ഫ്‌ലൈറ്റ് ടിക്കറ്റെടുത്ത് ബസിൽ യാത്ര: അമേരിക്കൻ എയർലൈൻസിന്റെ പുതിയ ‘ലാൻഡ് ലൈൻ’ സേവനം, വിചിത്രാനുഭവം പങ്കുവച്ച് യുവതി

ഷിക്കോഗോ : വിമാന യാത്രയ്ക്ക് തയ്യാറെടുത്ത യാത്രക്കാരിയെ ഞെട്ടിച്ചുകൊണ്ട് അമേരിക്കൻ എയർലൈൻസിന്റെ ബസ് സർവീസ്. ഇൻഡ്യാനയിലെ സൗത്ത് ബെൻഡിൽ നിന്ന് ഷിക്കോഗോയിലേക്കുള്ള യാത്രയിൽ നടന്ന വിചിത്രമായ അനുഭവം ക്രിസ്റ്റ മോട്ട്‌സ് എന്ന യുവതിയാണ് സമൂഹ മാധ്യമത്തിൽ പങ്കുവച്ചത്.

ഷിക്കോഗോയിലേക്ക് കണക്ട് ചെയ്യാനായി യാത്ര ബുക്ക് ചെയ്ത ക്രിസ്റ്റ, ചെക്ക്ഇൻ, സുരക്ഷാ പരിശോധന, ബോർഡിങ് ഗേറ്റിലെ കാത്തിരിപ്പ് എല്ലാം പൂർത്തിയാക്കിയ ശേഷമാണ് ബോർഡിങ്ങിനായി പോയത്. പക്ഷേ ക്രിസ്റ്റയെ കാത്തിരുന്നത് സൗത്ത് ബെൻഡ് നിന്ന് ഷിക്കോഗോയിലേക്കുള്ള ആഡംബര ബസ് സർവീസയായിരുന്നു. യാത്രയുടെ എല്ലാ ഘട്ടങ്ങളും വിമാന യാത്രയ്ക്ക് സമാനമായ രീതിയിലായിരുന്നു സൗകര്യങ്ങൾ ക്രമീകരിച്ചിരുന്നത്.

മുൻപ് ഫിലഡൽഫിയയിൽ മാത്രം ലഭ്യമായിരുന്ന ഈ സേവനം സൗത്ത് ബെൻഡിൽ പുതുതായി തുടങ്ങിയതായിരുന്നു. ബുക്ക് ചെയ്യുമ്പോൾ ‘ബസ്’ ഓപ്ഷൻ ശ്രദ്ധയിൽപ്പെട്ടില്ലെന്ന് ക്രിസ്റ്റ പറഞ്ഞു. എങ്കിലും, മൊത്തത്തിലുള്ള യാത്രാസമയം നോക്കിയാണ് താൻ ബുക്ക് ചെയ്തതെന്നും, ലഭിച്ച ആഡംബര സേവനത്തിൽ സംതൃപ്തയാണെന്നും സർവീസിന്റെ ആദ്യ ദിവസത്തെ ആദ്യ യാത്രയായിരുന്നു ഇതെന്നും ക്രിസ്റ്റ കൂട്ടിച്ചേർത്തു. വൈറലായ 44 സെക്കൻഡ് വിഡിയോയിൽ, ടാക്‌സി ബസ് വിമാനങ്ങൾക്കരികിലൂടെ ഓടുന്നതും ക്രിസ്റ്റ പങ്കുവയ്ക്കുന്നുണ്ട്.