്ന പിറ്റ്ബുള് ഇനത്തില്പെട്ട മറ്റൊരു നായയെ സൊസൈറ്റി ഫോര് പ്രിവന്ഷന് ഓഫ് ക്രൂവല്റ്റി ടു അനിമല്സ് – എസ്പിസിഎ സംഘം എത്തി പിടികൂടിയിരുന്നു.
നഗരത്തില് അലഞ്ഞു നടന്ന പിറ്റ് ബുള് നായയുടെ ഉടമയെ കണ്ടെത്തുന്നതിനായി പോലീസ് അന്വേഷണം ആരംഭിച്ചു. തിങ്കളാഴ്ചയാണ് റോഡില് ഉപേക്ഷിക്കപ്പെട്ട പിറ്റ് ബുള് ഇനത്തിലെ നായയെ എറണാകുളം സുഭാഷ് പാര്ക്കില് നിന്ന് പിടികൂടിയത്. അത്യന്തം അപകടകാരിയായ ഇവയ്ക്ക് ഒരു ലക്ഷത്തോളം രൂപ വിലവരും. ആനിമല് റെസ്ക്യൂ സംഘമെത്തിയാണ് നായയെ പിടികൂടിയത്.
നായ രണ്ട് ദിവസമായി പ്രദേശത്ത് കറങ്ങി നടക്കുകയായിരുന്നു. സുഭാഷ് പാര്ക്കില് എത്തിപ്പെട്ട നായയെ കണ്ട് ആളുകള് ഭയന്നതോടെ പാര്ക്ക് അധികൃതര് പോലീസില് വിവരമറിയിക്കുകയായിരുന്നു.
മനുഷ്യജീവന് അപകടകാരികളെന്ന റിപ്പോര്ട്ടിനെ തുടര്ന്ന് കേന്ദ്ര സര്ക്കാര് ഇറക്കുമതിയും വില്പനയും പ്രജനനവും നിരോധിക്കണമെന്ന് സംസ്ഥാനങ്ങളോട് ആവശ്യപ്പെട്ട ഇനമാണ് പിറ്റ് ബുള്.
സംഭവത്തില് നിലവില് കേസ് എടുത്തിട്ടില്ലെന്ന് എറണാകുളം സെന്ട്രല് പോലീസ് അറിയിച്ചു. നായയെ ഉപേക്ഷിച്ചയാളെ കണ്ടെത്താന് പ്രദേശത്തെ സിസിടിവി ദൃശ്യങ്ങളടക്കം പരിശോധിക്കുന്നുണ്ടെന്നും പോലീസ് പറഞ്ഞു.
Leave a comment