ഭീമമായ H-1B വിസ ഫീസ് വര്‍ധനയില്‍ ഇളവുകള്‍ പ്രഖ്യാപിച്ച് യു.എസ്. ഭരണകൂടം; ഇന്ത്യൻ പ്രൊഫഷണലുകൾക്ക് ആശ്വാസം

വാഷിംഗ്ടൺ ഡി.സി.: യു.എസ്. പ്രഖ്യാപിച്ച ഭീമമായ എച്ച്-1ബി വിസ ഫീസ് വർധനയിൽ ഇളവുകൾ പ്രഖ്യാപിച്ചത് ആയിരക്കണക്കിന് ഇന്ത്യൻ പ്രൊഫഷണലുകൾക്കും വിദ്യാർത്ഥികൾക്കും വലിയ ആശ്വാസമായി. കഴിഞ്ഞ മാസം ഏർപ്പെടുത്തിയ 100,000 ഡോളറിന്റെ ഭീമമായ ഫീസ് നിലവിൽ യു.എസിലുള്ള എച്ച്-1ബി സ്റ്റാറ്റസിനായി സ്പോൺസർ ചെയ്യപ്പെട്ട അന്താരാഷ്ട്ര ബിരുദധാരികൾ നൽകേണ്ടതില്ലെന്ന് ട്രംപ് ഭരണകൂടം അറിയിച്ചു.

പുതുക്കിയ മാർഗ്ഗനിർദ്ദേശത്തിൽ യു.എസ്. സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (യു.എസ്.സി.ഐ.എസ്.) വ്യക്തമാക്കിയ പ്രധാന ഇളവുകൾ ഇവയാണ്:

• എഫ്-1 സ്റ്റുഡന്റ് വിസ ഉടമകൾ, എൽ-1 ഇൻട്രാ-കമ്പനി ട്രാൻസ്ഫറികൾ, വിസ പുതുക്കുന്നതിനോ നീട്ടുന്നതിനോ അപേക്ഷിക്കുന്ന നിലവിലെ എച്ച്-1ബി വിസക്കാർ എന്നിവരുൾപ്പെടെ സാധുവായ വിസയിൽ ഇതിനകം യു.എസിൽ ഉള്ള ആർക്കും 100,000 ഡോളർ ഫീസ് ബാധകമാകില്ല.
• മുമ്പ് നൽകിയിട്ടുള്ളതും നിലവിൽ സാധുതയുള്ളതുമായ എച്ച്-1ബി വിസകൾക്കോ, 2025 സെപ്റ്റംബർ 21-ന് പുലർച്ചെ 12:01-ന് മുമ്പ് സമർപ്പിച്ച അപേക്ഷകൾക്കോ ഫീസ് വർധന ബാധകമല്ല.
• എച്ച്-1ബി ഉടമകൾക്ക് യാതൊരു നിയന്ത്രണവുമില്ലാതെ അമേരിക്കയിലേക്ക് യാത്ര ചെയ്യാനും പുറത്തുപോകാനും കഴിയുമെന്ന പ്രഖ്യാപനത്തോടെ, ഫീസ് വർദ്ധന പ്രഖ്യാപനത്തിന് ശേഷം ഉയർന്നുവന്ന ഏറ്റവും വലിയ ആശങ്കകളിലൊന്ന് പരിഹരിക്കപ്പെട്ടു.

സാങ്കേതിക വൈദഗ്ധ്യമുള്ള വിദേശ തൊഴിലാളികളെ സ്പോൺസർ ചെയ്യുന്ന തൊഴിലുടമകൾക്ക് ഏകദേശം 90 ലക്ഷം രൂപയ്ക്ക് തുല്യമായ ഭീമമായ വാർഷിക ഫീസ് നിർബന്ധമാക്കിയ ട്രംപിന്റെ പ്രഖ്യാപനത്തെത്തുടർന്നുണ്ടായ ആഴ്ചകൾ നീണ്ട ആശയക്കുഴപ്പത്തിന് ശേഷമാണ് ഇപ്പോൾ ഇളവുകൾ പ്രഖ്യാപിച്ചിട്ടുള്ളത്. വർധിപ്പിച്ച ഫീസ് 2025 സെപ്റ്റംബർ 21-ന് പുലർച്ചെ 12.01 മുതൽ പ്രാബല്യത്തിൽ വരുമെന്ന് അറിയിച്ചത് ഇന്ത്യൻ തൊഴിലാളികൾക്കും യു.എസ്. തൊഴിലുടമകൾക്കും ഇമിഗ്രേഷൻ അഭിഭാഷകർക്കും ഇടയിൽ കടുത്ത പരിഭ്രാന്തി സൃഷ്ടിച്ചിരുന്നു.

ഇന്ത്യൻ ടെക് പ്രൊഫഷണലുകൾക്ക് ആശ്വാസം

എച്ച്-1ബി വിസ പ്രോഗ്രാമിന്റെ നട്ടെല്ലായ ഇന്ത്യൻ ടെക് പ്രൊഫഷണലുകൾക്ക് വലിയ ആശ്വാസമാണ് ഈ പ്രഖ്യാപനം നൽകുന്നത്. നിലവിൽ ഏകദേശം 300,000 ഇന്ത്യൻ തൊഴിലാളികൾ എച്ച്-1ബി വിസയിൽ യു.എസിൽ ഉണ്ട്. അവരിൽ ഭൂരിഭാഗവും ടെക്നോളജി, സർവീസ് മേഖലകളിലാണ് ജോലി ചെയ്യുന്നത്. യു.എസ്. ഭരണകൂടത്തിന്റെ കണക്കുകൾ പ്രകാരം പുതിയ എച്ച്-1ബി വിസകളിൽ ഏകദേശം 70 ശതമാനവും ഇന്ത്യക്കാർക്കാണ് ലഭിക്കുന്നത്.

ഉയർന്ന വൈദഗ്ധ്യമുള്ള തൊഴിലാളികൾക്ക് മൂന്ന് വർഷം വരെ അമേരിക്കയിൽ താമസിക്കാനും ജോലി ചെയ്യാനും അവസരം നൽകുന്നതാണ് എച്ച്-1ബി വിസ. ഇത് അടുത്ത മൂന്ന് വർഷത്തേക്ക് കൂടി നീട്ടാനും സാധ്യതയുണ്ട്. ഓരോ വർഷവും 85,000 പുതിയ വിസകൾ ലോട്ടറി സംവിധാനത്തിലൂടെയാണ് നൽകുന്നത്. മുമ്പ് കമ്പനിയുടെ വലുപ്പവും വിഭാഗവും അനുസരിച്ച് 215 ഡോളർ മുതൽ 5,000 ഡോളർ വരെയായിരുന്നു വിസ അപേക്ഷാ ഫീസ്.