വൈകി ആഹാരം കഴിക്കുന്ന ശീലമുണ്ടോ? എന്തു കഴിക്കുന്നു എന്നതിനേക്കാൾ പ്രധാനമാണ് സമയം

സമ്മർദവും കുടലിന്റെ ആരോഗ്യവും തമ്മിൽ വലിയ ബന്ധമുണ്ടെന്ന് നിരവധി പഠനങ്ങൾ തെളിയിച്ചിട്ടുണ്ട്. സമ്മർദം കൂടുംതോറും ദഹനസംബന്ധമായ പ്രശ്നങ്ങളും കൂടുന്നുവെന്ന് പരാതിപ്പെടുന്നവരുണ്ട്. ഇതിനൊപ്പം ഏറെ വൈകി ആഹാരം കഴിക്കുന്നവർ കൂടിയാണെങ്കിൽ കുടലിന്റെ ആരോഗ്യം വീണ്ടും തകരാറിലാകുമെന്ന് പറയുകയാണ് ഗവേഷകർ. ദഹനപ്രക്രിയ പ്രശ്നമാകുന്നതിനൊപ്പം കുടലിലെ സൂക്ഷ്മാണുക്കളെയും ഈ ശീലം ബാധിക്കുമെന്നാണ് ഗവേഷകർ പറയുന്നത്.

അമേരിക്കയിൽ നിന്നുള്ള ഗവേഷകരാണ് പഠനത്തിന് പിന്നിൽ. നാഷണൽ ഹെൽത്ത് & ന്യൂട്രീഷൻ എക്സാമിനേഷൻ സർവേയിൽ നിന്നുള്ള വിവരങ്ങൾ ശേഖരിച്ചാണ് പഠനം നടത്തിയത്. കടുത്ത സമ്മർദം, വൈകി ഭക്ഷണം കഴിക്കുക തുടങ്ങിയവയും ദഹനവും തമ്മിലുള്ള ബന്ധത്തേക്കുറിച്ചാണ് പഠനം നടത്തിയത്. കൂടിയ സമ്മർദം, കൊളസ്ട്രോൾ നില, രക്തസമ്മർദം എന്നിവയ്ക്കൊപ്പം രാത്രി ഒമ്പതുമണിക്കുശേഷം ഭക്ഷണം കഴിക്കുക കൂടി ചെയ്തവരാണെങ്കിൽ മലബന്ധം, വയറിളക്കം തുടങ്ങിയവയ്ക്കുള്ള സാധ്യത കൂടുതലാണെന്ന് ഗവേഷകർ വ്യക്തമാക്കി.

എന്തുകഴിക്കുന്നു എന്നതിനേക്കാൾ പ്രധാനമാണ് എപ്പോൾ കഴിക്കുന്നു എന്നത്-ന്യൂയോർക്ക് മെഡിക്കൽ കോളേജിലെ റെസിഡന്റ് ഫിസിഷ്യനായ ഹരിക ദദിഗിരി പറയുന്നു. സമ്മർദം കൂടിയുള്ളവരാണെങ്കിൽ വൈകി ആഹാരം കഴിക്കുന്നത് കുടലിന്റെ ആരോഗ്യത്തെ ഇരട്ടി തകരാറിലാക്കുമെന്നാണ് ഗവേഷകർ പറയുന്നത്.

ലഘുവായ ഭക്ഷണങ്ങൾ, കൃത്യസമയത്ത് കഴിക്കുന്നതിലൂടെയും ചിട്ടയായ ആഹാരക്രമം കൊണ്ടുവരുന്നതിലൂടെയും ദഹനസംബന്ധമായ പ്രശ്നങ്ങളെ ഒഴിവാക്കാമെന്നും ഗവേഷകർ വ്യക്തമാക്കുന്നുണ്ട്.

