ചരിത്രമായി ‘യുഎസ് പെനി ; അമേരിക്കയുടെ ഒരു സെന്റ് നാണയം ഇനി ഓർമ

വാഷിങ്ടൻ : അമേരിക്കൻ സാമ്പത്തിക ലോകത്ത് വലിയ ചലനങ്ങൾ സൃഷ്ടിച്ചുകൊണ്ട്, യുഎസ് മിന്റ് ഔദ്യോഗികമായി അവസാനത്തെ ഒരു സെന്റ് നാണയം (പെനി) നിർമിച്ചു. ട്രംപ് ഭരണകൂടം ആറ് മാസം മുമ്പ് പ്രഖ്യാപിച്ച തീരുമാനമാണ് ഇതോടെ നടപ്പിലായത് ഒരു പെനി നിർമിക്കാൻ അതിന്റെ മൂല്യത്തിന്റെ ഏകദേശം നാല് ഇരട്ടിയോളം ചെലവ് വരുന്നതിനാലാണ് ഈ ചരിത്രപരമായ നടപടി.

ഒരു നൂറ്റാണ്ടിലേറെയായി അമേരിക്കൻ പൗരന്മാരുടെ പോക്കറ്റുകളിൽ ഇടം നേടിയിരുന്ന ‘പെനി’യുടെ യുഗമാണ് ഇതോടെ അവസാനിക്കുന്നത്. സാമ്പത്തികശാസ്ത്രജ്ഞരും വിദഗ്ധരും ദീർഘകാലമായി ആവശ്യപ്പെട്ടുകൊണ്ടിരുന്ന പരിഷ്‌കാരമാണിത്.

ഒരു സെന്റ് നാണയം നിർമിക്കാൻ നിലവിൽ ഏകദേശം 3.69 സെന്റ് (ഏകദേശം നാല് ഇരട്ടി) ചെലവ് വരുമെന്നാണ് ട്രഷറി വകുപ്പ് വ്യക്തമാക്കുന്നത്. ചെലവ് കൂടിയ ലോഹങ്ങളുടെ ഉപയോഗവും ഉൽപാദനച്ചെലവിലെ വർധനവുമാണ് ഈ ഭീമമായ നഷ്ടത്തിന് കാരണം. ഓരോ വർഷവും രാജ്യത്തിന് കോടിക്കണക്കിന് ഡോളറിന്റെ നഷ്ടമാണ് പെനി വരുത്തിയിരുന്നത്.

പ്രസിഡന്റ് ഡോണൾഡ് ട്രംപ് ഈ വർഷം ഫെബ്രുവരിയിൽ തന്നെ, നികുതിദായകരുടെ പണം പാഴാക്കുന്ന ഈ നടപടി അവസാനിപ്പിക്കാൻ നിർദേശം നൽകിയിരുന്നു. ഇത് വഴി പ്രതിവർഷം ഏകദേശം 56 മില്യൻ ഡോളറിന്റെ ലാഭം പ്രതീക്ഷിക്കുന്നതായി അധികൃതർ അറിയിച്ചു.

പുതിയ പെനി നാണയങ്ങൾ ഉണ്ടാക്കുന്നത് നിർത്തിയെങ്കിലും, നിലവിലുള്ള നാണയങ്ങൾ തുടർന്നും നിയമപരമായ പണമായി ഉപയോഗിക്കാൻ സാധിക്കും. എന്നാൽ, പുതിയ നാണയങ്ങൾ ഇല്ലാത്തതിനാൽ, അടുത്ത ഏതാനും വർഷങ്ങൾക്കുള്ളിൽ ഇത് പൂർണമായും വിനിമയത്തിൽ നിന്ന് അപ്രത്യക്ഷമായേക്കും.

ട്രഷറി വകുപ്പിന്റെ ഈ തീരുമാനം, അമേരിക്കയുടെ നാണയ ചരിത്രത്തിലെ സുപ്രധാനമായ ഒരു വഴിത്തിരിവാണ്. വില കുറഞ്ഞ നാണയങ്ങൾ ഉൽപാദിപ്പിക്കുന്നത് മൂലമുള്ള നഷ്ടം ഇല്ലാതാക്കാനും, നാണയങ്ങളുടെ വിനിമയശേഷി വർധിപ്പിക്കാനുമുള്ള വലിയൊരു നീക്കമായി ഇതിനെ വിലയിരുത്തുന്നു. ഇനി മുതൽ, ചില്ലറ ഇടപാടുകൾ അടുത്തുള്ള അഞ്ച് സെന്റിലേക്ക് (നിക്കൽ) റൗണ്ട് ചെയ്യപ്പെടാനാണ് സാധ്യത

Report ജയിംസ് വർഗീസ്