സ്വർണം പൂശിയ ദീപാവലി മധുരം; ഒരു കിലോയ്ക്ക് 1.1 ലക്ഷം രൂപ!

ജയ്‌പൂർ: ദീപാവലി ആഘോഷങ്ങളോട് അനുബന്ധിച്ച് സ്വർണവും വെള്ളിയും പൂശിയ ആഡംബര മധുരപലഹാരങ്ങൾ വിപണിയിൽ. ജയ്പൂരിലെ ‘ത്യോഹാർ’ എന്ന സ്ഥാപനമാണ് കാഴ്ചയിൽ അതിമനോഹരമായ ഈ ദീപാവലി മിഠായികൾ ഒരുക്കിയിരിക്കുന്നത്. സ്വർണം പൂശിയ മധുരപലഹാരങ്ങളുടെ വില ഒരു കിലോഗ്രാമിന് 1,00,000 രൂപയിലും അധികമാണ് എന്നതാണ് ഈ വാർത്തയെ ശ്രദ്ധേയമാക്കുന്നത്.

ഫുഡ് ഇന്നൊവേറ്ററും ‘ത്യോഹാർ’ സ്ഥാപകയുമായ അഞ്ജലി ജെയിൻ ആണ് ഈ രാജകീയ പലഹാരങ്ങൾക്ക് പിന്നിൽ. സാധാരണയായി ദീപാവലിക്ക് മുന്നോടിയായി ആളുകൾ സ്വർണം, വെള്ളി നാണയങ്ങളും ആഭരണങ്ങളും വാങ്ങാറുണ്ട്. എന്നാൽ ആഭരണങ്ങൾ അണിയുന്നതിനൊപ്പം മധുരപലഹാരങ്ങളായി സ്വർണം ആസ്വദിക്കാൻ കഴിയുമെന്നതാണ് ഈ സംരംഭത്തിന്റെ പ്രത്യേകത.

‘ഗോൾഡ് സീരീസ് ബൈ ത്യോഹാർ’ എന്നതിൻ്റെ ഭാഗമായാണ് ഈ വിഭവങ്ങൾ പുറത്തിറക്കിയിരിക്കുന്നത്. ഈ പട്ടികയിലെ ഏറ്റവും വിലകൂടിയ ഇനമാണ് ‘സ്വർണ പ്രസാദം’. ഇതിന് കിലോഗ്രാമിന് 1,11,000 രൂപയാണ് വിലയെന്ന് അഞ്ജലി ജെയിൻ അറിയിച്ചു. “കേവലം ഒരു മധുരം എന്നതിലുപരി, ആരോഗ്യത്തിൻ്റെയും രാജകീയതയുടെയും കൂടിച്ചേരലാണ് ഈ പലഹാരം,” അവർ കൂട്ടിച്ചേർത്തു.

ആയുർവേദത്തിൽ രോഗപ്രതിരോധ ശേഷി വർധിപ്പിക്കാൻ സ്വർണ ഭസ്മം സഹായിക്കുമെന്ന അറിവിൽ നിന്നാണ് സ്വർണപ്പൊടി അലങ്കാരത്തിന് വേണ്ടി മാത്രമല്ല പലഹാരങ്ങളിൽ ഉപയോഗിക്കാൻ പ്രചോദനം ലഭിച്ചതെന്നും അഞ്ജലി ജെയിൻ വിശദീകരിച്ചു.

‘ത്യോഹാർ’ പുറത്തിറക്കിയ മറ്റ് ആഡംബര വിഭവങ്ങളുടെ വില വിവരങ്ങൾ:

• സ്വർണ ഭസ്മ് ഭരത്: ഒരു കഷ്ണത്തിന് 1,950 രൂപ / ഒരു കിലോഗ്രാമിന് 85,000 രൂപ
• ചാന്ദി ഭസ്മ് ഭരത്: ഒരു കഷ്ണത്തിന് 1,150 രൂപ
• 24 കാരറ്റ് പിസ്ത ലോഞ്ച്: ഒരു കിലോഗ്രാമിന് 7,000 രൂപ
• 24 കാരറ്റ് കാജു കട്‌ലി: ഒരു കിലോഗ്രാമിന് 3,500 രൂപ
• 24 കാരറ്റ് ലഡ്ഡു: ഒരു കിലോഗ്രാമിന് 2,500 രൂപ