ന്യു യോർക്ക് കോൺസൽ ജനറൽ ശ്രീകാന്ത പ്രധാൻ സി.എസ്. ഐ. ചർച്ച് കാരൾ സർവീസിൽ പങ്കെടുത്തു

ന്യൂയോർക്ക്: ചർച്ച് ഓഫ് സൗത്ത് ഇന്ത്യ ജൂബിലി മെമ്മോറിയൽ ചർച്ച്, ന്യൂയോർക്ക് സഭയുടെ ആഭിമുഖ്യത്തിൽ ക്രിസ്തുമസ് കാരൾ സർവീസ്  ശനിയാഴ്ച   ഭക്തിസാന്ദ്രമായ അന്തരീക്ഷത്തിൽ നടന്നു.

ക്വയർ മാസ്റ്റർ   ജോയൽ വർഗീസിന്റെ  നേതൃത്വത്തിൽ സഭയുടെ ഗായകസംഘം മലയാളത്തിലും ഇംഗ്ലീഷിലുമായി ക്രിസ്തുമസ് കാരൾ ഗാനങ്ങൾ ആലപിച്ചു. ചടങ്ങിന് ഗാനശുശ്രൂഷ  ആത്മീയ ഉത്സവഭാവം പകർന്നു.

റിസറക്ഷൻ എപ്പിസ്കോപൽ ചർച്ച്, ന്യൂയോർക്ക് വികാരി റവ. ആനന്ദശേഖർ ജോസഫ് മാനുവൽ ക്രിസ്തുമസ് സന്ദേശം നൽകി. ക്രിസ്തുവിന്റെ ജനനത്തിലൂടെ ലോകത്തിന് ലഭിച്ച പ്രത്യാശയും സമാധാനവും സ്നേഹവും ജീവിതത്തിൽ പ്രകടമാക്കേണ്ട ക്രിസ്തീയ ദൗത്യവും  അദ്ദേഹം തന്റെ സന്ദേശത്തിൽ ഊന്നിപ്പറഞ്ഞു. 

ന്യു യോർക്ക് ഇന്ത്യൻ കോൺസൽ  ജനറൽ, അംബാസഡർ ബിനയ ശ്രീകാന്ത പ്രധാൻ ചടങ്ങിൽ സന്നിഹിതനായത് സഭയ്ക്ക് വലിയ ബഹുമതിയായി. കോൺസുലേറ്റ് കമ്മ്യൂണിറ്റി അഫയേഴ്സിൽ നിന്നുള്ള  കോൺസൽ ത്സേവാങ് ഗ്യാൽത്സനും  പരിപാടിയിൽ പങ്കെടുത്തു.

അംബാസഡർ ബിനയ ശ്രീകാന്ത പ്രധാനെ  സഭ ആദരിക്കുകയും ഉപഹാരം സമർപ്പിക്കുകയും ചെയ്തു.