ഓക്ലൻഡ്: സിഖ് സമൂഹത്തിൻ്റെ വാർഷിക കായികമേളയ്ക്കും സാംസ്കാരിക ആഘോഷങ്ങൾക്കും ആവേശം പകർന്ന് ന്യൂസിലാൻഡ് പ്രധാനമന്ത്രി ക്രിസ്റ്റഫർ ലക്സൺ. ഓക്ലൻഡിൽ നടന്ന പരിപാടിയിൽ പങ്കെടുത്ത അദ്ദേഹം സിഖുകാരുടെ കായിക വിനോദങ്ങളിൽ മാത്രമല്ല, പരമ്പരാഗത ഭക്ഷണം പാകം ചെയ്യുന്ന കാര്യങ്ങളിലും താൽപര്യം പ്രകടിപ്പിച്ചു. ഇതിൽ ഏറ്റവും ശ്രദ്ധേയമായത് അദ്ദേഹം ജിലേബി ഉണ്ടാക്കാൻ ശ്രമിച്ച രംഗമായിരുന്നു. തകാനികി എം പി റിമ നാഖ്ലെയ്ക്കൊപ്പമാണ് ലക്സൺ പരിപാടിയിൽ പങ്കെടുത്തത്.
കായിക താരങ്ങളെ കണ്ട് ഉദ്ഘാടന ചടങ്ങിൽ പങ്കെടുത്ത ശേഷമാണ് പ്രധാനമന്ത്രി അടുക്കളയിലേക്ക് കടന്നത്. വലിയൊരു ചീനച്ചട്ടിക്ക് പിന്നിൽനിന്ന് ചൂടുള്ള എണ്ണയിലേക്ക് മാവൊഴിച്ച് അദ്ദേഹം ജിലേബി ഉണ്ടാക്കി. ഇത് കണ്ട് ആർപ്പുവിളിച്ച സിഖുകാർ മൊബൈൽ ഫോണുകളിൽ ദൃശ്യങ്ങൾ പകർത്തി.
ജിലേബി ഉണ്ടാക്കുന്നതിൻ്റെ വീഡിയോ ക്രിസ്റ്റഫർ ലക്സൺ തൻ്റെ ഇൻസ്റ്റാഗ്രാം പേജിൽ പങ്കുവെച്ചു. മത്സരിക്കുന്ന എല്ലാവർക്കും, താൻ ഉണ്ടാക്കിയ ജിലേബി കഴിച്ചവർക്കും അദ്ദേഹം ആശംസകൾ നേരുകയും ചെയ്തു. പ്രധാനമന്ത്രിയുടെ ഈ പാചക വീഡിയോ സോഷ്യൽ മീഡിയയിൽ തരംഗമാവുകയാണ്. “ഇതുവരെ കണ്ടതിൽ വെച്ച് ഏറ്റവും കൂളായ പ്രധാനമന്ത്രി” എന്നിങ്ങനെയുള്ള നിരവധി കമൻ്റുകളാണ് വീഡിയോക്ക് ലഭിക്കുന്നത്.
കബഡി, ക്രിക്കറ്റ്, വോളിബോൾ, ബാസ്ക്കറ്റ്ബോൾ, ഹോക്കി തുടങ്ങി നിരവധി കായിക മത്സരങ്ങൾ നടന്ന ചടങ്ങിൽ, സിഖ് പാരമ്പര്യ കലകളായ ഗട്ക (മാർഷ്യൽ ആർട്സ്), തലപ്പാവ് കെട്ടൽ മത്സരം, ഭാങ്ഗ്ര നൃത്തം എന്നിവയുമുണ്ടായിരുന്നു.
Leave a comment