ദഹനം സുഗമമാക്കാൻ ചില ടിപ്സ്

• ദഹനത്തിന് ശരീരത്തിൽ ജലാംശം നിലനിൽക്കേണ്ടത് അത്യാവശമാണ്. ധാരാളം വെള്ളം കുടിക്കുന്നതുവഴി ശരീരത്തിലെ വിഷവസ്തുക്കളെ പുറന്തള്ളാനും ദഹനവ്യവസ്ഥയെ മെച്ചപ്പെടുത്താനും കഴിയും.
• ഇഞ്ചിയും മഞ്ഞളും കൂടുതലായി ഭക്ഷണത്തിൽ ഉൾപ്പെടുത്താൻ ശ്രമിക്കുക. ഇവ ദഹനത്തെ ഉത്തേജിപ്പിക്കുകയും കുടലിന്റെ പ്രശ്‌നങ്ങളെ ശമിപ്പിക്കുകയും ചെയ്യുന്നു. സൂപ്പുകൾ, കറികൾ എന്നിവയിൽ ഇവ രണ്ടും കൂടുതലായി ചേർക്കാൻ ശ്രദ്ധിക്കാം. ഇടയ്ക്കിടയ്ക്ക് ജിഞ്ചർ ടീ കുടിക്കുന്നതും നല്ലതാണ്.
• നാരുകൾ അടങ്ങിയ ഭക്ഷണങ്ങൾക്ക് പ്രാധാന്യം നൽകുന്നതാണ് മറ്റൊരു സംഗതി. ഇവ ദഹനത്തെ ഉത്തേജിപ്പിക്കുകയും മലവിസർജനം കൃത്യമാകാൻ സഹായിക്കുകയും ചെയ്യും. പഴങ്ങൾ, പച്ചക്കറികൾ, ധാന്യങ്ങൾ, പയറുവർഗങ്ങൾ എന്നിവയാണ് ആരോഗ്യകരമായ കുടലിുനെ പരിപോഷിപ്പിക്കുന്ന ഏതാനും ഭക്ഷണസാധനങ്ങൾ.
• പ്രോബയോട്ടിക് അടങ്ങിയ ഭക്ഷണം കഴിക്കുന്നതാണ് മറ്റൊന്ന്. ഇത് കുടലിലെ ബാക്ടീരിയയുടെ പ്രവർത്തനത്തിന് നല്ലതാണ്. യോഗർട്ട്, കെഫീർ മുതലായവയിൽ പ്രോബയോട്ടിക് ധാരാളമായി അടങ്ങിയിട്ടുണ്ട്.
• കട്ടിയുള്ളതും എണ്ണയിൽ വറുക്കുന്നതുമായ ഭക്ഷണങ്ങൾ ഒഴിവാക്കുക. ഇവ ദഹനവ്യവസ്ഥയെ മന്ദഗതിയിലാക്കും. മാത്രമല്ല, സംസ്‌കരിച്ച ഭക്ഷണങ്ങളിൽ നാരുകളും പോഷകങ്ങളും കുറവുമാണ്. ദഹനസംബന്ധമായ പ്രശ്‌നങ്ങൾ ഉണ്ടാകാതിരിക്കാനായി ഇവ ഭക്ഷണത്തിൽനിന്ന് പരമാവധി ഒഴിവാക്കൂ.
• ശരിയായ ദഹനത്തെ പരിപോഷിപ്പിക്കാനായി ഭക്ഷണം ശ്രദ്ധയോടെ കഴിക്കാൻ ശീലിക്കുക. ഇത് ഭക്ഷണം ശരിയായ രീതിയിൽ വിഘടിപ്പിക്കാൻ ശരീരത്തെ സഹായിക്കും. സാവധാനത്തിലും ശ്രദ്ധയോടെയും ചവച്ചരച്ച് ആസ്വദിച്ച് വേണം കഴിക്കാൻ. ദഹനം തടസ്സപ്പെടാതിരിക്കാനായി ഭക്ഷണം കാണുമ്പോൾ ടിവിയോ മറ്റ് ഇലക്ട്രോണിക് ഉപകരണങ്ങളോ കാണുന്നത് ഒഴിവാക്കുക.
• ദഹനനാളത്തിലെ പേശികളെ ഉത്തേജിപ്പിക്കാനായി യോഗയിലോ നടത്തത്തിലോ മറ്റെന്തെങ്കിലും ശാരീരിക വ്യായാമങ്ങളിലോ മുഴുകാൻ ശ്രദ്ധിക്കുക. ശാരീരികമായി സജീവമായിരിക്കുന്നത് ദഹനം സുഗമമാക്കും.
• മാനസികസമ്മർദം ദഹനത്തെ പ്രതികൂലമായി ബാധിക്കും. അതിനാൽ, സമ്മർദനില നിയന്ത്രിച്ചുനിർത്തേണ്ടത് പ്രധാനമാണ്. മെഡിറ്റേഷൻ, ശ്വസനവ്യായാമങ്ങൾ തുടങ്ങിയ ഹോബികൾ ശീലിക്കുന്നത് മനസ്സിന്റെ ശാന്തത നിലനിർത്താൻ സഹായിക്കും.
• ഒരോരുത്തരുടേയും ശരീരത്തിന്റെ ആവശ്യങ്ങളനുസരിച്ച് മാറ്റങ്ങൾ വരുത്തണം. എന്നിട്ടും ദഹനസംബന്ധമായ പ്രശ്‌നങ്ങൾ തുടരുന്നുണ്ടെങ്കിൽ, വ്യക്തിഗത ഉപദേശത്തിനായി ഒരു ഹെൽത്ത്‌കെയർ സ്‌പെഷ്യലിസ്റ്റിനെ സമീപിക്കുന്നതാണ് ഉത്തമം.