ഇന്ത്യയിൽ ഒന്നരലക്ഷം കോടിയുടെ നിക്ഷേപത്തിനൊരുങ്ങി മൈക്രോസോഫ്റ്റ്, ഏഷ്യയിലെ ഏറ്റവും വലിയ നിക്ഷേപം

ന്യൂഡൽഹി: നിർമിത ബുദ്ധി വികസനത്തിനായി ഇന്ത്യയിൽ ഒന്നര ലക്ഷം കോടി രൂപയുടെ നിക്ഷേപം നടത്താനൊരുങ്ങി മൈക്രോസോഫ്റ്റ്. മൈക്രോസോഫ്റ്റ് സിഇഒ സത്യ നദെല്ല പ്രധാനമന്ത്രി നരേന്ദ്ര മോദിയുമായി നടത്തിയ കൂടിക്കാഴ്ചയിലാണ് തീരുമാനം. ഏഷ്യയിൽ മൈക്രോസോഫ്റ്റ് നടത്തുന്ന ഏറ്റവും വലിയ നിക്ഷേപമായിരിക്കും ഇത്.

‘ഇന്ത്യയിൽ നിർമിത ബുദ്ധിക്കുള്ള അവസരങ്ങളെക്കുറിച്ചുള്ള സംഭാഷണത്തിന് പ്രധാനമന്ത്രിക്ക് നന്ദി. ഇന്ത്യയുടെ ഐഐ ഭാവിക്കുവേണ്ടിയുള്ള അടിസ്ഥാന സൗകര്യങ്ങളും നൈപുണിയും കഴിവുകളും വികസിപ്പിക്കുന്നതിനായി 17.5 ബില്യൻ !ഡോളറിന്റെ നിക്ഷേപം മൈക്രോസോഫ്റ്റ് നടത്തും. ഏഷ്യയിൽ മൈക്രോസോഫ്റ്റ് നടത്തുന്ന ഏറ്റവും വലിയ നിക്ഷേപമാണിത്’–സത്യ നദെല്ല പറഞ്ഞു.

എഐയുടെ കാര്യത്തിൽ ലോകത്തിന് ഇന്ത്യയെക്കുറിച്ച് ശുഭപ്രതീക്ഷയാണുള്ളതെന്ന് പ്രധാനമന്ത്രി നരേന്ദ്ര മോദി പറഞ്ഞു. ‘സത്യ നദെല്ലയുമായി വളരെ ഫലപ്രദമായ ചർച്ച നടത്തി. ഏഷ്യയിലെ ഏറ്റവും വലിയ നിക്ഷേപം നടത്താൻ മൈക്രോസോഫ്റ്റ് ഇന്ത്യയെ തിരഞ്ഞെടുത്തതിൽ സന്തോഷമുണ്ട്. മെച്ചപ്പെട്ട ലോകത്തിനുവേണ്ടി എഐയുടെ ശക്തി ഉപയോഗപ്പെടുത്താൻ ഇന്ത്യയിലെ യുവാക്കൾ ഈ അവസരം വിനിയോഗിക്കണം’–പ്രധാനമന്ത്രി പറഞ്ഞു.