റൗണ്ട് റോക്ക്, ടെക്സസ് : രണ്ട് യുവതികളെ നിർബന്ധിത അനാശാസ്യപ്രവർത്തനത്തിനായി ഹൂസ്റ്റണിൽ നിന്ന് റൗണ്ട് റോക്കിലേക്ക് കൊണ്ടുവന്ന കേസിൽ ഒരാൾ അറസ്റ്റിലായി. നവംബർ 26ന് റൗണ്ട് റോക്കിലെ ഒരു വീട്ടിൽ മനുഷ്യക്കടത്തിന് സാധ്യതയുണ്ടെന്ന് പൊലീസിന് രഹസ്യവിവരം ലഭിച്ചു. ഒരു ബന്ധുവിനെ നിർബന്ധിച്ച് ലൈംഗികവൃത്തിയിൽ ഏർപ്പെടുത്തുകയാണെന്നും പുറത്തുപോകാൻ അനുവദിക്കുന്നില്ലെന്നും കോൾ ചെയ്തയാൾ പൊലീസിനെ അറിയിച്ചു.
സ്ഥലത്തെത്തിയ പൊലീസ് 39 വയസ്സുള്ള ബ്രാൻഡൻ വില്യംസിനെയും ഹൂസ്റ്റൺ സ്വദേശികളായ 20 വയസ്സുള്ള രണ്ട് യുവതികളെയും കണ്ടെത്തി. അനാശാസ്യപ്രവർത്തനത്തിനായി വില്യംസ് തങ്ങളെ ഹൂസ്റ്റണിൽ നിന്ന് കൊണ്ടുവന്നതാണെന്നും പോകാൻ അനുവദിക്കുന്നില്ലെന്നും യുവതികളിൽ ഒരാൾ പൊലീസിനോട് പറഞ്ഞു. വില്യംസിന്റെ കൈവശം തോക്കും കണ്ടെത്തി.
നിർബന്ധിത വേശ്യാവൃത്തി (Compelling Prostitution) ചുമത്തി വില്യംസിനെ പൊലീസ് അറസ്റ്റ് ചെയ്തു. രക്ഷപ്പെടുത്തിയ യുവതികൾക്ക് ആവശ്യമായ പിന്തുണയും സഹായങ്ങളും പൊലീസ് നൽകി വരുന്നു.
