മൂന്നാർ: ഇടുക്കിയിലെ സ്കൈ ഡൈനിങ്ങിൽ വിനോദസഞ്ചാരികൾ കുടുങ്ങിയ സംഭവത്തിൽ നടത്തിപ്പുകാർക്കെതിരെ പോലീസ് കേസ് എടുത്തു. പ്രവീൺ മോഹൻ, സോജൻ ജോസഫ് എന്നിവർക്കെതിരെയാണ് കേസ് എടുത്തിരിക്കുന്നത്. മൂന്നാറിനടുത്ത് ആനച്ചാലിൽ പ്രവർത്തിക്കുന്ന സാഹസിക വിനോദസഞ്ചാര കേന്ദ്രമായ സതേൺ സ്കൈ ഡൈനിങ്ങിലായിരുന്നു സംഭവം.
വെള്ളിയാഴ്ച ഒരുമണിയോടെ മൂന്നാറിന്റെ ആകാശക്കാഴ്ചകൾകണ്ട് ആഹാരം കഴിക്കാൻ ക്രെയിനിൽ 120 അടി ഉയരത്തിൽ ഘടിപ്പിച്ച പ്ലാറ്റ്ഫോമിൽ കയറി ഭക്ഷണശേഷം താഴെയിറങ്ങാൻ നോക്കുമ്പോഴാണ് കുട്ടികളടക്കമുള്ള കുടുംബം കുടുങ്ങിപ്പോയത്. തൂങ്ങിയാടുന്ന പ്ലാറ്റ്ഫോം പൊട്ടി വീണാലോ എന്ന ഭീതി അകത്തുംപുറത്തുമുണ്ടായിരുന്നു. മംഗളൂരുവിൽ താമസിക്കുന്ന കണ്ണൂർ സ്വദേശികളായ മുഹമ്മദ് സഫ്വാൻ, ഭാര്യ തൗഫിന, മക്കളായ ഇവാൻ, ഇനാര എന്നിവരും സ്ഥാപനത്തിലെ ജീവനക്കാരി ഹരിപ്രിയയുമാണ് സ്കൈ ഡൈനിങ്ങിൽ കുടുങ്ങിയത്.
ഹൈഡ്രോളിക് ലിവർ തകരാറിലായി ക്രെയിൻ നിശ്ചലമായത്. സാഹസിക ടൂറിസത്തിൽ പരിശീലനം ലഭിച്ച സ്ഥാപനത്തിലെ അച്ചു എന്ന യുവാവ് ഭക്ഷണം മുകളിലെത്തിക്കാൻ ഉപയോഗിക്കുന്ന ചെറിയ കയറിലൂടെ വലിയ വടം മുകളിലെത്തിച്ചു. വാക്കിടോക്കിയിലൂടെയുള്ള നിർദേശമനുസരിച്ച് ഹരിപ്രിയയാണ് വടം വലിച്ചുകയറ്റിയത്. അതിലൂടെത്തന്നെ കപ്പിയും മുകളിലെത്തിച്ച് കാബിനിൽ ഘടിപ്പിച്ചു. ഈ സമയം മൂന്നാർ, അടിമാലി എന്നിവിടങ്ങളിൽനിന്ന് അഗ്നിരക്ഷാസേനയെത്തി. അസിസ്റ്റന്റ് സ്റ്റേഷൻ ഓഫീസർ ടി. അജയകുമാർ ഞൊടിയിടയിൽ മുകളിലെത്തി കുടുംബത്തിന് ധൈര്യം നൽകി. വടം ശരീരത്തിൽ ബന്ധിപ്പിച്ച് തൗഫിനയെ ആദ്യം താഴെയിറക്കി. പിന്നെ രണ്ടുവയസ്സുകാരി ഇനാരയെയും ഏഴുവയസ്സുകാരൻ ഇവാനെയും നെഞ്ചോട് ചേർത്ത് അജയകുമാർ രണ്ടുവട്ടം വീണ്ടുംതാഴേക്കും മുകളിലേക്കും. ഒടുവിൽ മുഹമ്മദ് സഫാനും, ഹരിപ്രിയയും സുരക്ഷിതരായി ലാൻഡ് ചെയ്തു. മുൻകരുതലെന്നോണം താഴെ വലവിരിച്ച് മറ്റ് അഗ്നിരക്ഷാസേനാംഗങ്ങളും കാത്തിരിക്കുന്നുണ്ടായിരുന്നു.
Leave a comment