ആലപ്പുഴ: സംസ്ഥാനത്ത് ആദ്യമായി ദേശീയപാതയിലെ പാലത്തിൽ ശബ്ദമലിനീകരണം കുറയ്ക്കാൻ ബ്രിഡ്ജ് നോയിസ് ബാരിയർ സ്ഥാപിക്കുന്നു. അരൂർ-തുറവൂർ ഉയരപ്പാത നിർമ്മാണവുമായി ബന്ധപ്പെട്ടാണ് ഈ ആധുനിക സംവിധാനം സ്ഥാപിക്കുന്നത്. ഇന്ത്യയിലെ മറ്റ് പല സംസ്ഥാനങ്ങളിലും പാലങ്ങളിലും ഹൈവേകളിലും നോയിസ് ബാരിയർ സംവിധാനം നേരത്തേ സ്ഥാപിച്ചിട്ടുണ്ട്.
ഇന്ത്യയിലെ ഏറ്റവും വലിയ പാലമായ അരൂർ-തുറവൂർ ഉയരപ്പാതയുടെ നിർമ്മാണം 85 ശതമാനത്തോളം പൂർത്തിയായിക്കഴിഞ്ഞു. 12.75 മീറ്ററാണ് ഇതിന്റെ നീളം. പാലത്തിന്റെ ഇരു വശങ്ങളിലുമായാണ് നോയിസ് ബാരിയർ സ്ഥാപിക്കുന്നത്. ആറുവരിപ്പാതയുടെ ഇരു വശങ്ങളിലുമായി 25.5 കിലോമീറ്റർ ഭാഗത്ത് ഈ സംവിധാനം സ്ഥാപിക്കുന്ന ജോലികളാണ് ആരംഭിച്ചിരിക്കുന്നത്. 40 സെന്റീമീറ്റർ കൈവരിക്കുമുകളിൽ ഒന്നര മീറ്റർ ഉയരത്തിലുള്ള ബ്രിഡ്ജ് നോയിസ് ബാരിയറുകളാണ് സ്ഥാപിക്കുന്നത്.
ഉയരപ്പാതയുടെ സമീപമുള്ള വീടുകൾ, ആശുപത്രികൾ, സ്കൂളുകൾ എന്നിവയെ ശബ്ദമലിനീകരണത്തിൽ നിന്നും സംരക്ഷിക്കുന്നതിനുവേണ്ടിയാണ് നോയിസ് ബാരിയർ സ്ഥാപിക്കുന്നത്. വാഹനങ്ങൾ അമിത വേഗത്തിൽ പോകുമ്പോഴുണ്ടാകുന്ന മുഴക്കവും ഇതിലൂടെ കുറയ്ക്കാൻ സാധിക്കും.
നോയിസ് ബാരിയറിലെ മെറ്റൽ സൗണ്ട് അബ്സോർബിംഗ് പാനലിന്റെ ഉള്ളിൽ മിനിറൽ വൂൾ, ഭാരം കുറഞ്ഞ സുതാര്യമായ അക്രലിക് പോളി കാർബണേറ്റ് ഷീറ്റ്, ഭാരം കുറഞ്ഞതും സുതാര്യവുമായ ഗ്ലാസ് പാനലുകൾ എന്നിവയാണ് ഉപയോഗിക്കുന്നത്.
