മൂന്ന് തവണ കണ്ട ഭീകര സ്വപ്നം യാഥാർഥ്യമായി; വിമാനം തകർന്ന് കൊളംബിയൻ പോപ്പ് താരം മരിച്ചു

മെഡലിൻ: കൊളംബിയൻ പോപ്പ് താരം യെസൺ ജിമെനെസ് (34) സ്വപ്നം കണ്ടതുപോലെ തന്നെ വിമാനം തകർന്ന് മരിച്ചതായി റിപ്പോർട്ട്. ശനിയാഴ്ച പൈപ്പിൽ പറന്നുയർന്ന് നിമിഷങ്ങൾക്കുള്ളിൽ വിമാനം തകർന്നതിനെത്തുടർന്നുണ്ടായ അപകടത്തിൽ യെസൺ ജിമെനെസും ബാൻഡ് അംഗങ്ങളും ഫൊട്ടോഗ്രഫർ വീസ്മാൻ മോറയും കൊല്ലപ്പെട്ടത്. മെഡലിനിൽ നിശ്ചയിച്ചിരുന്ന സംഗീത പരിപാടിയിൽ പങ്കെടുക്കുന്നതിനാണ് ഇവർ പോയത്.

ഞങ്ങൾ ഒരു വിമാനപകടത്തിൽ പെടുന്നതായി താൻ സ്വപ്നം കണ്ടതായി യെസൺ ജിമെനെസ് കൊളംബിയൻ ടിവി ചാനലായ കാരക്കോളിന് നൽകിയ അഭിമുഖത്തിൽ പറഞ്ഞിരുന്നു. വിമാന അപകടത്തിൽ പെടാൻ പോവുകയാണെന്ന് മനസ്സിലാക്കിയ താൻ പൈലറ്റിനോട് ദിശ മാറ്റാൻ പറഞ്ഞതായിട്ടാണ് താരം അന്ന് പറഞ്ഞത്.

മറ്റൊരു സ്വപ്നത്തിൽ താനും സഹയാത്രികരും വിമാനപകടത്തിൽ കൊല്ലപ്പെടുന്നതായി കണ്ടു. ഇത്തരം സ്വപ്നങ്ങൾ മൂന്നാം തവണയാണ് കണ്ടത്. ഈ സ്വപ്നങ്ങൾ ദൈവം നൽകുന്ന മുന്നറിയിപ്പായിട്ടാണ് കാണുന്നത്. പക്ഷേ ഇത് കൊണ്ട് എന്താണ് ഉദ്ദേശിക്കുന്നതെന്ന് തനിക്ക് മനസ്സിലായില്ലെന്നും യെസൺ ജിമെനെസ് മുൻപ് വ്യക്തമാക്കിയിരുന്നു.