ഹൈദരാബാദ്: അർജൻ്റീനിയൻ ഫുട്ബോൾ ഇതിഹാസം ലയണൽ മെസ്സിക്കൊപ്പം വേദി പങ്കിട്ട് രാഹുൽ ഗാന്ധി. 2025ലെ GOAT ഇന്ത്യ ടൂറിൻ്റെ ഭാഗമായി ഹൈദരാബാദിലെത്തിയപ്പോഴാണ് മെസ്സിയെ രാഹുൽ ഗാന്ധി കണ്ടുമുട്ടിയത്. കൂടിക്കാഴ്ചയുടെ ചിത്രങ്ങളും വീഡിയോകളും രാഹുൽ ഗാന്ധി തന്റെ ഔദ്യോഗിക സോഷ്യൽ മീഡിയ അക്കൗണ്ടുകളിലൂടെ പങ്കുവെച്ചു.
“വിവ ഫുട്ബോൾ വിത്ത് ദി GOAT @leomessi” എന്ന അടിക്കുറിപ്പോടെയാണ് രാഹുൽ ഗാന്ധി റീലും ചിത്രങ്ങളും പോസ്റ്റ് ചെയ്തത്. GOAT ഇന്ത്യ ടൂറിൻ്റെ ഭാഗമായി മെസ്സിയുടെ പരിപാടിയിൽ പങ്കെടുക്കാനാണ് രാഹുൽ ശനിയാഴ്ച ഉച്ചയോടെ ഹൈദരാബാദിലെത്തിയത്.
മെസ്സിയുടെയും ലൂയിസ് സുവാരസ്, റോഡ്രിഗോ ഡി പോൾ എന്നിവർക്കും ഒപ്പമുള്ള ചിത്രങ്ങൾ അദ്ദേഹം ഇൻസ്റ്റാഗ്രാമിൽ പങ്കുവെച്ചിരുന്നു. ദ ബ്യൂട്ടിഫുൾ ഗെയിം എന്നാണ് ഇതിന് രാഹുൽ ഗാന്ധി നൽകിയ അടിക്കുറിപ്പ്.
കൊൽക്കത്തയിലെ ആശയക്കുഴപ്പങ്ങൾക്ക് ശേഷം ശനിയാഴ്ച ഉച്ചയോടെയാണ് മെസ്സി ഹൈദരാബാദിലെത്തിയത്. അദ്ദേഹത്തെ താജ് ഫലക്നുമ പാലസിൽ വെച്ച് തെലങ്കാന മുഖ്യമന്ത്രി റെഡ്ഡി സ്വീകരിച്ചു. ലോകകപ്പ് നേടിയ അർജൻ്റീനിയൻ നായകനെ സ്റ്റേഡിയത്തിൽ കാണികൾ ഉജ്ജ്വലമായ കരഘോഷത്തോടെയാണ് വരവേറ്റത്.
“നിങ്ങൾ കാണിച്ച സ്നേഹത്തിനും വാത്സല്യത്തിനും നടുവിൽ ഹൈദരാബാദിലെത്താൻ കഴിഞ്ഞതിൽ ഞാൻ വളരെ സന്തോഷവാനാണ്,” മെസ്സി ഒരു വിവർത്തകനിലൂടെ കാണികളോട് പറഞ്ഞു. മെസ്സിയും ഇൻ്റർ മിയാമിയുടെ സഹതാരങ്ങളായ ലൂയിസ് സുവാരസും റോഡ്രിഗോ ഡി പോളും GOAT കപ്പ് പെനാൽറ്റി ഷൂട്ടൗട്ടിൽ പങ്കെടുത്തു.
