‘അനോമി’: ഭാവനയുടെ മലയാളത്തിലേക്കുള്ള മികച്ച ഒരു മടങ്ങിവരവ്

മലയാള സിനിമയുടെ പതിവ് ശൈലികളിൽ നിന്നും മാറി നടക്കാൻ ശ്രമിക്കുന്ന ഒരു ചിത്രമാണ് റിയാസ് മാരത്ത് സംവിധാനം ചെയ്ത ‘അനോമി’. സൈക്കോളജിക്കൽ ത്രില്ലർ എന്ന ലേബലിൽ എത്തുമ്പോഴും, മരണത്തെയും മനുഷ്യന്റെ മനസ്സാക്ഷിയെയും കുറിച്ചുള്ള ദാർശനികവും ശാസ്ത്രീയവുമായ ചോദ്യങ്ങൾ ഉയർത്താൻ ഈ ചിത്രം ശ്രമിക്കുന്നുണ്ട്. ഹോളിവുഡ് സിനിമകളിൽ നാം കണ്ടുപരിചയിച്ച ‘ഹൈ-കൺസെപ്റ്റ്’ ആശയങ്ങളെ കേരളീയ പശ്ചാത്തലത്തിലേക്ക് പറിച്ചുനടാനുള്ള ഒരു ധീരമായ ശ്രമമായി ഈ സിനിമയെ അടയാളപ്പെടുത്താം. അതിലുപരി വെല്ലുവിളികൾ നിറഞ്ഞ അഭിനയമുഹൂർത്തങ്ങളിലൂടെ മലയാളത്തിന്റെ പ്രിയതാരം ഭാവന തന്റെ തട്ടകത്തിലേക്ക് നടത്തുന്ന അതിശക്തമായ ഒരു മടങ്ങിവരവ് കൂടിയായി ഈ ചിത്രം മാറുന്നു.

ഫൊറൻസിക് വിദഗ്ധയായ സാറ ഫിലിപ്പിന്റെയും സഹോദരൻ സിയാന്റെയും ജീവിതത്തിലൂടെയാണ് കഥ വികസിക്കുന്നത്. മാതാപിതാക്കളുടെ അപ്രതീക്ഷിത മരണം സിയാന്റെ മാനസിക നില തെറ്റിക്കുന്നു. ഒരു ദിവസം സിയാനെ കാണാതാകുന്നതോടെ സാറ നടത്തുന്ന അന്വേഷണം സമാനമായ മാനസികാവസ്ഥയുള്ള യുവാക്കൾ കൊല്ലപ്പെടുന്ന വലിയൊരു സൈക്കോപാത്തിലേക്കോ മാഫിയയിലേക്കോ വിരൽ ചൂണ്ടുന്നു. ഈ യാത്രയിൽ സാറയോടൊപ്പം ചേരുന്ന പൊലീസ് ഓഫീസർ ജിബ്രാൻ തന്റെ കരിയറിലെ പാളിച്ചകൾക്ക് പരിഹാരം തേടുന്ന ഒരു ഓഫിസർ കൂടിയാണ്. ഇവരുടെ അന്വേഷണത്തിനൊടുവിൽ വെളിപ്പെടുന്ന ചില നിഗൂഢരഹസ്യങ്ങളാണ് ചിത്രത്തിന്റെ കാതൽ.

തന്റെ പതിവ് ഹാസ്യവേഷങ്ങളിൽ നിന്ന് മാറി, വൈകാരികതയും ബുദ്ധിശക്തിയും ഒത്തുചേർന്ന സാറ എന്ന കഥാപാത്രത്തെ ഭാവന അത്യന്തം മികവോടെ അവതരിപ്പിച്ചു. സഹോദരനോടുള്ള കരുതലും പ്രഫഷണൽ മികവും ഒരേപോലെ പ്രതിഫലിപ്പിച്ച ഈ വേഷം ഭാവനയുടെ കൈകളിൽ ഭദ്രമായിരുന്നു. ഒരു നീണ്ട ഇടവേളയ്ക്ക് ശേഷം തന്റെ അഭിനയക്കരുത്ത് തെളിയിച്ചുകൊണ്ട് മലയാളത്തിലേക്കുള്ള ഭാവനയുടെ ഏറ്റവും മികച്ച തിരിച്ചുവരവാണ് ഈ ചിത്രം. എ സി പി ജിബ്രാൻ എന്ന കഥാപാത്രമായി എത്തിയ റഹ്മാൻ തന്റെ പക്വതയാർന്ന അഭിനയ ശൈലിയിലൂടെ ചിത്രത്തിന് ഒരു സ്റ്റെബിലിറ്റി നൽകുന്നു. അന്വേഷണ ഉദ്യോഗസ്ഥൻ എന്ന നിലയിലും ആക്ഷൻ രംഗങ്ങളിലും റഹ്മാന്റെ സ്ക്രീൻ പ്രസൻസ് ശ്രദ്ധേയമാണ്. ഷെബിൻ ബെൻസൺ ആണ് എടുത്തു പറയേണ്ട മറ്റൊരു താരം. മനസ്സിന്റെ സമനില തെറ്റിയ അവസ്ഥയെ ഒട്ടും അതിശയോക്തിയില്ലാതെ, വളരെ മിതത്വത്തോടെ അവതരിപ്പിക്കുന്നതിൽ ഷെബിൻ ബെൻസൺ വിജയിച്ചു. അതേസമയം, സൈക്കോസിസിന്റെ സങ്കീർണ്ണമായ പല അവസ്ഥാന്തരങ്ങളെയും തന്റെ പ്രകടനത്തിലൂടെ ഭയപ്പെടുത്തുന്ന രീതിയിൽ പ്രതിഫലിപ്പിക്കാൻ വിഷ്ണു അഗസ്ത്യയ്ക്കും സാധിച്ചു. സുമിത്ത് നവൽ ആണ് പ്രകടന മികവിൽ വിസ്മയിപ്പിച്ച മറ്റൊരു താരം. അർജുൻ ലാൽ, ദൃശ്യാ രഖുനാഥ്‌, ബിനു പപ്പു തുടങ്ങി മികച്ച പ്രകടനം കാഴ്ചവച്ച നിരവധി താരങ്ങൾ ചിത്രത്തിലുണ്ട്.

