കൊച്ചി: ഭൂട്ടാനിൽനിന്ന് കടത്തിക്കൊണ്ടുവന്ന വാഹനങ്ങൾ കണ്ടെത്തുന്നതിനായി കസ്റ്റംസ് നടത്തിയ ഓപ്പറേഷൻ നുംഖൂറിന്റെ ഭാഗമായി പിടിച്ചെടുത്ത നടൻ ദുൽഖർ സൽമാന്റെ ലാൻഡ് റോവർ വിട്ടുനൽകും. ഹൈക്കോടതി നിർദേശമനുസരിച്ച് വാഹനം വിട്ടുനൽകാൻ ആവശ്യപ്പെട്ട് ദുൽഖർ കസ്റ്റംസിന് അപേക്ഷ നൽകിയിരുന്നു. ദുൽഖർ സൽമാന് വാഹനം കൊണ്ടുപോവാമെന്ന് കസ്റ്റംസ് വ്യക്തമാക്കി. ബോണ്ടിന്റെയും 20 ശതമാനം ബാങ്ക് ഗാരന്റിയുടേയും അടിസ്ഥാനത്തിലാണ് ഈ നടപടി. അന്വേഷണ പരിധിയിലുള്ള വാഹനമായതിനാൽ കേരളത്തിന് പുറത്ത് കൊണ്ടുപോവരുത്, ആവശ്യപ്പെട്ടാൽ ഹാജരാക്കണം തുടങ്ങിയ നിബന്ധനകൾ ഉണ്ടെന്നാണ് വിവരം.
അതേസമയം, ദുൽഖറിന്റെ മറ്റ് രണ്ട് വാഹനങ്ങൾ കൂടി പിടിച്ചെടുത്തിട്ടുണ്ടെങ്കിലും ഈ നടപടി ദുൽഖർ ചോദ്യം ചെയ്തിട്ടില്ല. ലാന്റ് റോവർ ഡിഫൻഡർ, ലാന്റ് ക്രൂയിസർ, നിസാൻ പട്രോൾ തുടങ്ങിയ വാഹനങ്ങളാണ് കസ്റ്റംസ് പിടിച്ചെടുത്തത്. ഇതിൽ ഡിഫൻഡറർ തിരികെ നൽകണമെന്നാവശ്യപ്പെട്ടാണ് ദുൽഖർ ഹൈക്കോടതിയെ സമീപിച്ചത്.
വാഹനം താത്കാലികമായി തിരികെ ലഭിക്കുന്നതിന് അഡ്ജുഡീക്കേറ്റിങ് അതോറിറ്റിയായ കസ്റ്റംസ് അഡീഷണൽ കമ്മീഷണറെ സമീപിക്കാനായിരുന്നു ദുൽഖർ സൽമാനോട് ഹൈക്കോടതി നിർദേശിച്ചിരുന്നത്. ദുൽഖറിന്റെ അപേക്ഷയിൽ ബന്ധപ്പെട്ട അതോറിറ്റി ഒരാഴ്ചയ്ക്കുള്ളിൽ തീരുമാനമെടുക്കണമെന്നും ജസ്റ്റിസ് എ.എ. സിയാദ് റഹ്മാൻ ഉത്തരവിട്ടിരുന്നു. ഇതിന്റെ അടിസ്ഥാനത്തിൽ ദുൽഖർ കസ്റ്റംസിനെ സമീപിക്കുകയായിരുന്നു.
Leave a comment