വാഷിങ്ടൻ: സമാധാന ചർച്ചയ്ക്കായി പാക്കിസ്ഥാനിലേക്ക് പോകേണ്ടതില്ലെന്ന് യുഎസ് പ്രതിനിധി സംഘത്തെ അറിയിച്ചതായി ഡോണൾഡ് ട്രംപ്. 18 മണിക്കൂർ വെറുതേ കളയേണ്ടതില്ലെന്ന് സംഘത്തെ അറിയിച്ചതായി അദ്ദേഹം പറഞ്ഞത്. വെറുതെ ചർച്ച ചെയ്ത് സമയം കളയാനില്ലെന്നും അദ്ദേഹം പറഞ്ഞു. ഇറാന് ഏതു സമയവും തങ്ങളെ വിളിക്കാമെന്നും ട്രംപ് കൂട്ടിച്ചേർത്തു.
ഇറാനുമായുള്ള കൂടിക്കാഴ്ചയ്ക്ക് പാക്കിസ്ഥാനിലേക്ക് പോകാനിരുന്ന പ്രതിനിധി സംഘത്തിന്റെ യാത്ര റദ്ദാക്കി. യാത്രയ്ക്കായി ഒരുപാട് സമയം വെറുതെ കളയണം. ഒരുപാട് ജോലിയുണ്ട്. അവരുടെ ‘നേതൃത്വത്തിന്’ ഉള്ളിൽ കടുത്ത ആശയക്കുഴപ്പമുണ്ട്. ആരാണ് അവരെ നയിക്കുന്നതെന്ന് അവർക്കുപോലും അറിയില്ല. വിജയിച്ചു നിൽക്കുന്നത് ഞങ്ങളാണ്. അവർക്ക് സംസാരിക്കണമെങ്കിൽ എപ്പോൾ വേണമെങ്കിലും വിളിക്കാം’–ട്രംപ് ട്രൂത്ത് സോഷ്യലിൽ കുറിച്ചു.
ഇറാൻ വിദേശകാര്യ മന്ത്രിയും സംഘവും പാക്കിസ്ഥാനിൽനിന്ന് മടങ്ങിയതിനു പിന്നാലെ യുഎസ് പ്രതിനിധി സംഘവും യാത്ര റദ്ദാക്കി. ഇറാനുമായുള്ള രണ്ടാംഘട്ട ചർച്ചകൾക്കായി ഇസ്ലാമാബാദിലേക്കു വരാനിരുന്ന പ്രതിനിധി സംഘത്തിന്റെ യാത്ര റദ്ദാക്കിയതായിട്രംപ് അമേരിക്കൻ മാധ്യമങ്ങളോടു പറഞ്ഞിരുന്നു.
