ഷിക്കാഗോ: മെത്രാഭിഷേകത്തിന്റെ രജത ജൂബിലി നിറവിൽ നിൽക്കുന്ന സെന്റ് തോമസ് സിറോ മലബാർ രൂപതയുടെ മുൻ അധ്യക്ഷൻ ബിഷപ് മാർ ജേക്കബ് അങ്ങാടിയത്തിന് ചെറുപുഷ്പ മിഷൻ ലീഗ് രൂപത സമിതി ആദരവുകൾ അർപ്പിച്ചു. രൂപതാ വാർഷികത്തോടനുബന്ധിച്ചാണ് ഷിക്കാഗോ സെന്റ് തോമസ് രൂപതയുടെ മിഷൻ ലീഗ് കൂട്ടായ്മ സ്നേഹാദരവ് സമർപ്പിച്ചത്.
ബിഷപ് മാർ ജോയ് ആലപ്പാട്ടും മിഷൻ ലീഗ് രൂപതാ ഭാരവാഹികളും ചേർന്ന് മാർ ജേക്കബ് അങ്ങാടിയത്തിനെ പൊന്നാട അണിയിച്ചു. മിഷൻ ലീഗ് രൂപതാ പ്രസിഡന്റ് സിജോയ് പറപ്പള്ളിൽ പൂച്ചെണ്ട് നൽകി മിഷൻ ലീഗ് കുടുംബത്തിന്റെ സ്നേഹവും ആദരവും അറിയിച്ചു.
ആദരവ് അർപ്പിക്കൽ ചടങ്ങിൽ മിഷൻ ലീഗ് രൂപതാ ഡയറക്ടർ റവ. ഡോ. ജോർജ് ദാനവേലിൽ, രൂപതാ ജനറൽ സെക്രട്ടറി ടിസൺ തോമസ്, ജോയിന്റ് ഡയറക്ടർ സിസ്റ്റർ ആഗ്നസ് മരിയാ എം.എസ്.എം.ഐ., അസിസ്റ്റന്റ് ഡയറക്ടർ ഫാ. ബിൻസ് ചേത്തലിൽ, എക്സിക്യൂട്ടീവ് അംഗം ആൻ ടോമി എന്നിവർ സന്നിഹിതരായിരുന്നു.
