അനുമതിയില്ലാതെ തന്റെ പാട്ട് ഉപയോഗിച്ചതിന് ‘ഡ്യൂഡി’നെതിരെ കോപ്പിറൈറ്റുമായി ഇളയരാജ

അനുമതിയില്ലാതെ തന്റെ പാട്ട് ഉപയോഗിച്ചതിന് ഡ്യൂഡ് സിനിമ നിർമാതാക്കൾക്കെതിരെ പരാതി നൽകി സംഗീത സംവിധായകൻ ഇളയരാജ. പ്രദീപ് രംഗനാഥൻ നായകനായ ചിത്രത്തിൽ താൻ കംപോസ് ചെയ്ത കറുത്ത മച്ചാൻ എന്ന പാട്ട് ഉപയോഗിച്ചതിനെതിരെയാണ് ഇളയരാജ കോടതിയെ സമീപിച്ചിരിക്കുന്നത്. ചിത്രത്തിൽ ഇളയരാജയുടെ പാട്ടിന് മമിത ബൈജു ഡാൻസ് കളിക്കുന്ന രംഗം സോഷ്യൽ മീഡിയയിൽ വൈറലായിരുന്നു.

ദീപാവലി റിലീസായ തിയേറ്ററിലെത്തിയ ഡ്യൂഡ് മികച്ച വിജയമായി മാറിയതിന് പിന്നാലെയാണ് ഇളയരാജ കേസുമായി കോടതിയെ സമീപിച്ചിരിക്കുന്നത്. ഇളയരാജയുടെ പരാതിയോട് സിനിമയുടെ നിർമാതാക്കളായ മൈത്രി മൂവീസ് ഇതുവരേയും പ്രതികരിച്ചിട്ടില്ല.

തന്റെ പാട്ടുകൾ അനുമതിയില്ലാതെ ഉപയോഗിക്കുന്നതിനെതിരെയുള്ള ഇളയരാജയുടെ നിയമപോരാട്ടം തുടർക്കഥയാവുകയാണ്. നേരത്തെ മലയാള ചിത്രം മഞ്ഞുമ്മൽ ബോയ്‌സിൽ തന്റെ പാട്ട് ഉപയോഗച്ചതിനെതിരെ അദ്ദേഹം കേസ് നൽകിയിരുന്നു. തുടർന്ന് വലിയൊരു തുക നഷ്ടപരിഹാരമായി നിർമാതാക്കൾക്ക് നൽകേണ്ടി വന്നിരുന്നു.

അജിത് നായകനായ ഗുഡ് ബാഡ് അഗ്ലിയ്‌ക്കെതിരേയും ഇളയരാജ കോടതിയെ സമീപിച്ചിരുന്നു. മൈത്രി മൂവീസിന് തന്നെയായിരുന്നു ഈ സിനിമയുടെ നിർമാണം. ഇളയരാജ നൽകിയ കേസിന് പിന്നാലെ ഗുഡ് ബാഡ് അഗ്ലി നെറ്റ്ഫഌക്‌സിൽ നിന്നും പിൻവലിച്ചിരുന്നു. ഈ അനുഭവത്തിൽ നിന്നും പാഠം ഉൾക്കൊള്ളാതെ മൈത്രി മൂവീസിന് വീണ്ടും നിയമക്കുരുക്കിൽ പെട്ടിരിക്കുകയാണ്.