ന്യൂജേഴ്സിയിലെ പാറ്റേഴ്സണിലുള്ള സെന്റ് ജോർജ് സിറോ മലബാർ കത്തോലിക്കാ പള്ളി 2026 മാർച്ച് 20 മുതൽ 22 വരെ പാരീഷ് നോമ്പുകാല ധ്യാനം സംഘടിപ്പിക്കുന്നു. നോമ്പുകാലഘട്ടത്തിൽ ആത്മീയ നവീകരണത്തിനായി വിശ്വാസികൾക്ക് അവസരം നൽകുന്നതാണ് ഈആത്മീയ സംഗമം.
“സേക്രഡ് ബോണ്ട്” സന്തോഷകരമായ കുടുംബജീവിതത്തിലേക്ക് ഒരു സൈക്കോ-സ്പിരിച്ച്വൽ യാത്ര” എന്ന പ്രമേയത്തിലാണ് ഈ ധ്യാനം
നടക്കുന്നത്. വിശ്വാസവും ആത്മപരിശീലനവും മുഖേന ദൈവവുമായി ബന്ധം കൂടുതൽ ശക്തമാക്കുകയും കുടുംബജീവിതം സമൃദ്ധമാക്കുകയും ചെയ്യുന്നതിനാണ് പരിപാടി ലക്ഷ്യമിടുന്നത്.
മൂന്ന് ദിവസത്തെ ഈ ധ്യാനത്തിന് നേതൃത്വം നൽകുന്നത് പ്രശസ്ത പ്രഭാഷകനും കൗൺസിലറും വിദ്യാഭ്യാസ പ്രവർത്തകനുമായ റവ. ഡോ. ടോം തോമസ് പന്നലക്കുന്നേൽ (MSFS) ആണ്. സൈക്കോളജി, പാസ്റ്ററൽ കെയർ മേഖലകളിൽ വിപുലമായ അനുഭവമുള്ള അദ്ദേഹം കേരളത്തിലെ വയനാട്മ ക്കിയാട് പ്രവർത്തിക്കുന്ന ഡി സെയിൽസ് സെന്റർ ഫോർ അക്കമ്പനീഡ് റിന്യൂവൽ ആൻഡ് എംപവർമെന്റ് (DeCare) എന്ന സ്ഥാപനത്തിന്റെ ഡയറക്ടറായും സേവനം ചെയ്യുന്നു.
ഫ്ര. ടോമിന് ബാംഗ്ലൂരിലെ മോൺഫോർട്ട് കോളേജിൽ നിന്ന് ഫാമിലി തെറാപ്പിയിൽ മാസ്റ്റേഴ്സ് ബിരുദവും, അമേരിക്കയിലെ അർഗോസി
യൂണിവേഴ്സിറ്റിയിലെ ഇലിനോയിസ് സ്കൂൾ ഓഫ് പ്രൊഫഷണൽ സൈക്കോളജിയിൽ നിന്ന് കൗൺസിലർ എഡ്യൂക്കേഷൻ ആൻഡ്
സൂപ്പർവിഷനിൽ ഡോക്ടറേറ്റും ലഭിച്ചിട്ടുണ്ട്. ബാംഗ്ലൂരിലെ സെന്റ് ഫ്രാൻസിസ് ഡി സെയിൽസ് ഡിഗ്രി കോളേജിൽ വൈസ് പ്രിൻസിപ്പാളായും,അമേരിക്കയിലെ ടെക്സാസിലുള്ള ശാലോം സെന്ററിൽ ക്ലിനിക്കൽ ഡയറക്ടറായും സേവനം അനുഷ്ഠിച്ചിട്ടുണ്ട്. മാനസികാരോഗ്യം,വ്യക്തിബന്ധങ്ങൾ, ലഹരി ആശക്തി, ആത്മീയത തുടങ്ങിയ മേഖലകളിൽ അദ്ദേഹത്തിന്റെ ഗവേഷണങ്ങളും സേവനങ്ങളും ശ്രദ്ധേയമാണ്.
മാർച്ച് 20 വെള്ളിയാഴ്ച വൈകിട്ട് 6 മുതൽ 9 വരെ ധ്യാനം ആരംഭിക്കും. തുടർന്ന് മാർച്ച് 21 ശനിയാഴ്ചയും മാർച്ച് 22 ഞായറാഴ്ചയും രാവിലെ 9
മുതൽ വൈകിട്ട് 5 വരെ പരിപാടികൾ നടക്കും. പ്രഭാഷണങ്ങൾ, പ്രാർത്ഥനാസമ്മേളനങ്ങൾ, ആത്മപരിശീലനത്തിനുള്ള അവസരങ്ങൾ
എന്നിവ ഉൾപ്പെടുന്ന ഈ ധ്യാനം വ്യക്തിജീവിതത്തിലും കുടുംബജീവിതത്തിലും മാറ്റം സൃഷ്ടിക്കാനാണ് ലക്ഷ്യമിടുന്നത്.
വിക്കാരി റവ. ഫ്ര. സിമ്മി തോമസ് അലുംചുവട്ടിലിന്റെ നേതൃത്വത്തിലാണ് ഈ ധ്യാനം സംഘടിപ്പിക്കുന്നത്. പ്രദേശത്തെ വിവിധ ഭാഗങ്ങളിൽ നിന്നുള്ള വിശ്വാസികൾ പങ്കെടുക്കുമെന്നാണു പ്രതീക്ഷ.
കൂടുതൽ വിവരങ്ങൾക്ക് trustees.sgsmccpaterson@gmail.com എന്ന ഇമെയിൽ വിലാസത്തിൽ ബന്ധപ്പെടാം.
