വാഷിംഗ്ടണ്: അമേരിക്കന് ചരിത്രത്തിലെ കറുത്ത ഏടുകള്ക്ക് ഒരിക്കല് കൂടി വാഷിംഗ്ടണ് ഹില്ട്ടണ് ഹോട്ടല് സാക്ഷിയായി. 1981-ല് അന്നത്തെ പ്രസിഡന്റ് റൊണാള്ഡ് റീഗണ് വെടിയേറ്റ അതേ വേദിയില് വെച്ച് 45 വര്ഷങ്ങള്ക്കിപ്പുറം ഡൊണാള്ഡ് ട്രംപിന് നേരെയും വധശ്രമമുണ്ടായിരിക്കുന്നത് ലോകത്തെ ഞെട്ടിച്ചിരിക്കുകയാണ്. കണക്റ്റിക്കട്ട് അവന്യൂവിലെ ഈ ഹോട്ടല് സമുച്ചയം അമേരിക്കന് പ്രസിഡന്റുമാരുടെ സുരക്ഷാ ചരിത്രത്തിലെ ദുരൂഹമായ ഒരു ബിന്ദുവായി മാറുകയാണ്.
1981 മാര്ച്ച് 30-നായിരുന്നു ലോകത്തെ നടുക്കിയ റൊണാള്ഡ് റീഗന് വധശ്രമം. ഹോട്ടലിലെ പ്രസംഗം കഴിഞ്ഞ് മടങ്ങുകയായിരുന്ന റീഗനെ ജോണ് ഹിന്ക്ലി ജൂനിയര് എന്ന യുവാവ് വെടിവെച്ചു വീഴ്ത്തുകയായിരുന്നു. അന്ന് ലിമോസിനില് തട്ടിത്തെറിച്ച ബുള്ളറ്റ് റീഗന്റെ നെഞ്ചില് തറയ്ക്കുകയും ശ്വാസകോശത്തിന് പരിക്കേല്പ്പിക്കുകയും ചെയ്തു. ഏതാണ്ട് സമാനമായ രീതിയില്, വൈറ്റ് ഹൗസ് കറസ്പോണ്ടന്റ്സ് ഡിന്നറിനിടെ ട്രംപിന് നേരെയും വെടിയൊച്ചകള് ഉയര്ന്നത് ചരിത്രത്തിന്റെ ഭീതിപ്പെടുത്തുന്ന ആവര്ത്തനമായി.
റീഗനൊപ്പം അന്ന് വൈറ്റ് ഹൗസ് പ്രസ് സെക്രട്ടറി ജെയിംസ് ബ്രാഡി ഉള്പ്പെടെ മൂന്ന് പേര്ക്ക് പരിക്കേറ്റിരുന്നു. തലച്ചോറിന് ഗുരുതരമായി പരിക്കേറ്റ ബ്രാഡി ശിഷ്ടകാലം വൈകല്യങ്ങളുമായാണ് ജീവിച്ചത്. ഇന്ന് ട്രംപിന് നേരെയുണ്ടായ ആക്രമണത്തിലും ഒരു സീക്രട്ട് സര്വീസ് ഏജന്റിന് വെടിയേറ്റു എന്നത് സുരക്ഷാ ഏജന്സികളെ ആശങ്കയിലാഴ്ത്തുന്നു. ഹോട്ടലിന് പുറത്ത് റീഗന് വധശ്രമത്തിന്റെ സ്മരണ പുതുക്കി സ്ഥാപിച്ചിട്ടുള്ള ഫലകം ഇന്നും ആ പഴയ വെടിയൊച്ചകളുടെ സാക്ഷിയായി അവിടെയുണ്ട്.
കഴിഞ്ഞ കുറച്ച് വര്ഷങ്ങള്ക്കിടെ ട്രംപിന് നേരെ നടക്കുന്ന മൂന്നാമത്തെ ആക്രമണശ്രമമാണിത്. 2024 ജൂലൈയില് പെന്സില്വാനിയയിലെ ബട്ലറില് നടന്ന വെടിവെപ്പിന്റെ നടുക്കം മാറും മുന്പേയാണ് വീണ്ടും വധശ്രമമുണ്ടാകുന്നത്. ബട്ലറില് തോമസ് ക്രൂക്ക്സ് എന്ന 20-കാരന്റെ വെടിയുണ്ടകളില് നിന്ന് ട്രംപ് തലനാരിഴയ്ക്കാണ് രക്ഷപ്പെട്ടത്. അന്ന് ബട്ലറില് അനുഭവപ്പെട്ട അതേ ഭീതിയും അനിശ്ചിതത്വവും ഇപ്പോള് വാഷിംഗ്ടണ് ഡിസിയിലും പടരുകയാണ്.
ആക്രമണത്തിന് പിന്നാലെ വൈറ്റ് ഹൗസ് ബ്രീഫിംഗ് റൂമിലെത്തിയ ട്രംപ് തികഞ്ഞ ആത്മവിശ്വാസത്തിലായിരുന്നു. എന്നാല് തന്റെ ജോലിയുടെ അപകടസാധ്യതയെക്കുറിച്ച് അദ്ദേഹം വാചാലനായി. ‘ലോകത്ത് ഇതിനേക്കാള് അപകടകരമായ മറ്റൊരു ജോലി ഉണ്ടാവുമെന്ന് എനിക്ക് തോന്നുന്നില്ല,’ എന്നായിരുന്നു ട്രംപിന്റെ വാക്കുകള്. ബട്ലറിലെ വെടിവെപ്പ് തന്റെ ജീവിതത്തിലെ നിര്ണ്ണായക നിമിഷമായിരുന്നുവെന്ന് അദ്ദേഹം മുന്പ് പറഞ്ഞിട്ടുണ്ട്. സംഭവവും അമേരിക്കന് രാഷ്ട്രീയത്തിന്റെ ഗതി മാറ്റുന്ന മറ്റൊരു സുപ്രധാന നാഴികക്കല്ലായി മാറും.
വാഷിംഗ്ടണ് ഹില്ട്ടണിലെ സുരക്ഷാ ക്രമീകരണങ്ങളെക്കുറിച്ച് വലിയ ചോദ്യങ്ങളാണ് ഇപ്പോള് ഉയരുന്നത്. ലോകത്തെ ഏറ്റവും സുരക്ഷിതമായ രാജ്യം എന്ന് അവകാശപ്പെടുമ്പോഴും, സ്വന്തം പ്രസിഡന്റിന് ഒരേ സ്ഥലത്ത് വെച്ച് വീണ്ടും വെടിയേല്ക്കേണ്ടി വരുന്നത് അമേരിക്കന് സുരക്ഷാ ഏജന്സികള്ക്ക് വലിയ തിരിച്ചടിയാണ്.
