തിരുവനന്തപുരം: നിയമസഭ തിരഞ്ഞെടുപ്പിൽ ബേപ്പൂർ മണ്ഡലത്തിൽ പി.വി. അൻവർ യുഡിഎഫ് സ്ഥാനാർഥിയാകുമെന്ന് സ്ഥിരീകരിച്ച് കെപിസിസി അധ്യക്ഷൻ സണ്ണി ജോസഫ്. അൻവർ ബേപ്പൂരിൽ ജയിച്ച് എംഎൽഎ ആവുമെന്നും സണ്ണി ജോസഫ് പറഞ്ഞു. അൻവർ മണ്ഡലത്തിൽ അനൗപചാരിക പ്രചാരണം ആരംഭിച്ചതുമായി ബന്ധപ്പെട്ട ചോദ്യത്തിനു മറുപടി പറയുകയായിരുന്നു അദ്ദേഹം.
നേരത്തേ, ബേപ്പൂർ മണ്ഡലത്തിലെ പ്രമുഖരെ അൻവർ നേരിട്ട് കണ്ട് പിന്തുണ തേടിയിരുന്നു. മന്ത്രി മുഹമ്മദ് റിയാസിനെതിരെ അൻവറിനെ നിർത്തി ശക്തമായ മത്സരം നടത്താമെന്നാണ് യുഡിഎഫിന്റെ കണക്കുക്കൂട്ടൽ. ഭരണവിരുദ്ധവികാരമുണ്ടായാൽ അത് പ്രതിഫലിക്കുന്ന മണ്ഡലമാകും ബേപ്പൂരെന്നും കോൺഗ്രസ് വിലയിരുത്തുന്നു.
ഉറപ്പ് ലഭിക്കാതെ വെയിൽ കൊള്ളിലല്ലോ എന്ന് ബേപ്പൂരിലെ പ്രചാരണവുമായി ബന്ധപ്പെട്ട ചോദ്യങ്ങൾക്ക് അൻവർ നേരത്തെ മറുപടി നൽകിയിരുന്നു. 2021ലെ നിയമസഭാ തിരഞ്ഞെടുപ്പിൽ മന്ത്രി പി.എ മുഹമ്മദ് റിയാസ് 28,747 വോട്ടിൻറെ ഭൂരിപക്ഷത്തിൽ വിജയിച്ച മണ്ഡലമാണ് ബേപ്പൂർ.