നവാഗതനായ റിയാസ് മാരത്ത് തന്റെ ആദ്യ ചിത്രത്തിലൂടെ തന്നെ മലയാള സിനിമയിൽ വേറിട്ടൊരു വഴി വെട്ടാനാണ് ശ്രമിച്ചിരിക്കുന്നത്. കേവലം ഒരു ക്രൈം ത്രില്ലർ എന്നതിനപ്പുറം ശാസ്ത്രത്തെയും തത്ത്വചിന്തയെയും കോർത്തിണക്കിയുള്ള ഒരു ‘ഹൈ-കൺസെപ്റ്റ്’ ശൈലിയാണ് അദ്ദേഹം സ്വീകരിച്ചിരിക്കുന്നത്. ഹോളിവുഡ് സയൻസ് ഫിക്ഷൻ സിനിമകളുടെ സ്വാധീനം സംവിധാനത്തിൽ പ്രകടമാണ്. എങ്കിലും, രണ്ടാം പകുതിയിൽ കഥ ഒരു മിസ്റ്ററി ത്രില്ലറിലേക്ക് മാറുമ്പോൾ തിരക്കഥയിൽ കൂടുതൽ മിതത്വവും കെട്ടുറപ്പും ആവശ്യമായിരുന്നു എന്ന് തോന്നിപ്പിക്കുന്നു. ഇൻവെസ്റ്റിഗേഷൻ പുരോഗമിക്കുമ്പോൾ തിരക്കഥയിൽ അൽപ്പം ഇഴച്ചിൽ അനുഭവപ്പെടുന്നത് ഒരു പോരായ്മയായി തോന്നിയേക്കാം. സാങ്കേതികമായി ‘അനോമി’ മികച്ച നിലവാരം പുലർത്തുന്നുണ്ട്. സുജിത്ത് സാരംഗിന്റെ ഛായാഗ്രഹണം സിനിമയുടെ നിഗൂഢമായ അന്തരീക്ഷത്തിന് ചേരുന്ന രീതിയിൽ ഡൾ മൂഡ് കൃത്യമായി നൽകി. ‘അനിമൽ’ എന്ന ചിത്രത്തിലൂടെ ശ്രദ്ധേയനായ ഹർഷവർദ്ധൻ രാമേശ്വറിന്റെ പശ്ചാത്തല സംഗീതം ചിത്രത്തിന്റെ പിരിമുറുക്കം വർദ്ധിപ്പിക്കുന്നതിൽ പ്രധാന പങ്ക് വഹിക്കുന്നു. സിനിമയിലെ ചില ഡ്രീം സീക്വൻസുകളും സയൻസ് ഫിക്ഷൻ എലമെന്റുകളുടെ വിഷ്വലൈസേഷനും ഹോളിവുഡ് നിലവാരത്തിനൊപ്പമെത്തുന്നുണ്ട്.

മലയാള സിനിമയുടെ പതിവ് ശൈലികളിൽ നിന്ന് മാറിനിൽക്കുന്ന സയൻസ് ഫിക്ഷൻ-ത്രില്ലർ ഗണത്തിൽപ്പെട്ട പരീക്ഷണ ചിത്രങ്ങളെ സ്നേഹിക്കുന്നവർക്ക് ‘അനോമി’ ഒരു പുത്തൻ അനുഭവമായിരിക്കും.