സംഗീത കൂട്ടായ്മ അവതരിപ്പിച്ച് സൗത്ത് ഇന്ത്യൻ യു.എസ്. ചേംബർ ഓഫ് കൊമേഴ്സ്

ഹൂസ്റ്റൺ: പ്രമുഖ പ്രവാസി വ്യവസായ കൂട്ടായ്മയായ സൗത്ത് ഇന്ത്യൻ യു.എസ്. ചേംബർ ഓഫ് കൊമേഴ്സ് (SIUCC) തങ്ങളുടെ പ്രവർത്തനങ്ങളുടെ 15-ാം വാർഷികാഘോഷങ്ങളുടെ ഭാഗമായി പുതിയ ‘മ്യൂസിക് ക്ലബ്’ ആരംഭിക്കുന്നു. കലയിലൂടെയും സംഗീതത്തിലൂടെയും കമ്മ്യൂണിറ്റിയെ ഒന്നിപ്പിക്കുക, വ്യവസായികൾ ഉൾപ്പെടുന്ന മലയാളി സമൂഹത്തിന് മാനസികവും ആത്മീയവുമായ ഉന്മേഷം പകരുകയും നിത്യ ജീവിതത്തിലെ സമ്മർദ്ദം കുറയ്ക്കുക എന്ന ലക്ഷ്യത്തോടെയുമാണ് ഈ സംരംഭത്തിന് തുടക്കം കുറിക്കുന്നത്.

ഏപ്രിൽ 8 വൈകുന്നേരം 6:30 നു SIUCC കോർപ്പറേറ്റ് ഓഫീസിലാണ്  ഉദ്ഘാടന ചടങ്ങ്. വിശിഷ്ട അതിഥികളുടെ സാന്നിധ്യത്തിൽ നടക്കുന്ന ചടങ്ങിലേക്ക് എല്ലാ സംഗീതപ്രേമികളെയും സംഘാടകർ സ്വാഗതം ചെയ്തു.

സംഗീതത്തിലൂടെ സന്തുലിത ജീവിതം

സമ്മർദ്ദങ്ങൾ നിറഞ്ഞ ആധുനിക ജീവിതത്തിൽ സംഗീതത്തെ ഒരു ഔഷധമായി ഉപയോഗിക്കാനും, സർഗ്ഗാത്മകത വളർത്താനും മ്യൂസിക് ക്ലബ് വേദിയൊരുക്കും. വളർന്നു വരുന്ന ഗായകർക്കും സംഗീതം അഭ്യസിക്കാൻ ആഗ്രഹിക്കുന്നവർക്കും ആവശ്യമായ മാർഗ്ഗനിർദ്ദേശങ്ങളും മെന്റർഷിപ്പും ക്ലബ്ബ് വാഗ്ദാനം ചെയ്യുന്നു. വ്യക്തികൾ തമ്മിലുള്ള ബന്ധം ദൃഢമാക്കാനും സാംസ്കാരിക മൂല്യങ്ങൾ ഉയർത്തിപ്പിടിക്കാനും ഈ കൂട്ടായ്മ സഹായിക്കുമെന്ന് ഭാരവാഹികൾ അറിയിച്ചു.

15 വർഷത്തെ സേവന പാരമ്പര്യം

കഴിഞ്ഞ ഒന്നര പതിറ്റാണ്ടായി അമേരിക്കയിലെ ബിസിനസ് ഉടമകളെയും വിവിധ താല്പര്യങ്ങളുള്ള വ്യക്തികളെയും ഏകോപിപ്പിക്കുന്നതിൽ SIUCC നിർണ്ണായക പങ്ക് വഹിക്കുന്നുണ്ട്. സംരംഭകത്വത്തെ പ്രോത്സാഹിപ്പിക്കുക, സ്റ്റാർട്ടപ്പുകൾക്ക് പിന്തുണ നൽകുക, സാമൂഹിക പ്രതിബദ്ധതയുള്ള പ്രവർത്തനങ്ങൾ ഏറ്റെടുക്കുക എന്നിവയിൽ സംഘടന എന്നും മുൻപന്തിയിലുണ്ട്.
സംഗീത ക്ലബ്ബിന്റെ പ്രവർത്തനങ്ങളിലൂടെ കമ്മ്യൂണിറ്റിയുടെ സമഗ്രമായ വളർച്ചയും സമാധാനവുമാണ് സംഘടന ലക്ഷ്യമിടുന്നത്.

കൂടുതൽ വിവരങ്ങൾക്ക് ബന്ധപ്പെടുക:
• സണ്ണി കാരിയ്ക്കൽ: (832) 566-6806
• സാം സുരേന്ദ്രൻ: (818) 428-0597
• ബ്രൂസ് കൊളംബേൽ: (818) 274-1667

Report ഡോ. ജോർജ് എം. കാക്കനാട്