തിരുവനന്തപുരം: സാമ്പത്തികമായി പിന്നോക്കം നില്ക്കുന്ന മിടുക്കരായ നഴ്സിംഗ് വിദ്യാര്ത്ഥികള്ക്ക് പഠനത്തില് കരുത്തേകുന്ന മഹത്തായ പദ്ധതിക്ക് വേള്ഡ് മലയാളി കൗണ്സില് (WMC) തിരുവനന്തപുരത്ത് തുടക്കം കുറിച്ചു. ഒരു കോടി രൂപയുടെ ഗ്ലോബല് നഴ്സിംഗ് സ്കോളര്ഷിപ്പ് പദ്ധതിയുടെ ആദ്യഘട്ടമായി സംസ്ഥാനത്തിന്റെ വിവിധ ഭാഗങ്ങളില് നിന്ന് തെരഞ്ഞെടുത്ത 25 നഴ്സിംഗ് വിദ്യാര്ത്ഥികള്ക്ക് ഓരോ ലക്ഷം രൂപ വീതം സ്കോളര്ഷിപ്പ് വിതരണം ചെയ്തു.
തിരുവനന്തപുരം മാസ്കോട്ട് ഹോട്ടലില് നടന്ന ചടങ്ങ് സംഘാടന മികവിലും സാമൂഹിക പ്രതിബദ്ധതയിലും ശ്രദ്ധേയമായി. മുന് ഫൊക്കാന പ്രസിഡന്റും നിലവില് വേള്ഡ് മലയാളി കൗണ്സില് ഗ്ലോബല് പ്രസിഡന്റുമായ ഡോ. ബാബു സ്റ്റീഫന് ആണ് പദ്ധതിക്ക് രൂപം നല്കുകയും സ്കോളര്ഷിപ്പ് വിതരണം നടത്തുകയും ചെയ്തത്.
ചടങ്ങ് മൃഗസംരക്ഷണ-ഡയറി വികസന വകുപ്പ് മന്ത്രി ജെ. ചിഞ്ചുറാണി ഉദ്ഘാടനം ചെയ്തു. രാജ്യസഭാംഗം ജോണ് ബ്രിട്ടാസ് മുഖ്യപ്രഭാഷണം നടത്തി.
എം.എല്.എമാരായ കടകംപള്ളി സുരേന്ദ്രന്, വി. കെ. പ്രശാന്ത്, പി. ഉബൈദുള്ള, എം. മുകേഷ് എന്നിവര് ആശംസകള് നേര്ന്നു.
നോര്ക്ക സി.ഇ.ഒ അജിത് കൊളാശ്ശേരി, ഡോ. എം. വി. പിള്ള, വേള്ഡ് മലയാളി കൗണ്സില് ഗ്ലോബല് ചെയര്മാന് തോമസ് മൊട്ടക്കല്, ഗ്ലോബല് ജനറല് സെക്രട്ടറി ഷാജി മാത്യു, വൈസ് പ്രസിഡന്റ് ജെയിംസ് കൂടല്, ട്രഷറര് സണ്ണി സി. വെളിയത്ത്, സെക്രട്ടറി വിജയചന്ദ്രന്, വൈസ് പ്രസിഡന്റ് (ഇന്ത്യ റീജണ്) തങ്കമണി ദിവാകരന് ടി. പി. വിജയന്, പദ്മകുമാര് എന്നിവര് ചടങ്ങില് സന്നിഹിതരായിരുന്നു.
ഈ പദ്ധതിയിലൂടെ ആകെ 100 നഴ്സിംഗ് വിദ്യാര്ത്ഥികള്ക്ക് ഒരു ലക്ഷം രൂപ വീതം സ്കോളര്ഷിപ്പ് നല്കുമെന്ന് സംഘടന നേതൃത്വം അറിയിച്ചു. സാമ്പത്തികമായി പിന്നോക്കം നില്ക്കുന്ന മിടുക്കരായ വിദ്യാര്ത്ഥികള്ക്ക് നഴ്സിംഗ് പഠനത്തില് കരുത്താകുകയാണ് പദ്ധതിയുടെ ലക്ഷ്യം.
ലോകമെമ്പാടുമുള്ള മലയാളികളുടെ ഐക്യത്തിന്റെയും സാമൂഹിക ഉത്തരവാദിത്തത്തിന്റെയും ശക്തമായ സന്ദേശമായാണ് ഗ്ലോബല് നഴ്സിംഗ് സ്കോളര്ഷിപ്പ് പദ്ധതി വിലയിരുത്തപ്പെടുന്നതെന്ന് ഗ്ലോബല് അഡ്മിന് വൈസ് പ്രസിഡന്റ് ജെയിംസ് കൂടല് പറഞ്ഞു.
Report ജെയിംസ് കൂടല്
Leave a comment