ഫ്ലോറിഡ: ആകാശത്ത് വിസ്മയം തീർത്ത് 20 രാജ്യങ്ങളിൽ നിന്നുള്ള 104 സ്കൈ ഡൈവർമാർ. ഫ്ലോറിഡയിലെ ലേക്ക് വെയിൽസിന് മുകളിൽ ആകാശത്ത് പട്ടം പോലെ കൂട്ടമായി പറന്നാണ് സാഹസികർ ചരിത്രം കുറിച്ചത്. ഒരേസമയം പാരച്യൂട്ടുകൾ വിടർത്തി വായുവിൽ കൂറ്റൻ രൂപം (കനോപ്പി ഫോർമേഷൻ) ഉണ്ടാക്കിയാണ് വിസ്മയ പ്രകടനം നടത്തിയത്. നവംബർ 22-നായിരുന്നു സംഭവം. പ്രകടനത്തിന്റെ വീഡിയോ സാമൂഹ്യമാദ്ധ്യമങ്ങളിൽ വൈറലാണ്.
നക്ഷത്രത്തിന്റെ രൂപത്തലാണ് ഡൈവർമാർ അണിനിരന്നത്. ഇത്രയധികം പേർ ചേർന്ന് രൂപംകൊടുത്ത ലോകത്തിലെ ഏറ്റവും വലിയ രൂപമാണിത്. പെർഫോമൻസ് ഡിസൈൻസ് എന്ന ഇൻസ്റ്റാഗ്രാം പേജിലൂടെയാണ് ദൃശ്യങ്ങൾ പുറത്തുവിട്ടത്. ലോജിസ്റ്റിക് പിന്തുണ, എയർ ട്രാഫിക് കൺട്രോൾ (എടിസി) സെന്ററുകളുമായുള്ള ഏകോപനം എന്നിവ ലഭിച്ചതോടെയാണ് കൗതുകകരമായ ഫോർമേഷൻ ഉണ്ടായത്.
‘ഇതുപോലൊരു പരിപാടി നടക്കുമ്പോൾ, സത്യത്തിൽ അതൊരു യാത്ര പോലെയാണ്. ഒരുപാടുപേരുടെ ജീവിത രീതി, ഭക്ഷണം ക്രമം, വ്യായാമം, ഉറക്കം എല്ലാം മാറി. കഴിഞ്ഞ പത്തോ ഇരുപതോ വർഷത്തിനിടയിൽ ഉണ്ടായിരുന്നതിനേക്കാൾ നല്ല ആരോഗ്യം അവർ വീണ്ടെടുത്തു. അത് തന്നെയാണ് ഈ പരിപാടിയുടെ ഏറ്റവും വലിയ നേട്ടവും’. സംഘാടകരിൽ ഒരാളായ ക്രിസ് ഗേ വ്യക്തമാക്കി. 2007-ലാണ് സമാനമായ സാഹസിക പ്രകടനം ഇതിനുമുമ്പ് നടന്നത്. അന്ന് 100 സ്കൈ ഡൈവർമാരായിരുന്നു വായുവിൽ രൂപം തീർത്തത്.
