വൈസ് മെൻ ഇന്റർനാഷണൽ വെസ്റ്റ്ചെസ്റ്റർ ചാപ്റ്ററിന് പുതിയ നേതൃത്വം

ന്യൂയോർക്ക്: സാമൂഹിക സേവനത്തിനും മനുഷ്യസ്നേഹ പ്രവർത്തനങ്ങൾക്കും മുൻതൂക്കം നൽകുന്ന വൈസ് മെൻ ഇന്റർനാഷണൽ വെസ്റ്റ്ചെസ്റ്റർ ചാപ്റ്ററിന്റെ 2026-2028 ഭരണസമിതിയുടെ സ്ഥാനാരോഹണ ചടങ്ങ്   ഓറഞ്ച്ബർഗിലുള്ള സിതാർ പാലസിൽ ജൂൺ 20-ന് പ്രൗഢഗംഭീരമായി നടന്നു.

ലോകമെമ്പാടുമുള്ള   പ്രവർത്തനങ്ങളെയും പ്രാദേശിക സമൂഹസേവന പദ്ധതികളെയും പിന്തുണയ്ക്കുന്ന അന്തർദേശീയ സംഘടനയായ വൈസ് മെൻ ഇന്റർനാഷണലിന്റെ ഭാഗമായ വെസ്റ്റ്ചെസ്റ്റർ ചാപ്റ്റർ പുതിയ ഭരണസമിതിയെ ചടങ്ങിൽ ഔദ്യോഗികമായി ചുമതലയേൽപ്പിച്ചു. സംഘടന സമൂഹസേവനം, യുവജന ശാക്തീകരണം, സൗഹൃദം, നേതൃത്വ വികസനം എന്നിവയ്ക്ക് പ്രാധാന്യം നൽകുന്നതായി ഭാരവാഹികൾ പറഞ്ഞു.

2026-2028 കാലയളവിലേക്കുള്ള പ്രസിഡന്റായി ജോസ് മലയിൽ  സ്ഥാനമേറ്റു. സെക്രട്ടറി കൊച്ചുറാണി സണ്ണി, ട്രഷറർ ജോസഫ് മാത്യു, വൈസ് പ്രസിഡന്റ് ജോസ് ഞാറക്കുന്നേൽ, ജോയിന്റ് സെക്രട്ടറി ടോണി പാലയ്ക്കൽ, ജോയിന്റ് ട്രഷറർ പോൾ ചാക്കോ എന്നിവർ ഉൾപ്പെടുന്ന എക്സിക്യൂട്ടീവ് കമ്മിറ്റിയും  ചുമതലയേറ്റു.

സേവന പ്രവർത്തനങ്ങൾക്ക് നേതൃത്വം നൽകുന്ന സർവീസ് ഡയറക്ടർമാരായി ഓൾഗ തെള്ളിയാങ്കൽ (കമ്മ്യൂണിറ്റി സർവീസ്/യൂത്ത് ഇൻവോൾവ്മെന്റ്), ബെന്നി മുട്ടപ്പള്ളി (ടൈം ഓഫ് ഫാസ്റ്റ്/ചാരിറ്റി), ലിജോ ജോൺ (പബ്ലിക് റിലേഷൻസ്/ഫെല്ലോഷിപ്പ്), ജിം പുല്ലാട്ടുകലയിൽ (മെമ്പർഷിപ്പ്/ലീഡർഷിപ്പ്), ആന്റോ വർക്കി (ഓഡിറ്റർ) എന്നിവരും ചുമതലയേറ്റു.

സ്ഥാനാരോഹണ ചടങ്ങിൽ വൈസ് മെൻ ഇന്റർനാഷണൽ യു.എസ്. ഏരിയ പ്രസിഡന്റ് ജോസഫ് കാഞ്ഞമല, റീജിയണൽ ഡയറക്ടർ ജോർജ് കെ. ജോൺ, മുൻ ഏരിയ പ്രസിഡന്റ് ഷാജു സാം എന്നിവർ ഇൻസ്റ്റാളിംഗ് ഓഫീസർമാരായി പങ്കെടുത്തു. വിശിഷ്ടാതിഥിയായി ഡോ. ആനി പോൾ സന്നിഹിതയായി.

വെസ്റ്റ്ചെസ്റ്റർ ചാപ്റ്ററിന്റെ  മുൻ പ്രസിഡന്റുമാരായ ഷോളി കുമ്പിളുവേലിൽ, ഷാജി സക്കറിയ, എഡ്വിൻ കാത്തി, ജോസഫ് മാത്യൂസ് എന്നിവരെയും ചടങ്ങിൽ ആദരിച്ചു.

പുതിയ ഭരണസമിതിയുടെ നേതൃത്വത്തിൽ സമൂഹസേവനം, യുവജന പങ്കാളിത്തം, ചാരിറ്റി പ്രവർത്തനങ്ങൾ, അംഗത്വ വികസനം എന്നിവ കൂടുതൽ ശക്തിപ്പെടുത്തുമെന്ന് പ്രസിഡന്റ് ജോസ് മലയിൽ പറഞ്ഞു. വെസ്റ്റ്ചെസ്റ്റർ മേഖലയിലെ ഇന്ത്യൻ-അമേരിക്കൻ സമൂഹത്തിനും പ്രാദേശിക സമൂഹത്തിനും കൂടുതൽ സേവന പദ്ധതികൾ നടപ്പാക്കാനുള്ള പ്രതിബദ്ധതയും അദ്ദേഹം പ്രകടിപ്പിച്ചു.