വാഷിങ്ടൻ: കൂണുകൾ അമിതമായി കഴിച്ചതോടെ ഉന്മാദാവസ്ഥയിലായ പൈലറ്റ് വിമാനത്തിന്റെ എഞ്ചിൻ ഓഫ് ചെയ്യാൻ ശ്രമിച്ചതായി വെളിപ്പെടുത്തൽ. അലാസ്ക എയർ പൈലറ്റാണ് ആകാശത്ത് വെച്ച് വിമാന എഞ്ചിനുകൾ ഓഫ് ചെയ്യാൻ ശ്രമിച്ചത്. ദിവസങ്ങൾക്കു മുമ്പ് താൻ കഴിച്ച മാജിക് കൂണുകളുടെ ഫലത്താലാണ് തനിക്ക് ഉന്മാദാവസ്ഥ ഉണ്ടായതെന്നും പൈലറ്റ് പറയുന്നു.
2023 ഒക്ടോബറിലായിരുന്നു സംഭവം. സിയാറ്റിലിൽ നിന്ന് സാൻ ഫ്രാൻസിസ്കോയിലേക്ക് പറക്കുകയായിരുന്ന അലാസ്ക എയർലൈൻസിന്റെ അനുബന്ധ കമ്പനിയായ ഹൊറൈസൺ എയർ പ്രവർത്തിപ്പിക്കുന്ന റീജിയണൽ ജെറ്റിന്റെ എഞ്ചിനാണ് പൈലറ്റ് ഓഫ് ചെയ്യാൻ ശ്രമിച്ചത്. ഈ സമയം 83 യാത്രക്കാരും ജീവനക്കാരും വിമാനത്തിൽ ഉണ്ടായിരുന്നു. പൈലറ്റായിരുന്ന ജോസഫ് എമേഴ്സണാണ് വിമാനത്തിന്റെ എഞ്ചിൻ ഓഫ് ചെയ്യാൻ ശ്രമിച്ചത്. ഇതുമായി ബന്ധപ്പെട്ട് എമേഴ്സണെ സഹപൈലറ്റ് മുന്നറിയിപ്പ് നൽകുന്ന കോക്ക്പിറ്റ് ഓഡിയോ അടുത്തിടെ സമൂഹമാധ്യമത്തിലൂടെ പുറത്തുവന്നിരുന്നു. ഇതോടെയാണ് സംഭവം പുറത്തറിയുന്നത്.
വിമാനം വൈകാതെ പോർട്ട്ലാൻഡിൽ അടിയന്തരമായി ലാൻഡ് ചെയ്യുകയും എമേഴ്സണെ പൊലീസ് പിടികൂടുകയും ചെയ്തു. താൻ കഴിച്ച മാജിക് കൂണുകള് കാരണമാണ് ഉന്മാദാവസ്ഥയിലായെന്നാണ് എമേഴ്സൺ പൊലീസിനോട് പറഞ്ഞത്.
