മനുഷ്യായുസ് 150 വർഷം വരെ നീട്ടാം: ‘വാർദ്ധക്യ കോശങ്ങളെ’ ലക്ഷ്യമിട്ട് ഗുളിക കണ്ടെത്തിയതായി ചൈനീസ് ശാസ്ത്രജ്ഞർ

ബീജിംഗ്: മനുഷ്യൻ്റെ ആയുസ്സ് വർദ്ധിപ്പിക്കാനുള്ള പരീക്ഷണങ്ങൾക്ക് ഒരു നിർണായക വഴിത്തിരിവായി, 150 വർഷം വരെ ജീവിക്കാൻ സഹായിക്കുന്ന ഗുളിക കണ്ടെത്തിയതായി ചൈനീസ് ശാസ്ത്രജ്ഞർ അവകാശപ്പെടുന്നു. ചൈനയിലെ ഷെൻഷെൻ ആസ്ഥാനമായുള്ള ലോൺവി ബയോസയൻസസ് (Longevity Biosciences) എന്ന ബയോടെക്‌നോളജി കമ്പനിയാണ് ഈ പുതിയ കണ്ടുപിടിത്തത്തിന് പിന്നിൽ.

നിലവിൽ മനുഷ്യൻ്റെ ശരാശരി ആയുസ്സ് 65-നും 75-നും ഇടയിലാണ്. ഈ പരിധി മറികടന്ന് 150 വർഷം വരെ ആയുസ്സ് വർദ്ധിപ്പിക്കാൻ പുതിയ മരുന്നിന് കഴിയുമെന്നാണ് ശാസ്ത്രജ്ഞരുടെ പ്രതീക്ഷ. വാർദ്ധക്യത്തിൻ്റെ പ്രധാന കാരണങ്ങളിലൊന്നായി കണക്കാക്കപ്പെടുന്ന ‘വാർദ്ധക്യ കോശങ്ങളെ’ അഥവാ ‘സോംബി കോശങ്ങളെ’ ലക്ഷ്യമിട്ടാണ് ഈ ഗുളിക പ്രവർത്തിക്കുന്നത്. ഇത് കഴിക്കുന്നതിലൂടെ വാർദ്ധക്യം മന്ദഗതിയിലാക്കാനും അതുവഴി ആയുസ്സ് കൂട്ടാനും സാധിക്കും. മുന്തിരി വിത്തിലെ ‘പ്രോസയാനിഡിൻ സി1’ (Procyanidin C1) എന്ന തന്മാത്രയാണ് ഗുളികയുടെ പ്രധാന ഘടകം.

പരിശോധനകളും വെല്ലുവിളികളും

എലികളിൽ നടത്തിയ പ്രാഥമിക പരീക്ഷണങ്ങളിൽ, ഇപ്പോൾ കണ്ടെത്തിയ ഗുളിക അവയുടെ ആയുസ്സ് വർദ്ധിപ്പിക്കാൻ കാരണമായെന്നാണ് റിപ്പോർട്ടുകൾ സൂചിപ്പിക്കുന്നത്. “150 വർഷം വരെ ജീവിക്കാൻ കഴിയുന്നത് സാധ്യമായ കാര്യമാണ്. ഏതാനും വർഷങ്ങൾക്കുള്ളിൽ അത് പ്രാവർത്തികമാക്കാൻ കഴിയും,” കമ്പനിയുടെ ചീഫ് ടെക്‌നോളജി ഓഫീസർ ലിയു ക്വിൻഹുവ പറഞ്ഞു.

എങ്കിലും, എലികളിൽ നടത്തിയ പഠനങ്ങൾ പ്രാഥമിക തലത്തിൽ മാത്രമുള്ളതാണ്. ഗുളികയുടെ സുരക്ഷയെക്കുറിച്ചും മനുഷ്യരിൽ എങ്ങനെ പ്രവർത്തിക്കുമെന്നും ഇനിയും വിശദമായ പരീക്ഷണങ്ങൾ നടത്തേണ്ടതുണ്ടെന്നാണ് വിദഗ്ദ്ധർ അഭിപ്രായപ്പെടുന്നത്.