ആൻഡ്രോയിഡ് ഉപയോക്താക്കൾക്ക് കുറച്ചുകാലമായി ലഭ്യമായിരുന്ന ഫീച്ചർ ഒടുവിൽ ഐഫോൺ ഉപയോക്താക്കൾക്കും ലഭ്യമാക്കാൻ ഒരുങ്ങി മെറ്റ. ഒരേ ഉപകരണത്തിൽ രണ്ട് വ്യത്യസ്ത വാട്ട്സ്ആപ്പ് അക്കൗണ്ടുകളിലേക്ക് ലോഗിൻ ചെയ്യാൻ ഐഫോൺ ഉപയോക്താക്കളെ അനുവദിക്കുന്ന ഈ ഫീച്ചർ ഐ ഒ എസിൻ്റെ ഏറ്റവും പുതിയ ബീറ്റാ വേർഷനിൽ ലഭ്യമായിക്കഴിഞ്ഞു. വൈകാതെ എല്ലാ ഐഫോൺ ഉപയോക്താക്കൾക്കും ഈ സൗകര്യം ലഭ്യമാകും. ഇതോടെ, രണ്ടാമത്തെ ഫോൺ ആവശ്യമില്ലാതെയോ വാട്ട്സ്ആപ്പ് ബിസിനസ് പോലുള്ള പ്രത്യേക ആപ്ലിക്കേഷനുകളെ ആശ്രയിക്കാതെയോ വ്യത്യസ്ത നമ്പറിലുള്ള രണ്ട് വാട്ട്സ്ആപ്പ് അക്കൗണ്ടുകൾ ഉപയോഗിക്കാൻ സാധിക്കും.
ഐഫോണുകളിലെ വാട്ട്സ്ആപ്പ് സെറ്റിങ്സിൽ ‘അക്കൗണ്ട് ലിസ്റ്റ്’ (Account List) എന്നൊരു പുതിയ ഓപ്ഷൻ പ്രത്യക്ഷപ്പെടും. ഇതിന് പുറമെ, ക്യൂ ആർ കോഡ് ഐക്കണിന് അടുത്തായി ഒരു ‘+’ ബട്ടണും കാണാൻ കഴിയും. ഈ ബട്ടൺ ഉപയോഗിച്ച് ഉപയോക്താക്കൾക്ക് രണ്ടാമതൊരു വാട്ട്സ്ആപ്പ് അക്കൗണ്ട് ക്രിയേറ്റ് ചെയ്യാം.
ഇത് ഒരു ഐഫോണിൽ രണ്ട് വാട്ട്സ്ആപ്പ് നമ്പറുകൾ ഉപയോഗിക്കുന്നതും ഈ അക്കൗണ്ടുകൾ പരസ്പരം സ്വിച്ച് ചെയ്യുന്നതും എളുപ്പമാക്കുന്നു.
വാട്ട്സ്ആപ്പിലെ ഓരോ അക്കൗണ്ടിനും അതിൻ്റേതായ ചാറ്റ് ഹിസ്റ്ററി, ബാക്കപ്പുകൾ, പ്രൈവസി സെറ്റിങ്സുകൾ എന്നിവ ഉണ്ടായിരിക്കും. ഇത് രണ്ട് അക്കൗണ്ടുകളുടെയും സ്വകാര്യത ഉറപ്പാക്കുന്നു. വാട്ട്സ്ആപ്പിലേക്ക് ഒരു സന്ദേശം വരുമ്പോൾ, അത് ഏത് അക്കൗണ്ടിലേക്കാണെന്ന് നോട്ടിഫിക്കേഷനിൽ പ്രത്യേകമായി സൂചിപ്പിക്കും.
