ചെന്നൈ: ഏറെ ആകാംഷയോടെ കാത്തിരിക്കുന്ന സൂര്യയുടെ പുതിയ ചിത്രമായ ‘കറുപ്പി’ലെ ‘ഗോഡ് മോഡ്’ എന്ന ഗാനത്തിന്റെ ലിറിക് വീഡിയോ ദീപാവലി ദിനമായ ഇന്ന് (ഒക്ടോബർ 20, തിങ്കളാഴ്ച) പുറത്തിറങ്ങി. ഗ്രാമോത്സവത്തിലെ ആഘോഷങ്ങൾ നിറഞ്ഞ രംഗങ്ങളോടുകൂടിയ സൂര്യയുടെ ഈ അടിപൊളി ഗാനം ദീപാവലി ദിനത്തിൽ പ്രേക്ഷക ഹൃദയങ്ങൾ കീഴടക്കി തരംഗമാവുകയാണ്.
ആർ.ജെ. ബാലാജി സംവിധാനം ചെയ്യുന്ന ‘കറുപ്പി’ൽ തൃഷയാണ് നായിക. 2005-ന് ശേഷം സൂര്യയും തൃഷയും ഒന്നിക്കുന്ന ചിത്രം എന്ന പ്രത്യേകതയും ‘കറുപ്പി’നുണ്ട്. ഇന്ദ്രൻസ്, യോഗി ബാബു, ശിവദ, സ്വാസിക, നട്ടി, സുപ്രീത് റെഡ്ഡി, അനഘ മായ രവി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
സായ് അഭ്യങ്കറാണ് ‘ഗോഡ് മോഡ്’ എന്ന ഗാനത്തിന് സംഗീതസംവിധാനം നിർവഹിച്ചിരിക്കുന്നത്. വിഷ്ണു ഇടവനാണ് ഗാനത്തിന്റെ വരികൾ എഴുതിയത്. ജി.കെ. വിഷ്ണു ഛായാഗ്രഹണം, കലൈവാണൻ എഡിറ്റിംഗ്, അരുൺ വെഞ്ഞാറമൂട് കലാസംവിധാനം എന്നിവ നിർവഹിച്ചിരിക്കുന്നു. ഷോഫി, സാൻഡി എന്നിവർ കൊറിയോഗ്രാഫിയും അൻപറിവും വിക്രം മോറും ആക്ഷൻസും കൈകാര്യം ചെയ്തിരിക്കുന്നു.
ഡ്രീം വാരിയർ പിക്ചേഴ്സിന്റെ ബാനറിൽ എസ്.ആർ. പ്രഭുവും എസ്.ആർ. പ്രകാശ് ബാബുവുമാണ് ‘കറുപ്പി’ന്റെ നിർമ്മാണം. പ്രതീഷ് ശേഖറാണ് ചിത്രത്തിന്റെ പി.ആർ.ഒ.യും മാർക്കറ്റിംഗും.
