മേരിലാൻഡ് : എൻഎഫ്എൽ താരം ഖൈറി ജാക്സണും സുഹൃത്തുക്കളും വാഹനാപകടത്തിൽ കൊല്ലപ്പെട്ട കേസിൽ പ്രതിയായ യുവതിക്ക് കോടതി ശിക്ഷ വിധിച്ചു. 25 വയസ്സുകാരിയായ കോറി ക്ലിംഗിമാനാണ് ശിക്ഷിക്കപ്പെട്ടത്. മൂന്ന് വർഷത്തെ തടവുശിക്ഷയാണ് കോടതി വിധിച്ചത്. ഇതിനകം അനുഭവിച്ച 377 ദിവസത്തെ തടവ് ഇതിൽ നിന്ന് കുറയ്ക്കും. ബാക്കി രണ്ട് വർഷത്തോളം അവർ ജയിലിൽ കഴിയണം.
2024 ജൂലൈയിലായിരുന്നു കായികലോകത്തെ നടുക്കിയ ഈ ദുരന്തം നടന്നത്. മേരിലാൻഡിലെ പ്രിൻസ് ജോർജ് കൗണ്ടിയിൽ വെച്ച് കോറി ഓടിച്ച കാർ ഖൈറി ജാക്സണും സുഹൃത്തുക്കളും സഞ്ചരിച്ചിരുന്ന വാഹനത്തിൽ ഇടിക്കുകയായിരുന്നു.
മിനസോട വൈക്കിങസ് താരം ഖൈറി ജാക്സൺ (24), സഹപാഠികളായിരുന്ന ഐസയ ഹാസൽ (23), ആന്തണി ലിറ്റൺ ജൂനിയർ (24) എന്നിവരാണ് അപകടത്തിൽ മരിച്ചത്. അപകടസമയത്ത് കോറി ക്ലിംഗിമാൻ മണിക്കൂറിൽ 109 മൈൽ (ഏകദേശം 175 കി.മീ) വേഗതയിലാണ് വാഹനമോടിച്ചിരുന്നതെന്നും അവർ മദ്യപിച്ചിരുന്നതായും പ്രോസിക്യൂട്ടർമാർ കോടതിയിൽ തെളിയിച്ചു. പ്രതി മറ്റൊരു വാഹനത്തിൽ ഇടിച്ച ശേഷം നിയന്ത്രണം വിട്ട് ഇരകളുടെ വാഹനത്തിലേക്ക് ഇടിച്ചു കയറുകയായിരുന്നു.
