സാൻ ഡീഗോ: സാൻ ഡീഗോ മൃഗശാലയിലെത്തുന്നവരെ സ്വീകരിക്കാൻ ഇനി ‘ഗ്രാമ’ ഇല്ല. ഒരു നൂറ്റാണ്ടിലധികം മൃഗശാലയിലെത്തുന്നവരെ സന്തോഷിപ്പിച്ച ‘ഗ്രാമ’ ഇനിയില്ലെന്ന വിവരം ഈ മാസം 20നാണ് മൃഗശാല അധികൃതർ സമൂഹമാധ്യമത്തിലൂടെ അറിയിച്ചത്. ഏകദേശം 141 വയസ്സുണ്ടായിരുന്നു ഗ്രാമയ്ക്ക്. പ്രായധിക്യം മൂലം അസ്ഥിരോഗം അലട്ടിയിരുന്നു. രോഗം ഗുരുതരമായതിനെത്തുടർന്ന് അധികൃതർ ഗ്രാമയ്ക്ക് ദയാവധം നൽകുകയായിരുന്നു എന്നാണ് റിപ്പോർട്ട്.
1928 – 1931 കാലഘട്ടത്തിൽ ഗലാപ്പഗോസ് ദ്വീപുകളിൽ നിന്ന് ബ്രോങ്ക്സ് മൃഗശാലയിൽ എത്തിച്ച ആമകളുടെ ആദ്യ ഗ്രൂപ്പിൽ ഉൾപ്പെട്ടതാണ് ഗ്രാമ. ‘മൃഗശാലയുടെ രാജ്ഞി’ എന്നറിയപ്പെട്ടിരുന്ന ഗ്രാമയെ കാണാൻ വേണ്ടി മാത്രം ഒട്ടറെപ്പേർ മൃഗശാലയിൽ എത്തിയിരുന്നു.
ഗലാപ്പഗോസ് ആമകൾക്ക് ശരാശരി 100 വർഷത്തിലേറെ ആയുസ്സുണ്ട്. 550 പൗണ്ടിലധികം ഭാരം വയ്ക്കുന്ന ഇവ വംശനാശഭീഷണിയിലാണ്. ഓസ്ട്രേലിയൻ മൃഗശാലയിൽ 175 വയസ്സുവരെ ജീവിച്ചിരുന്ന ‘ഹാരിയറ്റ്’ എന്ന ഗലാപ്പഗോസ് ആമയാണ് ഏറ്റവും കൂടുതൽ കാലം ജീവിച്ചതെന്ന് പറയപ്പെടുന്നു.
Leave a comment