‘ബോംബ് സൈക്ലോൺ’ : ഇനിയും അതിശക്തമായ മഞ്ഞുവീഴ്ചയ്ക്ക് സാധ്യത; ജാഗ്രതാ നിർദേശം

ന്യൂയോർക്ക് : അമേരിക്കയുടെ കിഴക്കൻ തീരങ്ങളിൽ വരും ദിവസങ്ങളിൽ അതിശക്തമായ ശീതക്കാറ്റിനും മഞ്ഞുവീഴ്ചയ്ക്കും സാക്ഷ്യം വഹിക്കുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.

വായുമർദ്ദം അതിവേഗം താഴുന്നതിലൂടെ രൂപപ്പെടുന്ന ‘ബോംബ് സൈക്ലോൺ’ പ്രതിഭാസം ശനിയാഴ്ചയോടെ കരതൊടുമെന്നാണ് കണക്കുകൂട്ടൽ. കാരോലൊന, വെർജീനിയ മേഖലകളിൽ 6 മുതൽ 12 ഇഞ്ച് വരെ മഞ്ഞ് വീഴാൻ സാധ്യതയുള്ളപ്പോൾ, ന്യൂയോർക്ക്, ബോസ്റ്റൺ തുടങ്ങിയ നഗരങ്ങളിൽ 3 മുതൽ 6 ഇഞ്ച് വരെ മഞ്ഞുവീഴ്ച പ്രതീക്ഷിക്കുന്നു.

മണിക്കൂറിൽ 60 മൈൽ വരെ വേഗതയുള്ള കാറ്റും കാഴ്ചപരിധി കുറയ്ക്കുന്ന കനത്ത മഞ്ഞും യാത്രാ സൗകര്യങ്ങളെയും വൈദ്യുതി ബന്ധത്തെയും സാരമായി ബാധിച്ചേക്കാം. അതിശൈത്യം തുടരുന്ന സാഹചര്യത്തിൽ അനാവശ്യ യാത്രകൾ ഒഴിവാക്കണമെന്നും ജാഗ്രത പാലിക്കണമെന്നും അധികൃതർ നിർദ്ദേശിച്ചു. ഞായറാഴ്ച രാത്രിയോടെ കാറ്റിന്റെ വേഗത കുറയുമെങ്കിലും ആഴ്ചയുടെ തുടക്കത്തിൽ കടുത്ത തണുപ്പ് തുടരാനാണ് സാധ്യത.

Report ജയിംസ് വർഗീസ്